Kɔgya 62 - Katɔti Ɔku Kedee

¹ Katɔti ƒula anumi kani na nnye mɔɔnu kpoo ka linu lɛla lɛdi. Na mɔɔnu ulu ka aƒɔ-mi.

² Awɔ lɛti ndi mina lɛtakpɛ lɛni lɛlɔ na nkpo kalɛ na lɛkɛ bɔƒɔ. Na awɔ ndi mina katamikukɔ kpakplaa ɔsu ɔdi biala uladi-mi lɛlɔ kudii.

³ Kɔlɛ sɔɔn na amii mina bekisine bɛdubɔta bibekpoku-mi na bɛkya-mi ɔlɛ lɛlɔ, ɔsika nse aani ɔban ɔni nsɔ neeebo ɔkplu iye kowodu kɔni mɔɔnyonu lɛlɔ?

⁴ Baawia ka batu-mi bedie mina kenyekɔ na bayila-mi lɛnyi lɛni na lɛ́ƒɔ. Ɔkɔ bɔnyi bɔɔda-ma kubiti. Na baatɛmi minimini nsu ɔdu ukpidi sɔɔn náƒɔ-ma kayi kemmo.

⁵ Katɔti lɛti pɛ kani ndi mina kakyakɔ. Ami nnye mɔɔnu ulu teete, ɔsika nwuna lɛlɔ na mina anu ƒui asia.

⁶ Anwu lɛti pɛ kani ndi mina lɛtakpɛ lɛni lɛlɔ na líkpo kama ka ɔdubɔƒɔ-mi. Na anwu ndi mina katamikukɔ kpakplaa, anwuɔsu lɛla lɛdi liladi-mi lɛlɔ.

⁷ Katɔti kani ndubudie-mi ɔgbankpi biala kemmo. Na anwu kani mɔɔyá na mɔɔƒɔ́ lɛnyi. Anwu ndi lɛtakpɛ lɛni lɛlɔ na líkpo kama, na ɔdi mina katamikukɔ.

⁸ Amii bekyuli ƒui, biti bina kayi ƒui bɛsia Katɔti lɛlɔ uwi biala. Na biteevele-nwu ala ani ƒui na bɛɛyaki. Ɔsika Katɔti ɔdi katamikukɔ.

⁹ Ukyuli ɔɔɔdi ku lɛla. Na use aani ɔƒɛƒɛɛ ɔni nékpo ɔ́vi kani. Bani mɔɔnu ka bebo kenyekɔ ku bani nkya-ma kalɔ ƒui lɛkooƒo bana ƒui badi. Baakali ka bebo unu si bákɔku-ma bánu. Nsu ɔƒɛƒɛɛ muedi ubo unu utulo-ma.

¹⁰ Bitatɛya ɔdikplu iye bekyuli buyu taakɛ lɛkɛ. Si lɛkɛ lɛɛkɔ́-mii katɔ ni, biteti bina kayi bitasia ɔmmɔ lɛlɔ.

¹¹ Líinu ɔbla kunyɔ ka Katɔti ɔɔsu ɔnini, “Ami Katɔti kani mbo ɔyikun.

¹² Na ami kani mɔɔyɔ́ ukyuli uwi ndi uwi. Na mɔɔƒɔ kayu kani námanku ukyuli biala na nwuna kabla kenye teete-nwu.”