Kɔgya 27 - Katɔti Ɔku Kedee

¹ Unwoti ndi mina bukeye na anwu muudie-mi lɛbibo biala kemmo. Ɔdi mina katamikukɔ kani muukeli teesie na ɔɔgyumana-mi ɔsu naaayia.

² Si balalane ku mina bekisine báta banii babadu-mi muedi ni, badubo butulo na bebuli.

³ Si ina bekpone otogyi ɔdi náka bana-mi muedi ni, ɔtɔtɔ biala ɔɔɔdubo-mi bɔgyu. Ina kekpo na báta-mi lɛlɔ muedi ni, ndubuti mina anu bɔsia Unwoti lɛlɔ.

⁴ Mmomu lɛla linwi pɛ kani na muuvele mina Unwoti kpakplaa nnii ɔya na lɛkɛ keliekɔ na nwuna ɔtɔ kemmo. Na lɛsɔ lilie mmɔ mina ngba emeyi ƒui kemmo na ntaanu Unwoti bɔdia na nteevele-nwu kasusu taasiku nwuna kakpakɔ mmɔ.

⁵ Na ɔgbankpi limeyi ni, ɔdubo-mi bɔgyumana na mmɔ. Na uti-mi utábɛla na lɛtakpɛ lɛni nákuku lili na kesii kani na ulie.

⁶ Na ka ɔ́ya na lɛ́di mina bekisine bani náka báma-mi lɛlɔ ɔsu ni, ndubuti mina akpala liboku-nwu na libo kudu ku lɛlɔyɔ na lidie lɛnu limwi-nwu.

⁷ Si énu-mi lɛdi ka mɔɔva taakpali-ɔ ni, O mina Unwoti, tetile atu. Mmomu nu-mi kɔnyana na enu mina bɔkpali na ebunku-mi.

⁸ Unwoti, mina kayi kaasu-mi ka lɛni lide-ɔ. Anwuɔsu na líbo-ɔ kudɔ.

⁹ Ɔmmɔ ɔsu ni, O mina Unwoti Katɔti, awɔ lɛnɔ tada ƒula anumi tedie-mi lɛlɔ. Na teti kɔnyi takya ƒula kabla ɔblane na abɔku-nwu. Ɔsika awɔ ndi mina ɔƒɔne ɔni muubunku-mi.

¹⁰ Si ina mina bawɔne béni-mi muedi ni, ngyi ka awɔ adubɔnu-mi lɛlɔ.

¹¹ Tina-mi kalɛ na lɛbla ƒula lɛyɔla. Da-mi kɔkɔɔkɔ siaku ulu ɔbuni lɛlɔ na mina bekisine ɔsu.

¹² Tanyonu-mi takya mina bekisine enu kemmo. Ɔsika ɔkɔ banyine báta ku lɛnungyie kemmo na baanyi ɔkɔ taasia-mi na baawia ka badu-mi.

¹³ Mmu muusé kayi ka ndubulie ngba na kalɔ kamɛni lɛlɔ na lɛnu lɛti kalɛ na Unwoti lɛƒɔndia lɛsiaku-mi.

¹⁴ Kya ɔkplu na ataanu Unwoti ulu. Enu ataƒɛ-ɔ taanu-nwu anumi.