Kɔgya 91 - Katɔti Ɔku Kedee

¹ Ukyuli ɔni nli Katɔti Ɔyikune Ƒui kudɔ na ɔɔgyumana-nwu na Unwoti Ɔyikune Ƒui ɔmmɔ ɔ́kya-nwu ɔyuli ni,

² anwu ndubɔsu Unwoti ɔnini, “Awɔ ndi mina kagyumanakɔ kpakplaa kesii kani na mɔɔbɛ́. Na adi-mi Katɔti ɔni lɛlɔ na mina anu asia.”

³ Ɔsika ɔdubɔtɔnku-ɔ na eleduo kɔkpagyuɛ kɔni na bekyuli bábɛ bákywɛ-ɔ kemmo. Na lɛlɛ buɛ lɛni mɔɔví lɛnɔ ɔdi ulébo-ɔ.

⁴ Ɔdububi-ɔ ala aani kalɛ na akɔkɔ uubi nwuna bebi avwi na akɛ kabɛkɔ. Na kalɛ na ɔɔsia nwuna litemi kama siin ɔsu ni, ɔdubo-ɔ bɔgyumana na ukpo ute-ɔ.

⁵ Aaadubo ɔgbankpi ɔdi bɔyia na usien iye ekpola adi na limeyi kemmo.

⁶ Na alayia lɛlɛ lɛni muubó ukyuli usien iye ɔgbankpi ɔni muubo ukyuli lɛlɔ kɔnakunwi na ɔƒiiwi.

⁷ Nkyuli mpim mpim badubo bukpi bamana-a nsu ɔgbankpi ɔmmɔ uláni uléde-ɔ.

⁸ Ƒula anumi nwaa na adubo bɔnu kalɛ na Unwoti ɔdubo balalane kɔtu bɔni.

⁹ Ka ƒula anu asia Unwoti lɛlɔ na eli-nwu kudɔ na áya na ɔ́bɛla-a ɔsu ni,

¹⁰ ɔgbankpi iye likpidi bamba lɛdi lɛɛɛdubo-ɔ bɔlɛku na ƒula kaduli.

¹¹ Ɔsika ɔdubɔtala nwuna batu na bagyumana-a na ƒula kasiakɔ ƒui

¹² Badubɔgyu-ɔ bada enu kemmo ɔni na ƒula ɔgba muedi uletulo atabi adi.

¹³ Adubɔdi bagyata ku balakpi bekpidi ƒui lɛlɔ na balakana-a lɛla lɛdi bɔbla.

¹⁴ Katɔti ɔnini, “Ukyuli ɔni mɔɔyɔ́-mi na ɔ́nu-mi ɔ́ti ni, ndubɔgyumana-nwu na lɛƒɔ-nwu ngba.

¹⁵ Na si lɛla lɛdi liikpóku-nwu na ɔ́kpali-mi ni, ndubunu na lidie-nwu na lɛya na ɔƒɔ lɛnyi.

¹⁶ Ndubɔya-nwu na ulie ngba gyɔlɔɔ na udu-nwu ɔkwɛ na lɛƒɔ-nwu ngba.”