Kɔgya 122 - Katɔti Ɔku Kedee

¹ Lɛlɔ lɛ́yɔ-mi ka básu-mi banii, “Ya na buteesie Unwoti kaduli.”

² Na mmɔ na búubo búbedu mɛni, O Yerusalem, bula lɛgba lɛ́kɔ líduo ƒula kayakun kenye.

³ Na adi ɔma unengudi ɔni básɔku-nwu bátu na ɔ́sala ɔdanku lɛlɔ na ɔɔdia bɔnu geen.

⁴ Mɛni na Israel atɔƒi bekyuli bammɔ ƒui bási. Bébo ka beti enugya bete Unwoti aani kalɛ na úbo-ma ɔda.

⁵ Mɛni na Dawid kaba kemmo baga básala na baatɛku bana bekyuli litemi.

⁶ Bivele Unwoti bɛnii keyi buɛɛ kebo Yerusalem ɔma kemmo. Na bekyuli bani ƒui mɔɔyɔ́-ɔ ni, enu ku akɔkɔ eyi-ma.

⁷ O Yerusalem, atu bɔyɔ bɔkya awodu ani na áka ámana-a ƒui kemmo. Na keyi katɛku ƒula baga na bana lɛgbanya kemmo.

⁸ Na nnye mina bakpana ku banwa ƒui kenye muuvele nnii, “Keyi buɛɛ kaƒɔ Yerusalem.”

⁹ Na bula Unwoti Katɔti kaduli ɔsu ni, muuvele nnii anumi busie bubo ɔkɛnku ƒula lɛlɔ.