Kɔgya 49 - Katɔti Ɔku Kedee

¹ Amii bayawine ƒui bise atu na binu.

² Amii bani nnye kunyekɔ kunengudi ku kɔnamudi ku balakɛne ku bawabane bina ƒui na nda.

³ Lɛnunda etemila na ndubo-mii bɔsu. Na ala ani ndubɔsi mina kayi kemmo mmɔ ebo kalɔ bunu.

⁴ Agba na adi na ndubo bubo. Na ɔbentaa na ndubo bɔgya budie-nya kalɔ.

⁵ Bi ɔsu na ɔlɛka lɛyia si uwi ukpidi ɔdi ɔ́siaku-mi iye balalane ku belikplune báka-mi bákya?

⁶ Kayawi lɛkɛ lɛlɔ na bana anu asia na baakun lɛmɛnɛ na ala pii ani na bebo ɔsu.

⁷ Nsu ɔdi biala ulakana ɔnwani ngba bɔƒɔ iye ɔƒɔ-nwu lili kayu kadi ute Katɔti na udie-nwu.

⁸ Ukyuli ngba bɔƒɔ lili kayu ɔdi lɛla lɛni na lɛ́ƒɔ kuye geen. Na ukyuli ɔdi ulakana kayu kammɔ bɔƒɔ na kedu

⁹ na ulie ngba uwi ƒui ɔni na ɔsɔ ulekpi kudii.

¹⁰ Bɔɔnu kalɛ na banundane beekpi na badɔlɔdi ku besusu lɛnɔ beekpi taada bana lɛkɛ teese na linwini bekyuli bamba lɛdi.

¹¹ Kɔƒiɔtɔ ndubunwini bana kɔduli uteesie uwi ƒui. Na mmɔ na badubɔkya ɔ́si kaba útédu kaba ina béti bana anyi básia kɔlɔ kɔdi na baalɔ-ku taamana-ma.

¹² Ina dɛ na ukyuli ɔ́kɛ lɛkɛ na ɔ́ƒɔ lɛnyi ni, ɔɔɔdubo bulie uwi ƒui. Ɔdubukpi aani kalɛ na bebuo beekpi.

¹³ Bekyuli bani néti anu básia bana lɛkɛ ku bekyuli bani mɔɔkya-ma ablala ogya lɛlɔ ni, bɛsia-ma kawɔlɔkɔ anu.

¹⁴ Bese aani baƒonu bani na kukpi ndanku-ma utádu ɔkya kaƒiɔtɔ kemmo. Na benwini adila bete-nwu. Na bekyuli bani nse siin badubo busie bɔvi-ma lɛlɔ. Na bana bɔdia bɔyii udu na kaƒiɔtɔ kemmo na bana kɔduli bonwu bonwu kɔmmɔ kɔsɔ kuwi ukpludi.

¹⁵ Nsu Katɔti ɔdubudie ami na kaƒiɔtɔ kemmo na ɔƒɔ-mi utése lɛlɔ.

¹⁶ Kayi ketekpoku-ɔ si ɔdi lɛkɛ liimomo teebu na ɔɔkɛ́ kayawi kamɛni ngba ebiti.

¹⁷ Ɔsika si úkpi ni, uleti ala ammɔ adi ulatɔlɔku. Na ala ani muukeye mmɔ lɛnɔ beleti-nya balakya-nwu.

¹⁸ Ina dɛ na akɛla aakɔ́ ukyuli katɔ na ala aatɛku-nwu na beemwi-nwu ni,

¹⁹ ɔdubunwini utákya nwuna bati kuuku kudɔ na kekpine na kesii kani nse suu uwi ƒui na ɔsɔ ulanu bukeye.

²⁰ Ɔlakɛne ɔni neeebo ala kalɔ bunu lɛkɛ lɛyii udu na uukpi taayii udu aani eƒiebuo kalɛ.