Kɔgya 51 - Katɔti Ɔku Kedee

¹ O Katɔti, nu-mi kɔnyana, ɔsika ƒula bɔyɔ bulávumana. Na ƒula kɔnyana pii kɔni na aanu abu bekyuli ɔsu ni, ƒɔ mina ekpidi ƒui die-mi lɛlɔ.

² Kpila-mi kede kede na mina ekpidi ɔsu na lɛlɛ sɛɛn na mina bɔƒiɔ ƒui kudɔ.

³ Ɔsika lɛ́nu mina alaekpidi lɛ́ti. Na ekpidi ammɔ eeduo-mi uwi biala.

⁴ Awɔ kani na lɛ́bla alaekpidi amɛni lɛ́ƒiɔ. Lɛla biala lɛɛtina ka ƒula kenye etemila adi litemi geen. Na aatɛku bekyuli ƒui litemi ulu siin lɛlɔ

⁵ Na sɔsɔ ni, likpidi udu ɔkya-mi lɛlɔ kemmo ɔ́si uwi ɔni na mina uni ɔ́da-mi kaƒɔ. Na mɔɔbla-nya ɔ́si ɔni na ɔ́wɔ-mi.

⁶ Nsu geen ni, aawia ka lɛsiaku litemi geen lɛmmɔ kama uwi biala. Anwuɔsu ti ƒula lɛnunda lɛni kemmo nágyu mmɔ te-mi.

⁷ Kpila-mi na edie ekpidi ƒui mina lɛlɔ sɛɛn na nteekeye teetulo etubankɛ.

⁸ Na kalɛ na áƒɛ-mi na nwi kalɔ ni, na asɔ atala-mi enyene ku lɛlɔyɔ.

⁹ Veli mina alaekpidi ƒui die-mi lɛlɔ na edie-nya atu.

¹⁰ Katɔti, bla-mi ukyuli ɔwɔdi na linye kpakplaa uwi ndi uwi na ntaabla ala siin.

¹¹ Tabɔku-mi tatɔlɔku na ƒula anumi. Na taya na ƒula Kɔyu ɔyikun ɔlɛ-mi lɛlɔ kemmo.

¹² Mmomu na asɔku mina ngba bɔƒɔ lɛlɔyɔ lɛni na éte-mi mmɔ akya-mi lɛlɔ kemmo. Na aya na lɛkana bunye kpakplaa na ntaadi ƒula litemi lɛlɔ.

¹³ Ndubɔtina alaekpidi bablane ƒula lilu kalɛ na basɔ benwini bebo-ɔ kudɔ.

¹⁴ O Katɔti, die-mi na ubugya kalɔ buwi lɛtuni kemmo. Na ndubɔsu kalɛ na aaƒɔ́ bekyuli ngba.

¹⁵ O Katɔti, ya libimi kenye na lɛtu lɛnu limwi-ɔ na bekyuli akɔ.

¹⁶ Ɔsika ɔɔɔdi akpala na aawia nka ndubuti adi liboku-ɔ. Na ala ani bɔɔkyula teete-ɔ lɛnɔ alaƒɔ-ɔ anu.

¹⁷ Mmomu akpala ani mɔɔƒɔ́-ɔ anu ndi ka ukyuli ekpidi eduo-nwu geen na nwuna kayi kemmo, na eleni ɔmɛni.

¹⁸ O Katɔti, ya na kaƒɔ kayɔ-ɔ na abla Sion lɛƒɔndia na asɔku Yerusalem ɔma ɔmmɔ awodu atu.

¹⁹ Na ɔmmɔ kama akpala siin ani na bɔdubɔkyula bute-ɔ ƒui adubɔda-a ebiti. Na bɔdubuti ɔmantɛ bakɔ bakɔdi bɔkpa bute-ɔ na ƒula lɛkpabi lɛlɔ.