Kɔgya 77 - Katɔti Ɔku Kedee

¹ Líwulo lɛ́kpali Katɔti momoomo kalɛ na ubunku-mi.

² Uwi ɔni na muubó abi ni, lɛ́kpali-nwu. Na usien umodi ƒui lɛ́kɔliku enu katɔ na mɔɔkpali-nwu, na neeete kuƒi kɔdi.

³ Mina kasusu kasia Katɔti lɛlɔ na muudumo taakpali-nwu na mɔɔva momoomo ɔni na mina ɔyikun ɔ́sa na lɛ́bla kpɛtɛ kpɛtɛ.

⁴ Áya na mina anumi ewi usien umodi na naaakana bɔlɛɛ. Na kayi kaakpulu-mi geen ɔni na naaakana na lɛtɛmi muedi.

⁵ Mɔɔkali taanu kuuku uwi akwa akwa ani návi mmɔ ƒui.

⁶ Kasusu kani na muulie teeti usien umodi. Na muuye lɛlɔ ala pii nnini,

⁷ “Buni na Katɔti úni-bu uwi ƒui na kaƒɔ kasɔ kaaadubo-nwu bɔyɔ na bula lɛlɔ?

⁸ Na kalɛ na ɔɔyɔ́-bu uwi ndi uwi mmɔ lɛnɔ kenye kékulo? Munuu nwuna kenye kani na úse lɛnɔ kása?

⁹ Bɔyiƒala na Katɔti ɔ́yiƒala kalɛ na ɔnu-bu kɔnyana na nwuna kɔnyi kɔ́ƒɔ nwuna lɛƒɔndia kenye?

¹⁰ Lɛla lɛni muuduo-mi ƒui ndi ka Katɔti ɔsɔ uuunye uuute-bu.”

¹¹ Ndubɔkali Unwoti ablala lɛnu. Na geen geen ni, ndubunyimo ƒula akɔla budie taatina ani na ábla kuuku uwi ɔmmɔ.

¹² Mina kasusu kadubɔsia ƒula ablala lɛlɔ na nteeduo ala ebendi ani na ábla kemmo taanu.

¹³ Katɔti, ƒula kasiakɔ ƒui kese kedee. Na beleti baƒiɔ badi balákɔku-ɔ.

¹⁴ Katɔti ɔni mɔɔbla akɔla ala budie taatina na adi. Na édie ƒula ɔyikun keyi átina na bekyuli bammɔ bánu.

¹⁵ Na awɔ ɔlati néti ƒula kɔnu na édie abu ƒula kadi bekyuli bani ndi Yakob ku Yoseƒ bebi.

¹⁶ Uwi ɔni na áda álɛ ni, ntu bɔmmɔ bɔ́nwanɛ lɛlɔ ku liƒu útálɛ ligyu kemmo ƒui.

¹⁷ Na ntu bɔɔyu taasi ulɔyɔ ɔni nkya kayaa mmɔ kemmo. Na kayaa keedu na kaabwɛ ogya na uudie atula teesienku lɛƒɛnyi ƒui lɛlɔ.

¹⁸ Kayaa budu bɔmmɔ bɔɔlɛ́ taasi ɔƒɛƒɛɛ kpakplaa ɔni mɔɔkya ligede kemmo. Na kalɛ na kayaa kaabwɛ ogya ni, uukeye teewi kayawi ƒui. Na kalɔ kemodi kaakunku momoomo.

¹⁹ Édie ulu ávinku ɛpu kemmo na ƒula kasiakɔ kakɛ ketu bonwu kammɔ kemmo kalɛ. Nsu ɔmmɔ ƒui ni, ukyuli ɔyawine útanu-ɔ lɛgba kanyakɔ.

²⁰ Áƒuna Mose ku Aaron na bátɔnku ƒula kadi bekyuli aani baƒonu ɔdane kalɛ ɔkɛnku ƒula ɔyikun lɛlɔ.