Kɔgya 5 - Katɔti Ɔku Kedee1 Unwoti Katɔti, se atu na enu lɛla lɛni na muuvele-ɔ! Na enu-mi lɛnwuna lɛni na muubó taakpali-ɔ. 2 Mina Ɔga ku Katɔti, nu-mi keku kani muuwulo na mɔɔkpali-ɔ nnii bunku-mi. 3 Mina Unwoti, ɔtanta tutuutu biala ni, mɔɔda mina etemila taava-a anumi na muuti mina lɛlɔ ku ala ani muuvele-ɔ taakya-a enu kemmo kalɛ na abla-nya ete-mi. 4 Ɔsika adi Unwoti Katɔti ɔni na alayɔ likpidi. Na alátuna ka alaekpidi bablane benye-ɔ anumi bevele-ɔ lɛla lɛdi. 5 Na bekyuli bani mɔɔkun lɛmɛnɛ ni, alawia-ma alanu. Na ekisi bekyuli bani mɔɔbla likpidi. 6 Na ɔkɔ banyine ƒui ni, adubo-ma udu bɔyila. Na bani muuwi ubugya kalɔ ku bani muudie bekyuli teete ni, ekisi-ma. 7 Nsu ami ni, Ati, ɔ́si bɔyɔ bɔni na aayɔ́-mi geen ɔsu ni, ndubɔkana na liduo lisie ƒula ɔtɔ kemmo na liboku lɛlɔ kalɔ lite-ɔ ku ɔbu. Na ndubɔkana na lɛ́kpa-a na ƒula kakpakɔ kedee mmɔ. 8 Unwoti Katɔti, tɔnku-mi vinku ƒula lilu lɛni nse siin lɛlɔ ɔsi mina bekisine pii ɔsu! Na aya na lɛnu ƒula ulu lɛti nwaa. 9 Mina bekisine balásu litemi geen lɛni lɛlɔ na ukyuli uti anu ɔsia. Na bana kayi kemmo geen ni, baayɔ́ ka batɔlɔ bekyuli batákya ɔgbankpi kemmo na bekpi. Bana inye buse aani kɔƒiɔtɔ kɔni nálɛmi kuwi. 10 Unwoti Katɔti, du-ma kɔtɔ na ani-ma kɔtu! Na aya na bana likpidi lɛni baakali linwini kakpagyuɛ na udie ama alati. Bɔku-ma na bekeli ƒula anumi na ekpidi pii ani na baabla ɔsu ku kalɛ na baata teenye-ɔ lɛlɔ ɔsu. 11 Bekyuli bani néti-ɔ bénwini katamikukɔ ni, lɛlɔ lɛdubɔyɔ-ma na beteedie ebiti lɛnu uwi ƒui. Gyumana bekyuli bani ƒui mɔɔyɔ́-ɔ, ɔsika awɔ ɔsu na bana ebiti eedú taawɔlɔ. 12 Unwoti, bekyuli bani mɔɔsiaku-ɔ kama siin ni, eete-ma kusɛ kusɛ. Gyumana-ma ku ƒula lɛƒɔndia aani kalɛ na kekpo lɛgyumanala lɛɛgyumana ukyuli. |
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
Wycliffe Bible Translators, Inc.