Kɔgya 139 - Katɔti Ɔku Kedee

¹ Unwoti, éduo-mi kayi ku lɛlɔ kemmo ánu ƒui na agyi kalɛ na nse.

² Na agyi-mi ablala ku kɔvinkɔ ƒui. Na mina lili kemmo kakali ƒui kátabɛ-ɔ na kesii kani na eli mmɔ.

³ Ákɔku mina busie taavi ku mina bɔtɛ ánu. Na agyi mina ablala kemmo ƒui kede kede.

⁴ O Unwoti, asa litemi lɛdi lɛdubɔlɛ-mi kenye kemmo ni, agyi lɛla lɛni na ndubo bɔsu kukuuku.

⁵ Áaka ámana-mi kesi kesii na ƒula kɔnu mɔɔgyumana-mi.

⁶ Kalɛ na éti agyi-mi kemmo kágyu geen ɔni utulo ami ɔlati kalɔ bunu.

⁷ Lɛɛɛdubo bɔkana bukeli ƒula anumi busie kesii kadi. Na naaakana lɛlɔ bɔbala ƒula anumi lɛnɔ bɔkya kesii kadi.

⁸ Si lɛ́kɔ lísie katɔ ni, akya mmɔ. Si ubu kemmo na líduo ńtátɛ lɛnɔ akya mmɔ.

⁹ Si lɛ́kwɛ avwi na líveyi lísie ɔgyu kakaaka na ɛpu ɔvi ngye muedi ni,

¹⁰ mmɔ geen ƒula kɔnu kɔdubo-mi bɔkpanku. Na ƒula kɔdianu kɔdubɔtɔnku-mi na ebunku-mi.

¹¹ Na si masu nnii lɛdisa lɛdubɔbala-mi na ɔƒiiwi unwini usien ute-mi muedi ni,

¹² ɔɔɔdubo bɔtɛ, ɔsika lɛdisa lɛdi bukeye na ƒula anumi. Na lɛdisa ku bukeye bɔdi unwi na ƒula kudɔ.

¹³ Ɔsika awɔ návɔ-mi lɛlɔ ekpo ƒui na ásala-nya ákya mina uni kaƒɔ kemmo.

¹⁴ Ndubumwi-ɔ, ɔsika kalɛ na éti ávɔ-mi ni, ubo liƒu. Na ƒula ablala ébomo na mina kayi kagyi ɔmɛni nwaa.

¹⁵ Uwi ɔni na ákya aavɔ́ mina ekubi na aasála-nya na mina uni kaƒɔ kemmo na mɔɔlɛ lili na bɔbɛ kemmo ni, awɔ ágyi ka nkya mmɔ.

¹⁶ Mina bɔvɔ kesii kadi kátabɛ-ɔ asa na báwɔ-mi. Na énweni mina ngba bulie emeyi bumomo ése na ƒula ɔku kemmo asa na mina lɛlɔ kakɛ kadi kadubuse kalɔ na kaƒɔ kemmo.

¹⁷ Unwoti Katɔti, ƒula kakali káƒɔ kuye geen na kana kemmo lɛnɔ kágyu geen na kemomo.

¹⁸ Na si banii baka ƒula kasusu ni, ketulo ɛpu kɔnwinimi. Na si lɛ́gyinya na nkɛ ni, ƒula kudɔ kani na nli.

¹⁹ Sɔsɔ ni, O Katɔti Kedee, ɔdubɔda-mi kubiti si banii ádu balalane. Ya na bekyuli bani mbo likyulikpi banyonu-mi!

²⁰ Bekyuli bammɔ baatɛmi ala ekpidi taasiku-ɔ lɛlɔ, na bada ƒula lɛnyi lɛnɔ na ulu ɔni nátamanaku lɛlɔ.

²¹ O Unwoti, bekyuli bani muukisi-ɔ ni, ami lɛnɔ muukisi-ma. Na bani ƒui mɔɔta tenye-ɔ lɛlɔ ni, uukpóku-mi na muukisi-ma geen.

²² Naaanu-ma bɔdia munu munu, ɔsika mɔɔnu-ma aani-mina bekisine.

²³ O Katɔti, awɔ ɔlati kɔku-mi na ati kalɛ na nse.

²⁴ Sia-mi anu na si nkɛ ulu ukpidi ɔdi lɛlɔ na eti-mi asiaku ngba ƒui ulu lɛlɔ.