Kɔgya 56 - Katɔti Ɔku Kedee

¹ O Katɔti, nu-mi kɔnyana, ɔsika bekisine basiaku-mi beekpóku-mi geen. Na mina bekisine baanya-mi taakya uwi ndi uwi.

² Básala lɛlɔ otogyi na basiaku-mi beekpóku-mi ƒui.

³ O Unwoti Katɔti, si uwi ɔni na liƒu lítulo-mi muedi ni, ƒula lɛlɔ kani na mina anu asia.

⁴ Katɔti ƒula lɛlɔ na mina anu asia, anwuɔsu na naaayia. Na muumwi-ɔ na ƒula kenye kani na ásu ése ɔsu. Ukyuli ɔyawine ulakana-mi lɛla lɛdi bɔbla.

⁵ Mina bekisine baayɔ́ ka bataada-mi kenye banii lɛ́bla likpidi na beeti-mi lɛlɔ kasusu uwi ndi uwi kalɛ na babla-mi kalala.

⁶ Baasa lili na mina lɛlɔ uwi biala na baabɛ́ taatu-mi kasiakɔ uwi biala kalɛ na bakɛ-mi badu.

⁷ Anwuɔsu ni, taya na bekeli bana kɔtu bɔni na ɔbladu ɔmɛni ɔsu. O Katɔti, sie na átáyila-ma udu na ƒula kɔnyi kemmo.

⁸ Agyi abi ani udu na muubó. Na agyi mina mmii kalɛ na bumomo.

⁹ Na limeyi lɛni na makpali-ɔ ni, na abɔku mina bekisine na badubusie kama. Ɔsika ngyi ka Unwoti unyeku-mi.

¹⁰ Na muumwi-nwu lɛnyi na lɛla lɛni na ɔ́su úse ɔsu.

¹¹ Nwuna lɛlɔ na líkpo kama na naaayia lɛla lɛdi, ɔsika ukyuli ɔdi ulakana-mi lɛla lɛdi bɔbla.

¹² O Katɔti, ala ani na líse kenye ka ndubɔbla lite-ɔ ni, ndubɔnu ka lɛ́bla-nya ƒui na liti mina enugya etela liboku-ɔ.

¹³ Ɔsika awɔ nédie-mi kɔyu ásiku kukpi kemmo. Na ƒula bukeye bɔɔtina-mi kanyankɔ na ƒula anumi na ntagbanta.