Kɔgya 141 - Katɔti Ɔku Kedee

¹ Unwoti Katɔti, awɔ na muuwulo taakpali. Se atu na enu-mi bɔkpali na ebo pla.

² Ya na mina katɔ bɔkpali bunwini aani oloƒui ƒɛƒɛɛ ɔni baakyula na ƒula anumi. Na si lɛ́kɔliku mina enu katɔ ni, na ɔbla aani useyi uwi akpala ani na baabla teete-ɔ.

³ O Unwoti, ya na lɛti mina kenye bɔda na lɛkɔsi bɔtɛmi!

⁴ Taya na mina kayi kasia likpidi lɛdi bɔbla lɛlɔ. Na taya na liti lɛlɔ lɛkya bekyuli bekpidi ablala kemmo. Na taya na bana adila adi ada-mi ɔkwɛ.

⁵ Taya na lini ka ukyuli ɔni nse siin ɔni-mi kɔtu iye ɔdɔnku-mi. Ɔsika ɔmmɔ ɔdubunwini lɛƒɔndia mmomu ute-mi. Taya na lɛƒɔ bumwi bɔdi lɛsiku bekyuli bekpidi kudɔ aani kalɛ na beewi ukyuli lili nnɔmii, ɔsika mɔɔkpali katɔ uwi biala nnii utatɛ utete bekyuli bani mbo likyulikpi.

⁶ Si uwi ɔni na béƒwimi bana lɛlɔ badine básiku atakpɛ eli bátáva kalɔ ni, uwi ɔmmɔ na bekyuli bammɔ badubɔnu bɔti ka mina etemila adi sɔsɔ.

⁷ Na badubo bana ekubi bugyingya buwi kɔƒiɔtɔ atu aani atakpɛ kɔkɛ, kalɛ kalɛ.

⁸ Nsu mina anu asia awɔ mina Unwoti Katɔti lɛlɔ kani. Gyumana-mi na lɛkɛ kabɛkɔ na ƒula kudɔ kalɛ na neeeduo ɔgbankpi ɔdi kemmo.

⁹ Kɔkpagyuɛ kɔni na mina bekisine bákywɛ-mi ƒui ni, da-mi die-ku kemmo.

¹⁰ Na aya na balalane banu beduo ama alati bana kɔkpagyuɛ kɔmmɔ kemmo uwi ɔni na áya-mi na lɛ́lɛ sɛɛn na bana enu kemmo.