Kɔgya 81 - Katɔti Ɔku Kedee

¹ Bidie lɛnu bimwi Katɔti, ɔni na bula nana Yakob ɔ́kpa. Ɔsika anwu mɔɔyá na bɔɔkɛ́ ɔyikun.

² Bina adi akɔ katɔ. Na bɛgya bina lɛbentaa ku agyala lidu ƒui momoomo bite Katɔti.

³ Bɛvwi lise na bɛdi limeyi ka kɔbuli kɔwɔdi kɔ́lɛ. Na bɛbla lɛni kani si kɔbuli kúdi libi.

⁴ Ɔsika Katɔti nébo ɔda ɔmɛni úte Israel kadi bekyuli na ɔdi lɛla lɛni na ɔlɛka Yakob kaba bebi basia anu na bataabla.

⁵ Ɔdi ɔda bubo úte Yoseƒ kadi bekyuli uwi ɔni na ɔ́kpanku-ma ɔ́lɛku Egyipteƒuɔ kalɔ lɛlɔ. Na línu na lɛdi bamba kemmo ka baasu banini,

⁶ “Lɛ́ya na etila átimi-mii lɛlɔ na bina enu ánwuna ásiku kabla kpakplaa kani na bítaabla kemmo.

⁷ Ka biibó abi na bɛ́kpali-mi ni, línu líte-mii na lɛ́si kesii kani nábɛ-mii na liƒlukutu ku katɔ budu kemmo na líbo ḿbedie-mii. Na lɛ́kɔku-mii lɛ́nu na Meriba kesii kani na ntu bɔ́lɛ.

⁸ “O mina kadi bekyuli Israelƒuɔ, binu mina bɔlɛ. O Israel kadi bekyuli, mɔɔyɔ́ ka binu-mi litemi.

⁹ Bitetétiku baƒiɔ badi bitasiku kesii kadi betebese lɛlɔ bɛnii bitaakpa.

¹⁰ Ami ndi bina Unwoti Katɔti ɔni nákpanku-mii ɔ́siku Egyipte kalɔ lɛlɔ. Ndubɔya na bimo ku ala abuni ƒui si bɛ́nyonu lɛlɔ ƒui bíte-mi.

¹¹ “Nsu mina kadi bekyuli béni ɔmɛni na balaƒɔ-mi litemi na badi-ni lɛlɔ.

¹² Ɔmmɔ ɔsu lídie-ma atu na baabla bana likyulikpi ala ani baayɔ́.

¹³ “Na si bunu na amii Israel bekyuli bínu-mi litemi na bɛbla bɛsiaku-ni lɛlɔ ni, nka ɔdia.

¹⁴ Na ndububoku bina bekisine kalɔ na uwi klukui kemmo na lɛni-ma kɔtu.

¹⁵ Na bani muukisi-mi ƒui badubɔkya lili kalɔ bete-mi na bataayia-mi na bana kɔtu bɔni lɛnɔ buse bute-ma uwi ƒui.

¹⁶ Nsu amii ni, ndubute-mii adila ani ndia ntulo ƒui ku alakpi akɔ uwɔ na bɛdi bimo.”