Kɔgya 116 - Katɔti Ɔku Kedee

¹ Mɔɔyɔ́ Unwoti, ɔsika únu-mi lɛla lɛni na muuwulo teevele-nwu.

² Na ka uusé atu na uunú-mi bɔkpali ɔsu ni, ndubo-nwu butaakpali uwi ndi uwi.

³ Kukpi ɔgbankpi abuli ényimi-mi. Na kekpine kénwini aani liƒu kakpagyuɛ kani ndubo-mi budie.

⁴ Mmɔ na lɛ́kpali Unwoti lɛnyi nnii, “O Unwoti, die-mi!”

⁵ Unwoti ɔɔnu kɔnyana na use siin. Bula Katɔti ɔɔnu kɔnyana.

⁶ Bekyuli bani neeebo kablakɔ kadi ni, Unwoti ɔɔda-ma kɔkɔɔkɔ. Na uwi ɔni na líduo ɔgbankpi kemmo ni, anwu nédie-mi.

⁷ Ndubɔkɛ kayi na lilie ƒaa, ɔsika Unwoti ɔ́bla-mi lɛƒɔndia lɛni ƒui na mɔɔwia.

⁸ Ɔsika awɔ Unwoti édie-mi ásiku kukpi kemmo. Na áya na lɛ́da buwulo lɛ́ya. Na áda-mi na ńtebuli.

⁹ Na nli mɔɔdi ƒula etemila lɛlɔ geen na bayawine akɔ.

¹⁰ Lɛ́ƒɔ Katɔti lɛ́di, anwuɔsu na mɔɔsu ka ala eekpóku-mi na mɔɔyɔ́ likpi muedi.

¹¹ Ina uwi ɔni na kayi kaakpulu-mi na ɔ́bla-mi dɛye dɛye ni, lɛ́su nnini, “Ɔkɔ banyine kani na bekyuli ƒui badi.”

¹² Bi na ndubɔkana na lite Unwoti na ala abuni ani ƒui na ɔ́bla úte-mi ɔsu?

¹³ Ndubuti ɔɔƒɛɛ ku ntɛ minimini etela mbakpa lite Unwoti na lɛgya-nwu enu ka ɔ́ƒɔ-mi ngba ɔsu.

¹⁴ Na ala ani kenye na líse ka meboku Unwoti ni, ndubuti-nya liboku na kadi ƒui anumi.

¹⁵ Kaƒɔ kalayɔ-ɔ ka lɛla lɛdi lɛya na ƒula ukyuli kedee ɔdi ukpi.

¹⁶ O Unwoti, ƒula kabla ɔblane na ndi na mɔɔbla kabla aani mina uni kalɛ. Áƒɛ kɔgba kɔni nda-mi.

¹⁷ Ndubuti linugya etela mbakpa lite-ɔ.

¹⁸ Na ala ani kenye na líse-ɔ ni, ndubuti-nya liboku-ɔ na kadi bekyuli anumi.

¹⁹ Unwoti kaduli na ndubuti-nya liboku na awɔ Yerusalem bekyuli anumi. Bɛya na bumwi Unwoti.