Kɔgya 88 - Katɔti Ɔku Kedee

¹ O Unwoti Katɔti ɔni mɔɔƒɔ́-mi ngba, ƒula anumi na muunye taakpali usien ku ɔƒɛ.

² Ya na mina kɔvanu kudu-ɔ kudɔ na enu lɛla lɛni na muuvele-ɔ.

³ Ɔsika ala eekpóku-mi ɔni na mina ngba bɔ́sɔ bútagyunku kekpine.

⁴ Na baaká-mi taakya bani ngba néedu kaƒiɔtɔ kɔtu akɔ, ɔsika ɔyikun ɔdi ɔsɔ uuubo-mi lɛlɔ kemmo.

⁵ Na nse aani ukyuli ɔni na bédie atu ka úkpi na ubunku bani na bádu-ma béwi kaƒiɔtɔ kemmo. Na áyiƒala-mi na asɔ elébunku-mi.

⁶ Éti-mi ákya kalɔ kemmo kesii kani nse suu na kágyu voo mmɔ.

⁷ Éti kɔnyi ákya-mi kpakplaa aani kalɛ na ketu keeyi teeƒie ukyuli.

⁸ Na áya mina bakpana bágyunku-mi na bédie-mi atu lɛnɔ. Na línwini liƒu lɛla lɛni bébo lɛkpu na kekelikɔ kadi keeebo-mi.

⁹ Mina bɔnu buse-mi ƒluƒlu na kalɛ na ɔƒɛ ɔɔdá-mi ɔsu. Na enu kani na lɛ́kɔliku katɔ nnye mɔɔkpali-ɔ uwi ndi uwi.

¹⁰ Bekpine na adubo ƒula akɔla ala budie bɔtina? Munuu bekpine bammɔ ndubo bɔta na bemwi-ɔ?

¹¹ Na kalɛ na aayɔ́-bu uwi ndi uwi ni, bekpine bammɔ ndubo-ɔ kudu bubo munuu kesii kani na ngba bɔdi bɔsɔ buuubo mmɔ na badubo bɔsu kalɛ na aasia ƒula litemi kama siin?

¹² Bamanvine bammɔ ndubo ƒula akɔla ala budie taatina bɔnu bɔti? Munuu ama bani na báyiƒala na kasuudikɔ mmɔ ndubo bɔsu kalɛ na aaƒɔ́ bekyuli ngba?

¹³ Nsu ni, Unwoti, mɔɔkpali-ɔ teevele ɔtanta biala ka ebunku-mi.

¹⁴ O Unwoti, bi ɔsu na éni-mi na ábɛla-mi ƒula anumi lɛni?

¹⁵ Ɔ́si-mi lɛnamu uwi ƒui na ala eekpóku-mi na ukpiwi muedi néedu-mi. Ƒula kɔnyi kɔɔda-mi liƒu na lɛ́yii udu.

¹⁶ Ƒula livoƒi lɛ́ka-mi lɛ́kya. Na kɔtu kɔni na aaní-mi kɔdaku-mi bɔyila ku udu.

¹⁷ Ala amɛni náka ámana-mi limeyi ndi limeyi na lɛƒɛnyi ƒui na adubo ebetiku-mi aani kalɛ na ketu kani néyi keeti ukyuli.

¹⁸ Áya na mina bakpana ku bayɔne ƒui bédie-mi atu. Na ami ku kadi suu mɔɔdi kɔkpana.