Kɔgya 136 - Katɔti Ɔku Kedee

¹ Bɛgya Unwoti enu, ɔsika ɔdia. Ɔsika ɔɔyɔ́-bu uwi ndi uwi.

² Bɛgya benwoti ƒui Unwoti enu. Ɔsika ɔɔyɔ́-bu uwi ndi uwi.

³ Bɛgya Unwoti ɔni ntulo ƒui enu. Ɔsika ɔɔyɔ́-bu uwi ndi uwi.

⁴ Bɛgya anwu ɔni mɔɔbla akɔla ala budie taatina enu. Ɔsika ɔɔyɔ́-bu uwi ndi uwi.

⁵ Bɛgya anwu ɔni nkɛnku nwuna lɛnunda bonwu kemmo na údie katɔ ku kana ala ƒui enu. Ɔsika ɔɔyɔ́-bu uwi ndi uwi.

⁶ Bɛgya anwu ɔni násala ntu bɔni náƒɔ kalɔ lɛlɔ ƒui na kénwini kalɔ kakwiidi enu. Ɔsika ɔɔyɔ́-bu uwi ndi uwi.

⁷ Bɛgya anwu ɔni nédie ala ani muukeye ƒui ɔ́kya katɔ enu. Ɔsika ɔɔyɔ́-bu uwi ndi uwi.

⁸ Bɛgya anwu ɔni náya na ɔƒɛ ɔɔdi limeyi lɛlɔ enu. Ɔsika ɔɔyɔ́-bu uwi ndi uwi.

⁹ Bɛgya anwu ɔni náya na kɔbuli ku ayabi aadi usien lɛlɔ enu. Ɔsika ɔɔyɔ́-bu uwi ndi uwi.

¹⁰ Bɛgya anwu ɔni náya na bebi bedeedi bani na Egyipteƒuɔ báwɔ ku bana bebuo bebi bedeedi ƒui békpi enu. Ɔsika ɔɔyɔ́-bu uwi ndi uwi.

¹¹ Ɔ́ya na Israel kadi bekyuli ƒui bávi bálɛ Egyipte kalɔ kammɔ kemmo. Ɔsika ɔɔyɔ́-bu uwi ndi uwi.

¹² Údie nwuna kɔnu na ɔ́bla ɔyikun ala úte-bu. Ɔsika ɔɔyɔ́-bu uwi ndi uwi.

¹³ Bɛgya anwu ɔni náya na Ɛpugyie ntu bɔ́bwɛ ntɛ enu. Ɔsika ɔɔyɔ́-bu uwi ndi uwi.

¹⁴ Ɔ́ya na Israel kadi bekyuli básia ntu bɔmmɔ ntɛ. Ɔsika ɔɔyɔ́-bu uwi ndi uwi.

¹⁵ Nsu ɔ́nyina Ƒarao ku nwuna badi ƒui ama ɔ́kya ntu bɔmmɔ kemmo. Ɔsika ɔɔyɔ́-bu uwi ndi uwi.

¹⁶ Bɛgya anwu ɔni nátɔnku nwuna kadi bekyuli ɔ́siaku kalɔ kakwiidi kemmo enu. Ɔsika ɔɔyɔ́-bu uwi ndi uwi.

¹⁷ Bɛgya anwu ɔni náya na búkpo bɔ́di baga bayikune lɛlɔ enu. Ɔsika ɔɔyɔ́-bu uwi ndi uwi.

¹⁸ Ɔ́ya na baga bani náƒɔ lɛnyi békpi. Ɔsika ɔɔyɔ́-bu uwi ndi uwi.

¹⁹ Baga bammɔ akɔ ɔdi ndi Sihon ɔni ndi Amoriƒuɔ ɔga. Ɔsika ɔɔyɔ́-bu uwi ndi uwi.

²⁰ Ɔbambadi lɛnɔ ndi Basan ɔga ɔni ndi Og. Ɔsika ɔɔyɔ́-bu uwi ndi uwi.

²¹ Na bana kɔlɔ ni, ɔ́ya na kúnwini bula kese. Ɔsika ɔɔyɔ́-bu uwi ndi uwi.

²² Ɔdi kese ute Israel, nwuna kabla ɔblane. Ɔsika ɔɔyɔ́-bu uwi ndi uwi.

²³ Únyimo-bu uwi ɔni bɔkya lɛbibo kemmo. Ɔsika ɔɔyɔ́-bu uwi ndi uwi.

²⁴ Na údie-bu ɔ́lɛku bula bekisine enu kemmo. Ɔsika ɔɔyɔ́-bu uwi ndi uwi.

²⁵ Na uute nwuna ala ediedi ƒui adila na baadi. Ɔsika ɔɔyɔ́-bu uwi ndi uwi.

²⁶ Bɛgya Katɔti ɔni nkya katɔ enu. Ɔsika ɔɔyɔ́-bu uwi ndi uwi.