Kɔgya 85 - Katɔti Ɔku Kedee

¹ Unwoti, ábla-bu lɛƒɔndia na ánu abu Yakob kaba bebi bani ndi kalɔ kamɛni bekyuli kɔnyana. Na ala ásɔ atɛnku-bu.

² Éti ƒula bekyuli ekpidi ákyiɛ-ma na ásɔ elényimo-nya.

³ Áya na ƒula kɔnyi kenye kékulo na kaƒɔ kába-a.

⁴ O Katɔti, awɔ ndi bula ngba bɔƒɔ. Buuvele-ɔ ka ada-bu kɔnyi buti bɔkya aya na asɔku-bu eboku bula uwi ɔbuni kemmo.

⁵ Munuu adubuti kɔnyi akya-bu uwi ƒui, na kɔnyi kɔmmɔ kɔvi bula kaba bekyuli ƒui lɛlɔ?

⁶ Aaadubo ngba bɔwɔdi bɔsɔku bute-bu na ƒula kadi bekyuli basɔ bakɛ lɛlɔyɔ na ƒula lɛlɔ?

⁷ O Katɔti, tina-bu kalɛ na aayɔ́-bu uwi biala na aƒɔ-bu ngba.

⁸ Ndubuse atu na linu lɛla lɛni na Unwoti Katɔti ubo na wasu-mi. Ɔsika ɔ́su úse ka ɔdubute nwuna kadi bekyuli keyi buɛɛ si bátasɔ bétenwini bétesie bana kɔdɔlɔ ngba bulie kemmo.

⁹ Geen ni, unye ka ɔƒɔ bekyuli bani ƒui mɔɔkpá-nwu kalɛ na ukeye na bula akɔ na kalɔ lɛlɔ mɛni.

¹⁰ Nwuna bɔyɔ bɔni neeebo kawɔkɔ ku kalɛ na ulalɛ nwuna litemi kama uwi ɔdi ɔdubɔsala ɔbla unwi. Na kalɛ na Unwoti ɔɔbla ala siin na uute keyi buɛɛ lɛnɔ ɔdubɔkya lɛlɔ kɔgbu.

¹¹ Na ɔmɛni ɔdubɔya na bekyuli basiaku Unwoti etemila kama siin na kalɔ lɛlɔ na Unwoti ɔbla ala siin ute bekyuli ɔ́siku nwuna keliekɔ na katɔ mmɔ.

¹² Sɔsɔ na ɔdi ka Katɔti ɔdubute-bu ala abuni na ɔya na kalɔ kammɔ kadia edula pii kete-bu.

¹³ Ala bɔbla siin ndi bukeye bɔni ntɔ Katɔti anumi na nwuna kavinkɔ ƒui.