Kɔgya 149 - Katɔti Ɔku Kedee

¹ Bɛya na bumwi Unwoti. Bidie ɔnu ɔwɔdi bite-nwu. Na bimwi-nwu na bekyuli kedee ƒui akɔ.

² Israel, lɛlɔ lɛyɔ-mii, amii bani na Unwoti Katɔti údie. Na amii Sion bebi ku bawɔ ni, lɛlɔ lɛyɔ-mii na bina ɔga lɛlɔ.

³ Bɛtɔ katɔ na biti bimwi-nwu lɛnyi. Na biti enukpɛ agyala ku lɛbentaa bidie lɛnu bimwi-nwu.

⁴ Ɔsika lɛlɔ lɛɛyɔ́ Unwoti Katɔti na nwuna bekyuli lɛlɔ. Na ɔdubɔya na bani nse buɛɛ ƒui balɛ lili, ɔsika ɔdubɔƒɔ-ma.

⁵ Bɛya na bekyuli kedee ƒui bakɛ lɛlɔyɔ na bekeye na bana kɔtɛnkɔ. Na bedie lɛnu momoomo!

⁶ Bɛya na buteenu bana bumwi lɛnu kɔku na bana inye kemmo. Na beti kuwii kɔni bádɔ-ku lɛvi inyɔ bada.

⁷ Na beti bedie baƒiɔkpane kasi na bani bekyuli kɔtu.

⁸ Na bana baga ku batɔnkune ni, bebo-ma kɔgba.

⁹ Na batɛku-ma litemi na badu-ma kɔtɔ aani kalɛ na bénweni bése. Kenyekɔ ku ɔbu ɔmmɔ udu na béti béte bekyuli kedee bamɛni. Bɛya na bumwi Unwoti.