Kɔgya 41 - Katɔti Ɔku Kedee

¹ Lɛlɔ lɛdubɔyɔ ukyuli ɔni muulie taabla kasusu na bekyuli bani nse kpɛtɛ kpɛtɛ lɛlɔ ka ubunku-ma. Unwoti Katɔti ɔdubudie-nwu si úduo lɛbibo lɛdi kemmo.

² Unwoti ɔdubo-nwu bɔgyumana na ɔda-nwu ngba kɔkɔɔkɔ. Kusɛ kusɛ ɔdubɔsiaku-nwu na kalɔ kamɛni lɛlɔ. Na Unwoti uleti-nwu ulakya nwuna bekisine enu kemmo.

³ Na si ɔtɛ ɔlɛ kemmo lɛnɔ ni, ɔdubɔkya-nwu ɔyikun na ɔbwi-nwu.

⁴ O Unwoti Katɔti, lívele-ɔ nnini, “Nu-mi kɔnyana na abwi-mi, ɔsika lɛ́bla likpidi lɛ́ƒiɔ-ɔ.”

⁵ Mina bekisine baatɛmi enyekpi na mina lɛlɔ na beeye lɛlɔ banini, “Lɛmameyi na ɔdubukpi na bɔyiƒala-nwu?”

⁶ Na si ɔdi úbo úbanu-mi ni, kasusu kekpidi na uuti na mina lɛlɔ na baagyingya ɔkɔ etemila taavi.

⁷ Kabɛnsɛ sɔɔn na mina bekisine baatɛmi na mina lɛlɔ na baawia ka likpidi lɛlɛku-mi.

⁸ Baasu banini, “Ɔlɛ ɔni nébo-nwu ɔ́va kalɔ ni, ɔ́ɔnyi-nwu útédu kesii kani na ɔsɔ ulata lɛnɔ.”

⁹ Mina ɔtɔ kemmo ɔkpana geen ɔni lɛ́ƒɔ lɛ́di na ami ku-nwu bɔɔdi na lɛkyami linwi kemmo muedi ni, anwu nénwini únye-mi lɛlɔ.

¹⁰ Nsu awɔ ni, mina Unwoti, nu-mi kɔnyana na aya na lɛta ɔlɛ ɔmɛni kemmo na lɛƒɔ mina bekisine kayu.

¹¹ Na baládi-mi lɛlɔ mmomu na manu mati ka aabla-mi lɛƒɔndia sɔsɔ.

¹² Na ami ni, awɔ kani ndubo-mi bubunku. Na éti-mi enyene ƒula anumi uwi ƒui, ɔsika ánu ka lɛla lɛdi lɛɛɛda-mi.

¹³ Bɛya na bumwi Unwoti ɔni ndi Israel Katɔti. Bɛya na bumwi-nwu ɔ́si ɔƒɛni úsela ƒui. Ɔsia lɛni na ɔsɔ ɔsia lɛni.