Kɔgya 90 - Katɔti Ɔku Kedee

¹ O Unwoti, ƒula kudɔ ndi bula kaba bekyuli keliekɔ ɔ́si kukuuku ƒui.

² Asa na adubudie abi ku kayawi kammɔ ala ƒui ni, awɔ ndi Katɔti ɔni nli uwi ƒui ɔ́si kukuuku.

³ Awɔ mɔɔyá na ukyuli uukpi na aasu anii ɔsɔ unwini lɛti.

⁴ Ɔsika akwa apim unwi use awɔ aani kaama kadi kani návi iye uwi klukui na usien kemmo.

⁵ Aayá na bula ngba uwi ɔɔví na kalɔ kamɛni lɛlɔ aani kalɛ na kɔna bugye buse. Na búlieku kalɛ na ɔtanta livo lise.

⁶ Aalɛ́ wɔwɔɔwɔ na eebimi. Na useyi uwi ni, aayɛyɛ na aayii udu.

⁷ Ɔsika ƒula kɔnyi kpakplaa kɔɔyá na liƒu bonwu lɛɛda-bu na bɔyii udu.

⁸ Na bula alaekpidi ku ala ani na bɔ́bla bɔ́bɛ ƒui ni, agyi-nya kede kede.

⁹ Bula ngba emeyi aadá liku na ƒula kɔnyi ɔsu aani kalɛ na ukyuli uubó lɛnwuna kani na ɔyula.

¹⁰ Na bula ngba emeyi ƒui adubɔbla aani akwa liti ku aavlanyɔ kani. Na si ɔlɔkplu ɔkya ukyuli ɔdi ni, na ɔdubulie utédu akwa liti ku avlaatɛ. Na ɔmmɔ muedi aatí ka bɔnɔ ku lɛbibo lɛti kani na ɔdi-nwu. Ngba buuubo bɔsa na abu ɔdi ɔvi.

¹¹ Ɔma ngyi kalɛ udu na awɔ Katɔti áani ukyuli kɔtu teetédu si éti kɔnyi? Lɛni ɔsu na liƒu bonwu lɛɛda-bu si livo liiƒí-ɔ.

¹² Ya na bɔti ka bula uwi útene na kalɔ lɛlɔ mɛni na bɔda anu na bɔbla-a kabla.

¹³ O Unwoti, buuvele-ɔ bɔnii kaƒɔ kayɔ-ɔ. Buuvele na anu ƒula kabla bablane kɔnyana.

¹⁴ Buuvele bɔnii ya na bɔnu bɔti kalɛ na aayɔ́-bu uwi ndi uwi, kadi biala négye na budie lɛnu ku lɛlɔyɔ na bɔkɛ ebiti bula ngba emeyi ƒui.

¹⁵ Na aya na ebiti ada-bu na kɔnyana kɔni néƒie-bu kúbavi kenye.

¹⁶ Ya na abu ƒula kabla bablane bɔnu ƒula akɔla ala budie taatina na bula akɔ. Na bula bawɔ banu kalɛ na ebo ɔyikun na eekeye.

¹⁷ Unwoti Katɔti, ya na ƒula kusɛ kusɛ ɔsiaku-bu na aya na ala ani na bɔɔbla ƒui alɛ-bu kɔsia.