Kɔgya 40 - Katɔti Ɔku Kedee

¹ Lɛ́kɛ kayi na nnye mɔɔnu mina Unwoti Katɔti anumi. Na únu-mi bɔkpali na únwini úbanu-mi.

² Ɔ́nu-mi na lɛba ubu bonwu ɔni kemmo na ami lɛti nkya. Na údie-mi úbenyene lɛtakpɛ lɛlɔ kesii kani na lɛɛɛdubo bɔgbanta. Na lɛ́kɛ bɔnwuna.

³ Na ɔ́tina-mi kɔgya kɔwɔdi kɔni lidie limwi-nwu. Bekyuli pii badubunu ɔmɛni na bayia, na baƒɔ-nwu badi.

⁴ Lɛlɔ lɛdubɔyɔ bekyuli bani néti bana anu básia Unwoti lɛlɔ. Na belesie baƒiɔ ku ala bamba adi kudɔ iye ama ku bani mɔɔkpá baƒiɔ ku ala ammɔ baládi kɔkpana.

⁵ O Unwoti Katɔti, ábla ala ebendi pii geen. Na ebo kasusu buni geen ete-bu. Ukyuli ɔdi uuubo ƒula kalɛ. Na naaakana ƒula ablala bɔka bɔtina, ɔsika emomo!

⁶ Akpala ku etela alaƒɔ-ɔ anu. Na aláwia anii bekyuli beboku akpala ani bákyula ku ekpidi lili buvele akpala. Mmomu anii nse atu na linu ƒula litemi.

⁷ Mmɔ na lɛ́su nnini, “Ati, aanu-mi. Líbo nnii mbabla ƒula lɛƒɔyɔ aani kalɛ na bénweni básiku-mi lɛlɔ na Bunweni Kedee Ɔku kemmo.

⁸ O mina Unwoti Katɔti, ƒula ɔda bubo bɔkya-mi kayi kemmo.”

⁹ Unwoti, lɛ́kɔ ƒula litemi lɛsa líte ƒula kadi bekyuli na bana kasalakɔ ɔ́si kalɛ na ese siin na ebo lɛƒɔndia. Na ntebile mina kenye uwi ɔdi aani kalɛ na awɔ ɔlati agyi.

¹⁰ Na kalɛ na aaƒɔ́-bu ngba lɛnɔ ni, nteti ntabɛla na mina kayi kemmo. Na kalɛ na ebo bɔyɔ na aadi ƒula etemila lɛlɔ na eebunku-bu ƒui lɛ́ya na báti ɔmɛni na ƒula kadi bekyuli kasalakɔ mmɔ.

¹¹ Unwoti, taya na ƒula lɛƒɔndia kenye kekulo na mina lɛlɔ. Ya na ƒula bɔyɔ ku litemi geen lɛmmɔ lɛgyumana-mi uwi biala.

¹² Ɔsika ɔgbankpi lidu lidu pii ku mina alaekpidi áka ámana-mi na nsɔ naaanu kesii kani na lɛsia. Emomo etulo mina lili linwini ɔmmɔ ɔsu na enu áƒɛ-mi ƒui.

¹³ O Unwoti Katɔti, ya na kaƒɔ kayɔ-ɔ na edie-mi. O Unwoti, yile bubo na ekpo ete-mi.

¹⁴ Bekyuli bani mɔɔwia-mi ngba bebile ni, ya na beƒu. Na bekyuli bani mɔɔwia-mi badu ni, kɔƒa kukpo-ma na babla susuusu. Na bani ƒui mɔɔwia ka babla-mi kalala ni, bɔku-ma na benwini-mi kama.

¹⁵ Na bani mɔɔsu-mi banii útakɛ-mi na mina ɔgbankpi kemmo ni, liƒu bonwu líƒie-ma na kɔƒa kɔni muukpó-ma ɔsu.

¹⁶ Na bekyuli bani mɔɔwia-a kama ulu ni, lɛlɔ lɛdubɔyɔ-ma si bánu-ɔ na ebiti ada-ma. Na bani mɔɔyɔ́ ƒula ngba bɔƒɔ basu uwi ndi uwi banini, “Bɛya na Unwoti lɛnyi lɛkɔ katɔ.”

¹⁷ Na ami amu ni, ɔwabane na ndi na mɔɔyáki ala pii. Anwuɔsu ya na ƒula anu asia-mi lɛlɔ. Awɔ muubunku-mi na aaƒɔ́-mi. O Katɔti, tetu uwi.