Kɔgya 78 - Katɔti Ɔku Kedee

¹ Bise atu na binu ala ani mɔɔtina-mii, bula kadi bekyuli.

² Agba kemmo na ndubuti lidie ala abɛdi ani nébo ábavi kalɔ lite-mii.

³ Ala ammɔ adi ala ani na bínu na bɔgyi lɛnɔ. Na adi ala ani na bula bati básu-bu.

⁴ Bɔɔɔdubo-nya buti bɔbɛla bana bebi. Mmomu bɔdubudie Katɔti ablala ani muukeye ku kalɛ na ubo ɔyikun keyi bute kaba kemmo bebi bani ndubo. Na bɔsu-ma akɔla ala budie taatina ani na ɔ́bla.

⁵ Úti ɔda bubo úte Yakob kaba kemmo bebi Israel bekyuli. Na ɔ́su bula bati kuuku ɔnii beti batina bana bebi.

⁶ Ɔmmɔ ɔdubɔya na kaba biala bebi bani mebo na bátawɔ-ma tɔ lɛnɔ bati ɔda bubo bɔmmɔ. Na si ama lɛnɔ bábi lɛlɔ ni, na beti batina bana bebi bani na badubo bɔwɔ.

⁷ Si bábla ɔmɛni ni, badubuti bana anu ƒui basia Katɔti lɛlɔ na balayiƒala ala ani na ɔ́bla, mmomu na badi nwuna ɔda bubo lɛlɔ kaduɛ.

⁸ Baaadubo buse aani bana bati bani náta bénye Katɔti lɛlɔ. Ama bábla atuɔkplu ɔsu na bénwini kaba kani nátadi Katɔti ɔda bubo lɛlɔ. Bana kayi kátasia Katɔti lɛlɔ uwi ndi uwi. Na bátadi nwuna etemila lɛlɔ lɛnɔ.

⁹ Eƒraim kadi bekpone bátu akpagya báwɔlɔ na bada bana kɔtaminta ku atula, nsu bénwini kama na békeli kekpo na bana bekisine kudɔ.

¹⁰ Bátadi lɛla lɛni na Katɔti únyimiku-ma lɛlɔ. Na bétenu kalɔ ka basia ulu ɔni na Katɔti ɔda bubo bɔ́tina-ma lɛlɔ.

¹¹ Ala ani na Katɔti ɔ́bla ku nwuna akɔla ala budie taatina ni, báyiƒala-nya.

¹² Nsu bana bati kuuku anumi geen na Katɔti ɔ́bla akɔla ala budie taatina amɛni na Saan kalɛkɛ lɛlɔ na Egyipte kalɔ kemmo.

¹³ Úle ɛpu ɔmmɔ kemmo na ɔ́ya nwuna bekyuli básia bálɛ uwi ɔni na ntu bɔmmɔ bunye aani kɔbi na ɔvi ɔni ku ɔni.

¹⁴ Kadi nwaa ni, ɔ́ya na ulɔyɔ lisu bonwu lɛ́tɔnku-ma. Na usien ni, ogya unyemi bukeye bonwu bɔdi nátɔnku-ma.

¹⁵ Ɔ́ya na ntu bɔ́bwɛ bɔlɛ atakpɛ kemmo na kalɔ kakwiidi kemmo mmɔ na báni na údu-ma ɔkwɛ aani si abiɔ na adi.

¹⁶ Ɔ́ya na ntukpa bɔ́lɛ bɔ́si atakpɛ kemmo na bɔɔgbá aani ketu geen.

¹⁷ Nsu ɔmmɔ ƒui kama ni, bɔƒiɔ kani na báƒiɔ Katɔti bébu. Na báta bénye Katɔti Ɔyikune ƒui lɛlɔ na kalɔ kakwiidi kemmo mmɔ.

¹⁸ Békpoku Katɔti lilu pii lɛlɔ na béye-nwu banii ute-ma adila ani na ama baayɔ́.

¹⁹ Bátɛmi enyenkpi bákya Katɔti na béye muedi banini, “Katɔti ɔdubɔkana na ute-bu adila na bɔdi na kalɔ kakwiidi kemmo mɛni?”

²⁰ Nsu sɔsɔ ni, ɔ́ya na báƒiɛmi lɛtakpɛ ugyii na ntu bɔɔtu taalɛ na bɔɔgbá aani ketu. Ɔmɛni ƒui kama ni, básɔ béye banini, “Na adila nɔɔ? Ɔdubɔkana-bu adi bute ku lɛna?”

²¹ Ala amɛni ƒui áya na livo líƒi Katɔti ka únu-nya. Anwuɔsu ɔ́ya na ogya úbo úbakyula-ma na katɔ kani na nwuna kɔnyi kɔɔkɔ́ teebu na bana lɛlɔ.

²² Na ɔmɛni úbo lɛni, ɔsika bátaƒɔ-nwu bátadi na béteti kayi bátasia-nwu lɛlɔ lɛnɔ ka ɔdubɔkana na ɔƒɔ-ma ɔsu.

²³ Nsu ɔmmɔ ƒui ni, Katɔti údie lɛdi na kayaa kálɛmi aani kayakun kalɛ.

²⁴ Na úte-ma manna na bádi. Na manna ɔmɛni ɔdi katɔ adila ani na Katɔti ɔ́ya na ána aani ɔnantu úte-ma.

²⁵ Ɔmɛni ɔsu ni, Katɔti batu adila na Katɔti úmene-ma pii na bádi bemo.

²⁶ Ɔkɛnku nwuna ɔyikun lɛlɔ ni, ɔ́ya na ɔƒɛƒɛɛ ɔ́si katɔ na úkpo ɔ́si ɔƒɛ katukɔ ku kada kakɛ.

²⁷ Na ɔ́ya na baasɛ yuu badi aani ɔtumu kalɛ ɔ́na úbewi kalɔ aani ɛpu kɔnwinimi.

²⁸ Na baasɛ bammɔ báyu na bana kɔduli geen na kesii kani báda keliekɔ na beli mmɔ.

²⁹ Bádi adila ammɔ na bémo, ɔsika lɛla lɛni geen na baawia na ɔ́bla úte-ma.

³⁰ Nsu uwi ɔni na bamu beli baadi adila ani báwia kpakplaa mmɔ ni,

³¹ Katɔti úti kɔnyi ɔ́kya-ma geen na ɔ́ya bádu bana bakloƒu bayikune.

³² Na ala amɛni ƒui kama ni, katɔ kani na alaekpidi ani baabla aakɔ́ teebu. Na akɔla ala budie taatina ani baanu ka Katɔti ɔɔbla ƒui átaya na baƒɔ-nwu badi.

³³ Ɔmmɔ ɔsu na ɔ́ya na ɔgbankpi úbo-ma lɛlɔ na bana ngba bɔ́da liku na búbo kawɔlɔkɔ kɔnakunwi.

³⁴ Na uwi biala na ɔ́ya na badi békpi lɛni ni, bakladi baata ku usi na babawia-nwu kama ulu, Na benwini bebo-nwu kudɔ ku bana kayi ƒui.

³⁵ Bényimo ka Katɔti ndi bana katamikukɔ lɛtakpɛ. Na Katɔti Ɔni Ntulo Ƒui ndi bana Ɔƒɔne.

³⁶ Nsu baabla kenyemini uwi ndi uwi taanyi ɔkɔ taatɔlɔ Katɔti.

³⁷ Balásiaku-nwu kama siin uwi ndi uwi na badi nwuna bunyimi lɛlɔ.

³⁸ Ina amu ni, ɔ́nu-ma kɔnyana na úti bana alaekpidi ɔ́kyiɛ-ma na útayila bana ƒui udu. Katɔti uuƒie nwuna kɔnyi kenye pla pla na ulábla ala teetédu kalɛ na úti kɔnyi kenye.

³⁹ Katɔti ɔ́kali ɔ́nu ka bekyuli keeke kani na bayawine badi na bana uwi use aani ɔƒɛƒɛɛ ɔni muukpó taabavi mɔɔnwuna taavi na ɔsɔ ulenwini teebo.

⁴⁰ Bekyuli bamɛni báta bénye-nwu lɛlɔ kɔlɛ kɔlɛ na kalɔ kakwiidi kemmo mmɔ, na báya na kayi kaakpulu-nwu geen.

⁴¹ Bákɔku-nwu bánu kɔlɛ kɔlɛ na bákya anwu Israel Katɔti ɔni nse kedee ƒui kɔnyi.

⁴² Bétenyimo Katɔti ɔyikun ɔni na ubo lɛlɔ iye limeyi lɛni na údie-ma ɔ́lɛku bana bekisine enu kemmo lɛlɔ.

⁴³ Na bétenyimo akɔla ala budie taatina ani na ɔ́bla na Saan kalɛkɛ lɛlɔ na Egyipte kalɔ kemmo.

⁴⁴ Ɔ́ya na bana ntukpa búnwini ubugya ɔni na ntu bɔmmɔ bɔsɔ buládia bɔni.

⁴⁵ Ɔ́ya na kubweyi kɔni muuveyi lidu pii bébekpoku-ma geen ku bapɔtɔlɔ na bébile-ma ala.

⁴⁶ Na úte kuƒi na baalɔlɔ ku kubweyi kɔni muubile edula bébebile bana edula ƒui.

⁴⁷ Ɔ́ya na etubankɛ ku ɔnantu ɔ́na abɔ abɔ na úbile bana adingyii mmo ƒui.

⁴⁸ Ɔ́ya na katɔ kábwɛ ogya na etubankɛ ána ébewi bana ɔmantɛ bakɔ ku baƒonu ku bese lɛlɔ na békpi báyii udu.

⁴⁹ Katɔti ɔ́ya nwuna kɔnyi kúbo Egyipte kadi bekyuli lɛlɔ kpakplaa ɔkɛnku nwuna batu bani na údie ulu ka bani bekyuli kɔtu kɔmɛni udu.

⁵⁰ Katɔti útekulo nwuna kɔnyi kenye iye ɔnu-ma kɔnyana kɔdi na ulu biala lɛlɔ. Mmomu ɔ́ya na ɔgbankpi ɔmmɔ úsusu-ma geen útédu ka báyila bana ngba muedi.

⁵¹ Ɔ́ya bana kaƒɔ bebi bananabi bedeedi ƒui békpi na kaduli biala kemmo na Egyipte kalɔ lɛlɔ mmɔ.

⁵² Ɔmmɔ kama ni, Katɔti ɔ́kpanku nwuna kadi bekyuli ɔ́lɛku mmɔ na ɔ́tɔnku-ma aani baƒonu ɔdane kalɛ ɔ́siaku kalɔ kakwiidi kammɔ kemmo.

⁵³ Na ɔ́tɔnku-ma ɔni na lɛla lɛdi lítabla-ma na liƒu lɛdi lɛnɔ lítada-ma. Na bana bekisine ama ni, ɛpu ɔmmɔ ɔ́nyina-ma ƒui.

⁵⁴ Anwuɔsu úti-ma úboku nwuna kalɔ kedee kemmo na kɔbi kɔni lɛlɔ na ɔ́di mmɔ lɛlɔ.

⁵⁵ Ɔ́bɔku kadi bamba bekyuli ɔ́lɛku bana anumi. Na úti bana kɔlɔ ku kuliekɔ úle úte-ma aani bana kadikɔ na bélie mmɔ.

⁵⁶ Nsu ɔmɛni ƒui kama ni, bákɔku Ɔyikune Ƒui bánu na báta bénye-nwu lɛlɔ na bátadi nwuna litemi lɛlɔ.

⁵⁷ Mmomu bálɛ-nwu kama aani bana bati kani na bese aani kataminta kani nélii.

⁵⁸ Ɔsika bákya-nwu kɔnyi geen na baƒiɔ akpabi ani na bátu bényene abi eli ɔsu. Na báya na uukpó kogyulo ka baakpá-ma.

⁵⁹ Na lɛla lɛni na Katɔti ɔ́nu mɛni ɔ́ya na úni nwuna kadi bekyuli Israelƒuɔ kede kede ƒui na kɔnyi kpakplaa kemmo.

⁶⁰ Na ka úni Silo kevo kani kemmo na uli na bula akɔ ni,

⁶¹ Katɔti ɔ́ya na bekisine béti Bunyimi Adaka ɔni muudie nwuna ɔyikun ku kalɛ na uukeye keyi bátɔlɔku.

⁶² Na ɔkɛnku kɔnyi kpakplaa kɔni na úti ɔ́kya-ma mmɔ ɔsu ni, ɔ́ya na bekisine bammɔ bádu nwuna kadi bekyuli baƒunadi bammɔ ku kuwii.

⁶³ Ogya ɔ́kyula bana bakloƒu ɔni na bana belekubi basɔ bátakɛ agya na belie.

⁶⁴ Lɛni kani na bana bakpane lɛnɔ ni, kuwii kenye na békpi ɔni na bétete bana bekpinele kuƒi na bewulo-ma.

⁶⁵ Ɔmmɔ kama ni, Unwoti úbata únye aani kalɛ na ukyuli ɔɔta na kalɛɛkɔ. Na ɔ́bla aani kalɛ na ntɛ bɔɔyá na ɔyikune ɔdi ɔɔta taabla ala.

⁶⁶ Na ɔ́bɔku nwuna bekisine ɔ́lɛku nwuna anumi. Na ɔ́di-ma lɛlɔ na kɔƒa kúkpo-ma uwi ƒui.

⁶⁷ Nsu Yoseƒ kaba kemmo bebi ni, Katɔti úni-ma. Na útaƒuna Eƒraim kaba lɛnɔ.

⁶⁸ Mmomu Yuda kaba na ɔ́ƒuna ku Sion Kɔbi kɔni lɛlɔ mɔɔda-nwu ebiti geen.

⁶⁹ Mmɔ na ɔ́tu nwuna kakpakɔ kede únyene na kákuku aani abi. Na ɔ́tu-ka na kenye kalɔ kpi aani kayawi kamɛni kalɛ. Na kadubunye uwi ƒui.

⁷⁰ Katɔti ɔƒuna Ɔga Dawid ka unwini nwuna kabla ɔblane na ɔda baƒonu lɛlɔ bɔnu ɔya,

⁷¹ na ubataanu Yakob kaba bebi bani ndi Israel nwuna bekyuli baƒunadi lɛlɔ.

⁷² Ɔga Dawid úti nwuna kayi ku ɔyikun ƒui ɔ́tɔnku bekyuli bammɔ ɔ́siaku ulu siin lɛlɔ na lɛnunda ku lɛlati kemmo.