Kɔgya 144 - Katɔti Ɔku Kedee

¹ Muute Unwoti kusɛ kusɛ. Anwu ndi mina Lɛtakpɛ. Ɔsika anwu mɔɔtina-mi kalɛ na liti mina enu likpo kekpo. Na anwu mɔɔyá na mina animi aata na mina ekpola lɛlɔ.

² Awɔ ndi mina lɛtakpɛ ku katamikukɔ kesii kani mɔɔkɛ́ bɔƒɔ. Ƒula lɛlɔ na mina anu asia, ɔsika adi mina ɔgyumanane ɔni muuboku mina bekisine eli kalɔ teete-mi na mɔɔdi-ma lɛlɔ.

³ O Unwoti, bi na abu bekyuli bayawine bɔdi bute-ɔ ɔsu na bɔ́ƒɔ-ɔ kuye lɛni? Na bi ɔsu na eeti-bu lɛlɔ kasusu uwi ndi uwi lɛni?

⁴ Buse aani ɔƒɛƒɛɛ. Na bula emeyi ese aani ɔƒɛ ɔyuli ɔni mɔɔyii taakya kani na ɔ́sa.

⁵ O Unwoti, bwɛ kayaa na ebeduo-bu lɛlɔ mɛni. Na etuku abi ammɔ na uyɔ utaalɛ-nya kemmo.

⁶ Na aya na kayaa kataabwɛ ogya na ugyingya ƒula bekisine bammɔ ƒui. Bo ƒula atula lɛ-ma na ayila-ma udu.

⁷ Die ƒula kɔnu si katɔ na ada-mi edie-ma akɔ, na lɛlɛ ketu bonwu kani náka-mi kákya mɛni kemmo na kadi bamba bekyuli bamɛni enu akɔ.

⁸ Ɔkɔ ala sɔɔn na bagyi bɔsu na bana ablala ƒui ɔkɔ na adi.

⁹ Ndubɔtu ɔnu ɔwɔdi lite-ɔ na mina ɔbentaa lɛlɔ liti limwi

¹⁰ awɔ ɔni mɔɔyá baga baadi kekpo lɛlɔ. Awɔ muukpó teete ƒula kabla ɔblane Dawid na aaƒɔ́-nwu na nwuna bekisine ekpola aladi-nwu lɛlɔ.

¹¹ Die-mi lɛku kadi bamba bekyuli bani mɔɔnyi ɔkɔ uwi biala ku ala bɔkpali muedi mɛni akɔ.

¹² Ya na bula bebi bakɔdi babla aani egyii ani mbo ɔkplu. Na bula belekubi beteekeye aani atabi ani na béti bátu ɔga lɛgbanya na bákwaa-nya na eekeye kalɛ.

¹³ Ya na bula linwu liyi ku edula lidu lidu na bula baƒonu lɛnɔ bawɔ na bemomo mpim mpim.

¹⁴ Na bebuo bani mɔɔtuma teete-bu bataawɔ pii na betebile kaƒɔ na aya kukpi kusie kama. Na taya keku iye kɔnu kenye kɔdi kɔlɛ bula lɛblɔnu lɛlɔ!

¹⁵ Na bekyuli bani na bana Unwoti ndi Katɔti ni, lɛlɔ lɛdubɔyɔ-ma, ɔsika ama na kusɛ kusɛ ɔmɛni udu ɔɔsiaku.