Kɔgya 115 - Katɔti Ɔku Kedee

¹ O Unwoti, awɔ na ɔdi ka bumwi, na ɔɔɔdi abu. Awɔ kani na ɔ́manku ka buti bumwi bute, ɔsika aayɔ́-bu uwi ndi uwi na asia ƒula litemi kama lɛnɔ.

² Bi ɔsu na ɔlɛka kadi bamba bekyuli beye-bu banii, “Wɛ na bina Katɔti ɔkya?”

³ Bula Katɔti ɔkya katɔ na ɔɔbla lɛla lɛni mɔɔyɔ́-nwu kaƒɔ.

⁴ Ala ani na kadi bamba bekyuli baakpá ni, adi ala ani béti sika ugyiedi ku ɔƒualadi bávɔ na ammɔ ƒui adi bekyuli enu kabla.

⁵ Bávɔ-nya na ebo kenye, nsu belétemi. Na bebo anumi, nsu balanu.

⁶ Bebo atu, nsu belenu. Bebo enwu, nsu balaƒɔ ala ɔnyi.

⁷ Bebo enu, nsu beletuku lɛla lɛdi taanu. Bebo lɛgba, nsu belesie. Na belédie lɛdi taasiku ɔkwɛ kemmo.

⁸ Na bekyuli bani návɔ ala ammɔ udu bélieku ala ani na bávɔ mmɔ pɛpɛɛpɛ. Na lɛni kani na bani néti bana anu basia-nya na báƒɔ-nya bádi mmɔ lɛnɔ bese.

⁹ O Israel kadi, bise kayi na Unwoti lɛlɔ. Anwu muubunku-mii na ɔɔgyumana-mii.

¹⁰ Aaron ku bakpane kasala, bise kayi na Unwoti lɛlɔ. Anwu muubunku-mii na ɔɔgyumana-mii.

¹¹ Amii bani mɔɔkya lili kalɔ teete Unwoti ƒui bise kayi na Unwoti lɛlɔ. Anwu muubunku-mii na ɔɔgyumana-mii.

¹² Unwoti uuti-bu lɛlɔ kasusu uwi ndi uwi na ɔdubute-bu kusɛ kusɛ. Ɔdubute Israel kaba bebi kusɛ kusɛ. Na ɔdubute Aaron ku nwuna bakpane kasala kusɛ kusɛ.

¹³ Na bani ƒui na beeti ɔbu teete Unwoti ni, Unwoti ɔdubute-ma kusɛ kusɛ ama bani mbo kenyekɔ ku bani neeebo kenyekɔ na bekyuli akɔ ƒui.

¹⁴ Unwoti ɔya na bɛwɔ na bimomo amii ku bina bebi ƒui.

¹⁵ Unwoti ɔni nédie katɔ ku kalɔ ute-mii kusɛ kusɛ!

¹⁶ Unwoti mɔɔdi lɛlɔ na katɔ kakaaka ƒui. Na úti kalɔ kammɔ ɔ́kya bayawine lɛlɔ bɔnu kalɔ.

¹⁷ Bekpine belemwi Unwoti. Ama bani ƒui na bébi ala na kalɔ kemmo mmɔ belémwi Unwoti.

¹⁸ Nsu abu amu bɔdubumwi Unwoti ka ɔsi ɔƒɛni úsela uwi ƒui. Bɛya na bumwi Unwoti.