Kɔgya 112 - Katɔti Ɔku Kedee

¹ Bɛya na bumwi Unwoti. Lɛlɔ lɛdubɔyɔ ukyuli ɔni mɔɔyia Unwoti na ɔɔdi nwuna ɔda bubo etemila ƒui lɛlɔ.

² Nwuna bawɔ badubɔkɛ ɔyikun geen na bana kadi bekyuli akɔ. Na kaba kani bekyuli nse siin na Katɔti anumi ni, lɛlɔ lɛdubɔyɔ-ma geen.

³ Na badubumo ku akɛla lidu lidu na bana kaduli. Na kalɛ baabla ala siin ɔsu badubulie kpi uwi biala.

⁴ Na bani ƒui mɔɔbla ala ulu lɛlɔ ni, badubɔnu bukeye na kesii kani na lɛdisa lɛkya. Ɔsika baabla lɛƒɔndia na baanu bekyuli kɔnyana na bese siin.

⁵ Lɛlɔ lɛdubɔyɔ ukyuli ɔni muuvó ala teete bekyuli ku kaƒɔ ƒaa na ɔɔbla nwuna ala ƒui ulu lɛlɔ.

⁶ Ukyuli ɔni na use siin ulébo kalɔ kudii. Mmomu bekyuli badubo-nwu butaakali uwi biala.

⁷ Na ɔtɔtɔ ɔdi lɛnɔ ulágyu-nwu ina bi mɔɔlɛ́. Ɔsika nwuna bɔƒɔtaadi bubo ɔkplu na Unwoti lɛlɔ.

⁸ Kayi biala kelékpoku-nwu iye liƒu lɛdi lilada-nwu, ɔsika ɔ́ƒɔ ɔ́di ka nwuna bekisine ƒui badubɔkya-nwu lili kalɔ.

⁹ Uute bekyuli bani mɔɔyaki ala ku kaƒɔ ƒaa, na uláda lɛbuni bɔbla taaya kudii. Na bekyuli badububo-nwu kudu ka ubo ɔyikun sɔsɔ.

¹⁰ Na balalane badubɔnu ɔmɛni na ɔƒɛ ɔda-ma. Badubɔdu anyi bada na babla lɛla biala. Nsu kɔnu kulétuku-ma lɛla lɛni baawia kudii.