Kɔgya 86 - Katɔti Ɔku Kedee

¹ Unwoti, buvele se atu na enu mina bɔkpali, ɔsika kɔwaba kɔda-mi na naaakana lɛla lɛdi bɔbla bute lɛlɔ.

² Gyumana-mi na aƒɔ-mi ngba, ɔsika awɔ ndi mina Katɔti ɔni lɛlɔ na mina anu asia na nsiaku kama siin ƒula kabla ɔblane kalɛ.

³ Nu-mi kɔnyana, ɔsika awɔ na muuwulo taakpali uwi ndi uwi.

⁴ Ya-mi lɛkɛ lɛlɔyɔ, ɔsika ƒula kabla na mɔɔbla na mɔɔkpali-ɔ ku mina kayi ƒui.

⁵ Aabla-bu lɛƒɔndia, na eeti ekpidi taakyiɛ na bani ƒui mɔɔkpali-ɔ ni, aayɔ́-ma uwi ndi uwi geen.

⁶ Unwoti, buvele se atu na enu kalɛ na mɔɔkpali-ɔ ku keku nnii bunku-mi.

⁷ Ɔsika uwi biala na ala eekpóku-mi ni, awɔ na mɔɔkpali na eebunku-mi.

⁸ Beleti baƒiɔ badi balákɔku-ɔ, ɔsika awɔ kani mɔɔkana na aabla akɔla ala budie taatina. Ɔsika ɔdi ulákana ala enengudi ani na aabla bɔbla.

⁹ Kadi bekyuli bani ƒui na édie badubo babalɛ akɔnkɔ kalɔ bakpa-a batina kalɛ na eekeye.

¹⁰ Ɔsika awɔ lɛti kani ndi Katɔti na ébomo na aabla akɔla ala budie taatina.

¹¹ Unwoti, tina-mi ƒula ulu geen ɔmmɔ na lɛsia-nwu lɛlɔ, kalɛ na naaalɛ-ɔ kama. Na aya na ntaayɔ-ɔ geen ku mina kayi ƒui.

¹² Ndubɔgya-a enu ku mina kayi ƒui na nteemwi-ɔ lɛnyi lɛni muukeye uwi ƒui.

¹³ Ɔsika aayɔ́-mi geen na édie-mi na ntekpi.

¹⁴ O Katɔti, bekyuli bani mɔɔkun lɛmɛnɛ ku balalane bani naaanu ukyuli kɔnyana badubo bebekpoku-mi na badu-mi.

¹⁵ Nsu awɔ ni, Katɔti ɔni mɔɔnu kɔnyana na aayɔ́-bu geen na adi. Eléti kɔnyi buti buti mmomu aayɔ́-bu uwi ndi uwi na alalɛ ƒula litemi kama lɛnɔ.

¹⁶ Nwini nu-mi na anu-mi kɔnyana ƒula kabla ɔblane kalɛ. Na ete-mi ɔyikun na aƒɔ-mi aani ƒula kabla ɔblane ubidi.

¹⁷ Bla lɛla lɛdi te-mi na bekyuli banu. Na si mina bekisine bánu na kɔƒa kukpo-ma. Ɔsika badubɔnu ka ébunku-mi na áyala-mi kaƒɔ.