Kɔgya 71 - Katɔti Ɔku Kedee

¹ Unwoti, awɔ na líkeli ḿbatamiku. Taya na linwini ku kɔƒa uwi ƒui!

² Ka ese siin ɔsu ni, die-mi na enu-mi buvele na aƒɔ-mi.

³ Nwini mina katamikukɔ lɛtakpɛ bonwu lɛni lɛlɔ na ndubukpo kama. Na aƒɔ-mi, ɔsika enye kpakplaa uwi ndi uwi ka aƒɔ-mi.

⁴ O Katɔti, die-mi na balalane ku belikplune ku bani na baládi ƒula ɔda bubo lɛlɔ enu kemmo.

⁵ Ɔsika ɔ́si mina lɛnamu uwi ƒui ni, Unwoti, ƒula lɛlɔ na mina anu asia na líti mina ala ƒui lɛ́kya-a enu kemmo.

⁶ Ɔ́si ɔni na báwɔ-mi ni, ƒula lɛlɔ na lɛ́kada líkpo. Na awɔ nédie-mi álɛku mina uni kaƒɔ kemmo. Na awɔ na ndubo buteemwi uwi ndi uwi.

⁷ Lɛ́ta línwini ukyuli ɔni na bekyuli pii baanu teedie lili nsu awɔ mɔɔgyumana-mi.

⁸ Muumwi-ɔ na mɔɔkɔliku-ɔ katɔ taatina kalɛ na ƒula lɛgadi liikeye.

⁹ Tedie-mi atu si uwi ɔni na lɛ́bi lɛlɔ. Na si mina ɔyikun ɔɔsá ni, tanyonu-mi.

¹⁰ Ɔsika mina lɛlɔ litemi kani na mina bekisine bada uwi ndi uwi. Na baasa lili na mina lɛlɔ ka badu-mi.

¹¹ Na baasu banini, “Katɔti údie-nwu atu, anwuɔsu bɛya bɔbi bɔsiaku-nwu na buƒie-nwu, ɔsika ɔsɔ uuubo ukyuli ɔdi na waƒɔ-nwu.”

¹² O Katɔti, tagyunku-mi, mmomu yile-mi bubebunku.

¹³ Bekyuli bani mɔɔwia-mi babla kalala na badu-mi ni, kɔƒa kukpo-ma na babla susuusu.

¹⁴ Nsu ami ni, ƒula lɛlɔ kani na ndubɔsia anu uwi ndi uwi. Na ndubumwi-ɔ libu ƒui.

¹⁵ Ndubɔka lɛsu bekyuli mina ngba emeyi kemmo ƒui kalɛ na aabla ala siin na aaƒɔ́ bekyuli na lɛƒɔndia lɛmmɔ liiibo lɛkala.

¹⁶ Unwoti Katɔti, ndubumwi-ɔ na ƒula ablala enengudi ɔsu. Na lɛsu bekyuli kalɛ na aabla-bu lɛƒɔndia lɛni udu nsɔ neeebo kesii bamba.

¹⁷ O Katɔti, awɔ mɔɔtina-mi ala ɔ́si lɛnamu uwi ƒui. Na ńtada ƒula akɔla ala budie taatina kudu bubo ńtaya.

¹⁸ Ina lɛ́bi na lili lɛ́ƒuala-mi muedi ni, tedie-mi atu wetédu ka lɛ́ya na kaba bekyuli bani mebo kama báti ɔyikun ala ani na ábla.

¹⁹ Na banu bati kalɛ na ébomo na ese siin aani kalɛ na baanu ka kayaa kébomo kalɛ. Ábla ala ebendi, na ɔdi ɔsɔ uuubo ƒula kalɛ.

²⁰ Aya na líbo abi geen na ala ékpoku-mi, nsu awɔ kani ndubudie-mi na lɛlɛ kesii kani nkya aani ubu kemmo na naaasɔ naaakya mmɔ. Mmomu adubɔya na lɛsɔ lɛlɛ libo mbelie kanwaadikɔ na lɛsɔ lɛkɛ ɔyikun.

²¹ Na adubɔya na lɛsɔ lɛƒɔ lɛnyi litulo kudeedi na ayala-mi kaƒɔ lɛnɔ.

²² O Katɔti, ndubɔgya ɔbentaa limwi-ɔ, ɔsika aabla ala ƒui ulu lɛlɔ. Na lidie bumwi lɛnu lite awɔ, Israel Katɔti Kedee.

²³ Awɔ nédie-mi, anwuɔsu ndububo kudu ku lɛlɔyɔ na lidie ɔnu ku mina kaƒɔ ƒui limwi-ɔ.

²⁴ Na ndubɔsu uwi ndi uwi kalɛ na ese siin na édie-mi ku ƒula ɔyikun. Ɔsika bekyuli bani ƒui nákali ka babla-mi kalala ni, éboku-ma kalɔ na kɔƒa kúkpo-ma.