Kɔgya 84 - Katɔti Ɔku Kedee

¹ O Katɔti Ɔyikune Ƒui, ƒula kakpakɔ kaadia bɔnu geen.

² Na mɔɔwia geen ka lɛkya ƒula kaduli mmɔ. Na muudie ebiti lɛnu ku mina kayi ƒui teete awɔ Katɔti ɔni nli ngba uwi ƒui.

³ O kadi ƒui Unwoti, mina Ɔga ku Katɔti, baasɛ wɛlɛ wɛlɛ muedi bebo kakyakɔ ku ayu ani kemmo na baatɛ na ede ƒula akpabi kesii kani na baatumini bana bebi.

⁴ Adubɔya na lɛlɔ lɛyɔ bekyuli bani nli ƒula kakpakɔ na beedie lɛnu teemwi-ɔ uwi ndi uwi.

⁵ Lɛlɔ lɛdubɔyɔ bekyuli bani mɔɔƒɔ́ bana ɔyikun taasiku-ɔ kudɔ na baawia na bana kayi kemmo geen ka besie ƒula kakpakɔ.

⁶ Na ɔni bakɛ Baka Obonka ɔmmɔ kemmo bésela ni, abiɔ álɛ. Na ɔnantu udeedi ɔni mɔɔna únye ekpo ekpo ɔ́bla egyu.

⁷ Na baakɛ́ ɔyikun teebu limeyi ndi limeyi. Na badubɔnu benwoti ƒui Unwoti ɔni ndi Katɔti na Sion Kɔbi lɛlɔ.

⁸ O Unwoti Ɔyikune Ƒui, ɔni na bula nana Yakob ɔ́kpa, muuvele-ɔ, kywɛ-mi atu na enu-mi bɔkpali.

⁹ O Katɔti, awɔ ɔni mɔɔgyumana-bu, nwini nu ami ƒula ukyuli ɔƒunadi na aƒɛnimi anumi akya-mi.

¹⁰ Ɔsika ƒula kudɔ bulie limeyi linwi na ƒula kakpakɔ ɔdia utulo ka ukyuli ulie kesii bamba emeyi apim unwi. Na ndubɔyɔ ka lɛbla Katɔti kayakun kenye unyene litulo ka liduo lilie ɔlalane ɔdi kevo kemmo.

¹¹ Ɔsika Unwoti Katɔti uukeye aani ɔƒɛ na anwu mɔɔgyumana-bu. Anwuɔsu na uute-bu kusɛ kusɛ na ɔɔbla-bu lɛƒɔndia na ɔɔyá na bɔɔƒɔ́ lɛnyi na ulaya na bekyuli bani nse siin baayaki lɛla lɛbuni lɛdi uwi ɔdi.

¹² O Unwoti Ɔyikune Ƒui, ukyuli ɔni mbo lɛnunsia na ƒula lɛlɔ ni, anwu na lɛlɔ lɛdubo bɔyɔ.