Kɔgya 89 - Katɔti Ɔku Kedee

¹ O Unwoti, ndubudie ɔnu libo kudu kalɛ na aayɔ́-bu uwi ndi uwi. Na kaba bekyuli ƒui badububo bebenu lɛsa bɔkɔ bɔmɛni kalɛ na asia ƒula litemi kama geen.

² Ndububo kudu ka ƒula bɔyɔ bɔmmɔ ku kalɛ na aasia ƒula litemi kama use úsela uwi ƒui kalɛ kani na bɔɔnu ka kayaa kese na uuubo kawɔlɔkɔ.

³ Awɔ násu anini, “Línyimi lɛla lɛdi ku mina ukyuli ɔƒunadi. Na líse kenye líte mina kabla ɔblane Ɔga Dawid nnini,

⁴ ‘Ndubɔnu ka ƒula kaba kemmo ubi mɔɔdi lɛga uwi ndi uwi. Na lɛgadi lɛmmɔ lilása mmɔ kudii.’ ”

⁵ O Unwoti, ƒula kayaa ala ediedi ƒui beedie ɔnu na beebó kudu ƒula akɔla ala budie taatina. Na kayaa bayikune kedee bammɔ beedie ɔnu taasu kalɛ na aadi ƒula litemi lɛlɔ siin.

⁶ Ɔsika kayaa ɔyikune ɔdi uuubo na beti bakɔku-ɔ. Na ɔyikune ɔdi lɛnɔ uuubo mmɔ na use aani ƒula kalɛ.

⁷ Adi Katɔti ɔni na kayaa bayikune kede bammɔ ƒui baayia uwi ɔni na bɛ́sa. Ɔsika ébomo na ebo ɔyikun étulo bani náka bámana-a.

⁸ Awɔ ndi Unwoti Katɔti Ɔyikune Ƒui, na ɔdi uuubo ɔyikun na ɔɔsia nwuna litemi kama ƒula kalɛ.

⁹ Awɔ muuboku ɛpu bonwu ku nwuna lɛlɔ bɔnwanɛ ƒui kalɔ. Na aayala nwuna avlɔvɔ ammɔ buɛɛ.

¹⁰ Áyila ɛpu kemmo liƒu kebweyi kani ndi Rahab udu. Na édie ƒula kɔnu na ábla ɔyikun ala na égyingya ƒula bekisine.

¹¹ Kayaa ku kalɔ ƒui kadi awɔ kadi, na kayawi ku kana ala ƒui ni, awɔ nédie-nya.

¹² Kayawi kemodi ɔ́si ɔƒɛnyi unwi útédu ɔkladi ƒui awɔ nédie-ka. Lɛlɔ lɛɛyɔ́ Tabor ku Hermon abi na eedie ƒula bumwi keyi.

¹³ Ebo ɔyikun geen na ƒula ɔyikun use kpakplaa etulo lɛla biala.

¹⁴ Ƒula bɔyɔ bɔni na aayɔ́-bu uwi ndi uwi ku kalɛ na asia ƒula litemi kama ntɔ-ɔ anumi na uudie-ɔ keyi ka ƒula lɛgadi lɛmmɔ ƒui linye kpakplaa lite ala bɔbla siin ku litemi bɔtɛ na ulu lɛlɔ.

¹⁵ Lɛlɔ lɛdubɔyɔ bekyuli bani nánu-ɔ báti lɛni na beedie lɛnu teemwi-ɔ O Unwoti, ɔsika kalɛ na eekeye na bula akɔ mɔɔyá baanu teesie.

¹⁶ Baakɛ́ lɛlɔyɔ na awɔ ɔsu na beemwi-ɔ na ƒula lɛƒɔndia ɔsu.

¹⁷ Ɔsika awɔ mɔɔyá na beekeye na baakɛ́ ɔyikun. Na ƒula lɛƒɔndia ɔsu na bɔɔdi lɛlɔ.

¹⁸ Awɔ Unwoti Israel Katɔti Kedee ndi bula ɔga ku lɛgyumanala éte-bu.

¹⁹ Kuuku ni, édie átina ƒula kabla ɔblane na kɔyu kemmo na ásu anini, “Liti ɔyikun líte ukpone ɔdi. Na lɛ́ƒuna-nwu lɛ́siku bina akɔ na líse-nwu likpo ka ɔdi lɛga.

²⁰ Lɛ́ƒuna mina kabla ɔblane Dawid na líse-nwu likpo ku nnɔmii kedee bɔni na líwi-nwu lili.

²¹ Na ndubo-nwu buteebunku na lɛkya-nwu ɔyikun.

²² Na nwuna ukisine ɔdi uletulo-nwu na ulu ɔdi lɛlɔ. Na balalane badi lɛnɔ baladi-nwu lɛlɔ.

²³ Nwuna bekisine bani ƒui muukpóku-nwu kpakplaa mmɔ ni, ndubo-ma bubo bɔƒiɛmi kalɔ.

²⁴ Ndubɔyɔ-nwu uwi biala na naaalɛ-nwu kama. Na ndubɔya na ɔkɛ ɔyikun na ɔdi nwuna bekisine ƒui lɛlɔ.

²⁵ Ndubɔya na ɔdi kɔlɔ kɔmmɔ lɛlɔ ɔ́si ɛpu ɔmmɔ utédu Euƒrate Ketu.

²⁶ Ɔdubɔkpali-mi na ɔsu ɔnini, ‘Awɔ ndi mina Ati ku Katɔti, ɔni ndi mina lɛtakpɛ lɛni mɔɔyá na mɔɔkɛ́ ngba bɔƒɔ.’

²⁷ Na ndubɔbla-nwu mina ubi ɔnanabi udeedi ɔni ndubɔbla baga ƒui ɔga na kayawi ƒui.

²⁸ Na kenye kani na líse ka ndubo-nwu butaayɔ uwi ndi uwi use úsela uwi ƒui. Na lɛla lɛni na línyimiku-nwu ni, ɔdi ulebile-ni.

²⁹ Na nwuna kaba kemmo ubi ndubo lɛga butaadi uwi ƒui aani kalɛ na kayaa kese késela uwi ƒui.

³⁰ “Nsu si nwuna kaba kemmo bebi béni mina ɔda bubo,

³¹ na balásiaku mina ala bɔtina kama ni,

³² ndubo-ma kɔtu bɔni na bana ekpidi ɔsu.

³³ Nsu lɛɛɛdubo-ma bɔda bɔyɔ bɔya na lɛɛɛdubo mina litemi kama bɔlɛ lɛnɔ kudii.

³⁴ Lɛɛɛdubo bɔta bunye ami ɔlati lɛla lɛni na línyimi lɛlɔ iye lɛvumana lɛla lɛdi na litemi lɛni na ami ɔlati lɛ́su líse mmɔ kemmo kudii.

³⁵ Ka nse kedee ɔsu ni, líse kenye ka naaakana Dawid bɔtɔlɔ.

³⁶ Na nwuna kaba kemmo bebi lɛgadi lɛdubuse úsela uwi ƒui. Na kalɛ kani na ɔƒɛ ɔɔtu ni, lɛni kani na nwuna lɛga kadikɔ kammɔ kadubunye na mina anumi.

³⁷ Na kadubuse aani kalɛ kani na kɔbuli kɔɔtu na kayaa.”

³⁸ Nsu ɔƒɛni ni, Unwoti Katɔti, éti kɔnyi geen ákya ɔga ɔni na awɔ ɔlati áƒuna na éni-nwu.

³⁹ Ébile lɛla lɛni na ényimiku-nwu na átu-nwu lɛga lɛmmɔ na ɔsɔ uuubo ɔyikun ɔdi na ƒula anumi.

⁴⁰ Na áƒɛ ɔban awodu ani náka ámana ɔ́ma ɔmmɔ ku nwuna kagyumanakɔ ƒui éwi kalɔ kpɛtɛ kpɛtɛ.

⁴¹ Na belusiene bani mɔɔsia mmɔ taavi béyu ala lidu lidu bátɔlɔku. Na ntɛ mmɔ bekyuli bammɔ baamá-nwu.

⁴² Áya na nwuna bekisine mmomu enu náta katɔ na lɛlɔ lɛɛyɔ́-ma

⁴³ Áya na nwuna ekpola ƒui énwini kekuma na útakana na unye ɔsiaku nwuna bekisine.

⁴⁴ Ékpeli-nwu ɔgagyii áƒɔ na édi-nwu ébo nwuna lɛgaboku lɛlɔ.

⁴⁵ Áya na ɔ́bi lɛlɔ kɔnakunwi na ɔ́yila nwuna lɛkloƒu bɔdia na kɔƒa kuukpó-nwu.

⁴⁶ O Unwoti, uwi ɛlɛ na adubudie-mi atu atálɛ na aya na ƒula kɔnyi kutaakɔ katɔ na bula lɛlɔ lɛni aani kalɛ na ogya ɔɔda taakyula ala?

⁴⁷ O Unwoti, kali nu ka mina ngba emeyi étedu ku lɛla na mmomu édie-bu na bɔdi bayawine ku ɔlɔna ɔni muukpi.

⁴⁸ Lɛla lɛdi lilélie ngba uwi ƒui na lilekpi. Lɛni kani na ukyuli ɔdi uuubo na ɔdubɔkana na udie nwuna lɛlɔ na kukpi kulébo-nwu lɛkpu kulakya kaƒiɔtɔ.

⁴⁹ Unwoti, wɛ na bɔyɔ bɔni na aayɔ́-bu uwi ndi uwi ɔ́si kukuuku mmɔ bɔ́vi? Bɔyɔ bɔni kenye na ése Dawid ka alálɛ ƒula litemi kama mmɔ nɔɔ?

⁵⁰ O Unwoti, kali nu kalɛ na baamá ƒula kabla ɔblane ku edumi ani udu na baakpila-mi.

⁵¹ Ƒula bekisine beedumi-mi kesi kesii na nkɛ, Ami ƒula kabla ɔblane ɔni ndi ɔga ɔni na áƒuna.

⁵² Bete Unwoti Katɔti kusɛ kusɛ ubo-nwu kemmo lɛni. Na ɔsia lɛni.