Kɔgya 16 - Katɔti Ɔku Kedee

¹ O Katɔti, gyumana-mi! Ɔsika awɔ ndubudie-mi na ɔgbankpi kemmo.

² Na mɔɔsu nwaa nnini, “Awɔ lɛti ndi mina Unwoti. Na ala abuni ani ƒui na mbo ni, awɔ néte-mi ala ammɔ.”

³ Bekyuli bani na Katɔti ɔ́ƒuna úte lɛlɔ na basiaku-nwu kama siin na kalɔ lɛlɔ mɛni ni, beekeye na baayɔ́-mi kaƒɔ geen. Ƒula bekyuli kedee ndi mina bayikune, na bana lɛlɔ na mɔɔkɛ́ ebiti.

⁴ Na bani nsiaku ala bamba kama aani bana unwoti kalɛ ni, badubo abi bubo geen. Na lɛɛɛdubo ubugya buti bɔbla lɛkpa lɛdi bute ala ammɔ. Na lɛɛɛdubo-ma anyi bɔlɔ muedi!

⁵ Awɔ kani némo-mi, ɔsika awɔ ndi mina kadikɔ. Na eete-mi kusɛ kusɛ na eete-mi ala ani mɔɔwia na aada-mi kɔkɔɔkɔ.

⁶ Kadikɔ kani nédu-mi ƒui kadi kabuni. Sɔsɔ na ɔdi ka lɛ́kɛ kese kabuni.

⁷ Ndubɔkɔliku mina Unwoti lɛnyi katɔ, ɔsika anwu nákya-mi kasusu. Na si ntɛ usien muedi ni, nwuna litemi lɛ́ƒɔ mina kasusu kemmo.

⁸ Nnye mɔɔnu-nwu anumi uwi ƒui. Na ka unye-mi kɔdianu aani mina lɛkpa kalɛ ɔsu ni, lɛɛɛdubo bɔgbanta.

⁹ Ɔmɛni ɔsu ni, mina kayi kemmo kéyi ku lɛlɔyɔ, na ndubuti kenye nteemwi-ɔ uwi ƒui! Ina ka ɔlɔna ndi muedi ni, adubɔda-mi kɔkɔɔkɔ.

¹⁰ Na alanyonu mina kɔyu alakya kekpine. Na lɛnɔ ni, alaya ƒula Ubi Kedee ɔlɔna webu.

¹¹ Átina-mi ƒula ngba ulu, na ƒula kudɔ bɔkya bɔ́ya na mɔɔkɛ́ ebiti geen ku lɛlɔyɔ úsela uwi ƒui.