Kɔgya 25 - Katɔti Ɔku Kedee

¹ Unwoti, líti mina lɛlɔ ƒui muute-ɔ bɔda.

² O mina Katɔti, awɔ kani ndi mina lɛnunsia. Bunku-mi kalɛ na lɛlɔ liláyɔ mina bekisine ka bádi-mi lɛlɔ na kɔƒa kukpo-mi.

³ Bekyuli bani lɛnɔ na bana anu asia-a lɛlɔ ni, kɔƒa kɔɔɔdubo-ma bukpo kudii. Nsu bani mɔɔta teenye-ɔ lɛlɔ, nsu balánu bɔƒiɔ bɔdi na ƒula lɛlɔ ama ni, anumi adubuwi-ma kalɔ.

⁴ Unwoti, tina-mi ƒula ulu na lɛti kalɛ na lɛsiaku-ɔ kama na ɔyɔ-ɔ kaƒɔ.

⁵ Tɔnku-mi na atina-mi ƒula litemi geen lɛmmɔ. Ɔsika awɔ ndi mina Unwoti ɔni mɔɔƒɔ́-mi ngba, na ƒula lɛlɔ na mina anu asia uwi ndi uwi.

⁶ O Unwoti, kali nu ƒula lɛƒɔndia ku bɔyɔ bɔni naaavumana kudii. Ɔsika lɛni na aabla teete-mi ɔ́si kukuuku.

⁷ Na takali tánu mina lɛkloƒu uwi ekpidi ani na lɛ́bla. Mmomu kali nu ƒula lɛƒɔndia ku bɔyɔ bɔni na átina-mi.

⁸ Ka Unwoti use siin na ɔdia ɔsu ni, ɔɔtina alaekpidi bablane ulu ɔni lɛlɔ na ɔlɛka basia.

⁹ Na ɔɔtɔnku bekyuli bani muuboku lɛlɔ kalɔ taasiaku ulu geen ɔmmɔ lɛlɔ na ɔɔtina-ma kalɛ na babla nwuna lɛƒɔyɔ.

¹⁰ Unwoti ɔɔdi nwuna litemi lɛlɔ na ɔɔyɔ́ bekyuli bani mɔɔdi nwuna ɔda bubo lɛlɔ na baasia nwuna bunyimi anu.

¹¹ Unwoti, ɔkɛnku ƒula lɛnyi ɔsu ni, ti mina bɔƒiɔ ƒui kyiɛ-mi ina ka bumomo na babu-ɔ.

¹² Bekyuli bani mɔɔyia Unwoti ni, ama na ɔɔtina ulu ɔni lɛlɔ na badubɔsia.

¹³ Na badubo ngba bulie ku keyi buɛɛ. Na bana kaba kemmo bebi badubɔdi kayawi kamɛni lɛlɔ ala.

¹⁴ Katɔti ɔɔdiku bekyuli bani mɔɔbu-nwu kɔkpana na uunyimene-ma bunyimi bɔni nkya anwu ku-ma ntɛ.

¹⁵ Ndubunye ntaanu Unwoti ulu uwi ndi uwi. Ɔsika anwu ndubɔtɔnku-mi kalɛ na neeeduo ɔgbankpi ɔdi kemmo.

¹⁶ Unwoti, lisienti lɛɛdu-mi na mɔɔkywí kaƒɔ na ala étulo-mi. Anwuɔsu nwini nu-mi na anu-mi kɔnyana, ɔsika ɔyikun ɔ́sa-mi.

¹⁷ Ala ani muukpóku-mi kayi emomo etulo-mi. Anwuɔsu die-mi lɛku kɔnyana bonwu kɔmɛni kemmo.

¹⁸ Nu ala ani muukpóku-mi ku kalɛ na muunú ɔlɛ na mina lɛlɔ kemmo, na eti mina alaekpidi akyiɛ-mi.

¹⁹ Kali nu kalɛ na mina bekisine beemomo na bana anumi égyie-mi lɛlɔ geen ku bukisi.

²⁰ Gyumana-mi na edie-mi na ɔgbankpi kemmo. Na taya na kɔƒa kukpo-mi. Ɔsika ƒula lɛlɔ kani na mina anu asia.

²¹ Unwoti agyi ka mɔɔbla lɛbuni na nsiaku-ɔ kama siin. Anwuɔsu muuvele-ɔ, bo na ebedie-mi, ɔsika mɔɔnu-ɔ ulu.

²² Unwoti, muuvele-ɔ nnii die Israel lɛku nwuna lɛbibo ƒui kemmo.