Kɔgya 79 - Katɔti Ɔku Kedee

¹ O Katɔti, kadi bamba bekyuli bébo bébeduo ƒula kalɔ kemmo. Na bébile ƒula kakpakɔ kedee kammɔ ekisila na bábwɛ Yerusalem ɔma.

² Na báda ƒula kadi bekyuli ɔlɔna béwi na begbini ku beƒiebuo bamba lɛnɔ baaduli teebweli.

³ Na bana ubugya ɔni na beewiakun aani ntu mmɔ ɔ́ƒɔ Yerusalem ɔma ku amadɔ mmɔ ƒui. Na ɔdi ɔsɔ uuubo na ɔva bekpine bammɔ.

⁴ Ɔmmɔ ɔsu kadi bamba bekyuli bani na bula amadɔ ƒui balánu-bu taakya lɛla lɛdi kemmo na beedumi-bu na baamá-bu.

⁵ O Unwoti, adubuti kɔnyi akya-bu ƒui na ɔ́sa? Na eteekpo-bu lɛlɔ kogyulo lɛni?

⁶ Ya na ƒula kɔnyi kunwini kusie kadi bamba bekyuli bani naagyi-ɔ ku baga bani naaakpali-ɔ lɛnyi lɛlɔ.

⁷ Ɔsika bádu ƒula kadi bekyuli na báyila kalɔ kammɔ udu.

⁸ Teti bula bati kuuku ekpidi tani-bu kɔtu. Mmomu bo pla na abanu-bu kɔnyana, ɔsika bɔsɔ buuubo lɛnunsia lɛdi na bɔɔɔgyi lɛla lɛni na bɔbla.

⁹ O Katɔti, bula Ɔƒɔne, bunku-bu. Die-bu ɔgbankpi kemmo. Na eti bula bɔƒiɔ ƒui akyiɛ-bu na ƒula lɛnyi likeye.

¹⁰ Bi ɔsu na kadi bamba bekyuli beeye-bu banini, “Wɛ na bina Katɔti ɔkya?” Buuvele-ɔ bɔnii die-ma kasi na kalɛ na béwi ƒula kadi bekyuli ubugya kalɔ kalala kemmo kenye na abu ku bekyuli ƒui bɔnu.

¹¹ Nu batɔntɛne edumo. Na edie bani na báadu-ma kukpi kɔtɔ na ɔgbankpi ɔmmɔ kemmo ɔkɛnku ƒula ɔyikun bonwu ɔni na ebo lɛlɔ.

¹² Unwoti, die kadi bekyuli bamɛni kasi akpa maatɛ na kalɛ na beedumi-ɔ kenye.

¹³ Na abu ƒula kadi bekyuli bani nse aani ƒula baƒonu na kadikɔ ni, bɔdubɔgya-a enu uwi ndi uwi ɔ́si kaba úsie kaba.