Kɔgya 137 - Katɔti Ɔku Kedee

¹ Uwi ɔni na búlie Babilon etukpa atu na búnyimo Sion ni, mmɔ na búlie búwulo keku.

² Na egyii ammɔ akɔ na búti bula lɛbentaa bɔ́ƒala.

³ Mmɔ na bekyuli bani néƒie-bu bátɔlɔku básu-bu ka budie bula lɛnu lɛdi bute-ma. Bula kalala bablane baasu-bu banii “Bidie lɛlɔyɔ lɛnu lɛni bɛɛyɔ́ bɔtu na Sion mmɔ biti bɛkya-bu ebiti!”

⁴ Mmɔ na bɔ́su-ma ka bulakana bula Unwoti ɔnu ɔdi budie na kesii kani naaadi bula kalɔ mɛni.

⁵ O Yerusalem si lɛyiƒala-a ni, mina kɔdianu kɔnu kɔsɔ kutata-mi na kabla kɔkwɛ kɔni na kɔgyi lɛlɔ.

⁶ Na si lɛ́yiƒala-a iye ńteti awɔ Yerusalem ńtenwini mina lɛla lideedi lɛni mɔɔyá mɔɔkɛ́ lɛlɔyɔ ni, unyemi ɔsɔ utata-mi na mina kenye kemmo.

⁷ O Unwoti, nyimo lɛla lɛni na Edomƒuɔ bábla na limeyi lɛni na Yerusalem ɔ́yu kalɔ. Báva básu banini, “Bigyingya ɔma ɔmmɔ! Bɛƒɛ lɛtɔ lɛmmɔ ku ana atabi ani bakya kalɔ ƒui kede kede!”

⁸ Awɔ Babilon, ámanku ka bayila-a udu. Lɛlɔ lɛdubɔyɔ ukyuli ɔni medie-ɔ kasi aani kalɛ na éti ábla-bu.

⁹ Na lɛlɔ lɛdubɔyɔ ukyuli ɔni mada ƒula bebi lɛgba na waƒiɛmi-ma atabi lɛlɔ ni.