Kɔgya 50 - Katɔti Ɔku Kedee

¹ Katɔti Ɔyikune Ƒui ɔni ndi Unwoti mɔɔlɔ lɛla biala lɛni nkya kayawi ƒui ɔ́si ɔƒɛ katukɔ útédu kanukɔ ɔnii babasala na benu.

² Katɔti uukeye taasiku Sion ɔma unengudi ɔni ndia ntulo ƒui mmɔ kemmo.

³ Bula Katɔti ɔdubo ubabla lɛla lɛdi na ɔɔɔdubo buse buɛɛ. Ɔkɛ ku kudu ku ogya ku ɔƒɛƒɛɛ kpakplaa na ɔɔka taamana-nwu.

⁴ Údie lɛdi na ɔ́lɔ katɔ ku kalɔ ala ƒui ka bebo na ɔtɛku nwuna bekyuli litemi.

⁵ Na ɔ́su ɔnini, “Bɛsala mina bekyuli bani mɔɔbla ala ulu lɛlɔ bite-mi. Bákyula akpala béte-mi na búnyimi bunyimi bɔdi.”

⁶ Kayaa ƒui ala aatina kalɛ na Katɔti use siin. Ɔsika anwu ɔlati ndi litemi ɔtɛne ɔmmɔ.

⁷ Mina kadi bekyuli Israelƒuɔ, binu. Ami ndi Katɔti bina Unwoti na ndubo-mii litemi bɔtɛku na lidie bina ala ani bɛ́bla bɛ́ƒiɔ ƒui lɛtina.

⁸ Naaadɔnku-mii na bina etela ku akpala ani bɛɛkyula uwi ndi uwi na mina anumi ɔsu.

⁹ Na naaawia nnii biƒie ɔmantɛ akɔ ɔkɔdi ɔdi iye betukpa bɛsiku bina ayu kemmo biboku-mi.

¹⁰ Ɔsika lɛku kemmo kebweyi biala kadi ami ɔdi. Na bakɔ bani na nkya abi mpim mpim lɛlɔ ƒui badi ami badi.

¹¹ Ngyi baasɛ lidu lidu bani nkya abi lɛlɔ mmɔ ƒui ku beƒiebuo bammɔ ƒui bumomo. Na beƒiebuo bammɔ ƒui ni, ami mbo-ma.

¹² Si kɔka kɔɔda-mi ni, ɔɔɔdi amii na ndubuye lɛdila. Ɔsika ami mbo kayawi ƒui ku ala ani nkya-nya kemmo.

¹³ Naaakun bakɔ lɛna. Na naaani bese ubugya lɛnɔ.

¹⁴ Ami ndi bina Unwoti Katɔti Ɔyikune Ƒui anwuɔsu biti enugya binwini aani akpala bite-mi. Na ala ani na bíse kenye ka bɛdubɔbla ni, bɛbla bɛsiaku-nya lɛlɔ lɛni bite-mi.

¹⁵ Na si bɛ́bla ɔmɛni na bɛ́kpali-mi na ɔgbankpi ɔdi uwi ni, ndubɔtuna bute-mii, na bɛya na mina lɛnyi lɛƒɔ kuye.

¹⁶ Na amii bekyuli bekpidi ni, Katɔti ɔnini, “Biiibo kuƒi kɔni na bɛkɔ-mi ɔda bubo lɛsa bite bekyuli. Na bɛda bɔsu bɛya bɛnii bɛɛdi mina bunyimi lɛlɔ.”

¹⁷ Bikisi ka lidie-mii bɔƒiɔ na bɛda bɛya. Na bíni mina etemila.

¹⁸ Si bɛ́nu uyune ni, na amii ku-nwu bɛbla unwi. Na amii ku basɔnɔdine mɔɔví taabla ala taasala.

¹⁹ Atɛ ekpidi sɔɔn néyi-mii kenye na bina linyemi lɛɛta na ɔkɔ ala lɛlɔ.

²⁰ Na bɛɛtɛmi enyekpi na bina banwani lɛlɔ. Na bɛɛlɔ bina benibi muedi anyikpi.

²¹ Ala amɛni udu na bɛɛbla, nsu ntebimi tɔ kenye úbalɛ ɔƒɛni. Anwuɔsu na bɛɛkali bɛnii nse aani bina kalɛ. Nsu ndubudie bina bɔƒiɔ lɛtina-mii na lɛtɛku-mii litemi.

²² Bɛkali ala amɛni lɛlɔ bɛnu kaduɛ amii bani náyiƒala-mi. Si ɔɔɔdi lɛni ni, ndubo-mii udu bɔyila ɔni na ɔdi ulakana-mii bɔƒɔ.

²³ Ukyuli ɔni muuti enugya teenwini akpala teete-mi ni, uuti ɔbu teete-mi na ndubɔƒɔ-nwu ngba.