Kɔgya 22 - Katɔti Ɔku Kedee

¹ Mina Unwoti, mina Unwoti, bi ɔsu na áda-mi ányonu? Bi ɔsu na ágyunku-mi na elébo na ebedie-mi? Ina mɔɔva momoomo muedi neeenu kɔku kɔdi taasiku-ɔ kudɔ.

² O mina Unwoti Katɔti, mɔɔva laa limeyi limodi nsu alakpete-mi. Usien lɛnɔ muuwulo taalɔ-ɔ na liiibo bɔnwuna nsu neeenu kɔku kɔdi.

³ Nsu awɔ ɔnii nse kedee eli ƒula lɛgaboku lɛlɔ aadi lɛlɔ. Na awɔ na Israel bebi ƒui baakpali teemwi.

⁴ Awɔ na bula bati kuuku báƒɔ bádi, ɔsika bana anu ƒui ásia-a lɛlɔ na áƒɔ-ma sɔsɔ.

⁵ Bákpali-ɔ na édie-ma álɛku bana ɔgbankpi kemmo. Ɔsika ƒula lɛlɔ na bana anu asia ɔsu kɔƒa kulékpo-ma.

⁶ Nsu ami ni, liklubi na ndi. Nsɔ lɛɛɛdi ukyuli muedi. Na ukyuli biala ulayɔ-mi, baatɛmi enyekpi na mina lɛlɔ.

⁷ Na bani ƒui mɔɔnu-mi baamá-mi. Na baamɔsi taakunku bana eli taasu banini,

⁸ “Ka ɔnii nwuna lɛlɔ lɛɛda Unwoti Katɔti kubiti na ɔ́ƒɔ ɔ́di ka wedie-nwu ni, Unwoti udie-nwu na bɔnu.”

⁹ Nsu awɔ náƒɔ mina uni kɔwɔ uwi ɔni baawɔ-mi. Na ɔ́si uwi ɔni na mmu ndi ubiwɔ na mɔɔnyimi lɛnyii ni, étedie-mi atu.

¹⁰ Ɔ́si limeyi lɛni na báwɔ-mi kani na mina lɛlɔ bɔnu bɔkya-a enu kemmo. Na awɔ kani ndi mina Katɔti úti úbedu ɔƒɛni.

¹¹ Anwuɔsu tagyunku-mi, ɔsika ɔgbankpi ɔdubo-mi lɛlɔ na ɔdi uuubo na ubunku-mi.

¹² Bekisine pii benye kesi kesii bámana-mi aani bakɔ. Na bebo ɔkplu geen aani bakɔ bani nási Basan kalɔ lɛlɔ.

¹³ Mina bekisine bébimi bana inye voo aani gyata ɔni muubó lɛdi ka babaduli-mi kɔkɛ kɔkɛ aani kalɛ na gyata ɔɔduli ebuo ɔni na úƒie.

¹⁴ Mina ekubi ányonu lɛlɔ. Mina ɔlɔkplu ɔ́tɔlɔ na línwini aani kalɛ na beewilimi ntu teewi kalɔ. Na mina utu ɔɔyɛlɛ aani banwɛnwɛ lɛyu.

¹⁵ Mina ɔyikun ɔ́sa aani libui lɛni nábwɛ kɔkɛ kɔkɛ. Na mina unyemi ɔ́du ɔ́ma-mi kenye kemmo. Na áya na bébi-mi kukpi ɔtumu.

¹⁶ Na bekyuli bekpidi lisu badi bábla lɛlɔ aani bakpewe báka bámana-mi na bádu-mi enu ku lɛgba.

¹⁷ Mina ekubi álɛ ewi keyi na mina bekisine bédie ɔnusɛ baanu-mi.

¹⁸ Beele-mi lɛlɔ ala teete lɛlɔ. Na baatu egulabi na mina awu lɛlɔ.

¹⁹ O mina Unwoti, awɔ mɔɔkya-mi ɔyikun. Tagyunku-mi bo na ebebunku-mi.

²⁰ Die-mi ngba siku bekisine bani nse aani bakpewe bani mɔɔwia-mi badu kudɔ.

²¹ Mina Unwoti Katɔti, die-mi lɛku mina bekisine bani nse aani bagyata mɛni enu kemmo aani kalɛ na édie-mi na bakɔ bani mbo ɔkplu mmɔ ese kenye.

²² Ndubo ƒula lɛnyi kudu bubo bute mina banwa. Na ndubumwi-ɔ lɛnyi kedee na baƒɔtaadine lɛkpa ƒui akɔ.

²³ Amii bani mɔɔyia Unwoti ƒui, bimwi-nwu lɛnyi. Na amii Yakob bebi ku bawɔ ƒui, bɛbu Unwoti Katɔti. Na amii Israel bebi ku bawɔ ƒui, bɛkya-nwu eli kalɔ.

²⁴ Unwoti ulenwini kama taakya bawabane iye bani muubó abi. Mmomu uunú si bákpali-nwu bévele-nwu kebunku.

²⁵ Ndubumwi-ɔ na kadi kasalakɔ na lɛla lɛni na ábla ɔsu. Na lɛla lɛni na líse kenye ka makpa mete-ɔ ni, ndubute-ni na bani mɔɔyia-a kasalakɔ anumi.

²⁶ Bawabane badubo bɔdi bumo. Na bani mɔɔwia Unwoti Katɔti ni, badubo-nwu buteemwi uwi ndi uwi na ɔdubɔtɛ ute-ma uwi ƒui.

²⁷ Kayawi kadi bekyuli ƒui badubo bunyimo na benwini batásiaku Unwoti. Na kayawi bekyuli ƒui badubo-nwu bɔkpa.

²⁸ Ɔsika lɛga kadikɔ ƒui kadi Unwoti kadi. Na anwu mɔɔdi kadi bekyuli ƒui lɛlɔ.

²⁹ Balakɛne bani mɔɔdi taani kalɛ kalɛ ƒui badubɔkya lili kalɔ bete Unwoti. Na bani ƒui nkɛ na baayɔ́ bekpi na basɔ balákana lɛla lɛla bɔbla bute lɛlɔ ƒui badubɔkya lili kalɔ bete-nwu.

³⁰ Bekyuli ƒui badubo Unwoti bɔbu. Na kaba bekyuli bani masia ƒui badubo Unwoti lɛlɔ kɔtɛ bɔtɛmi bute-ma.

³¹ Na bani na bátawɔ tɔ muedi badubo-nwu lɛlɔ litemi bunu ka Unwoti ɔ́ƒɔ nwuna bekyuli ngba.