Kɔgya 106 - Katɔti Ɔku Kedee

¹ Bɛya na bumwi Unwoti. Bɛgya Unwoti enu, ɔsika ɔdia na ɔɔyɔ́-bu uwi ndi uwi.

² Ukyuli ɔdi ulakana na wedie kenye na Unwoti ala enengudi ani na ɔ́bla lɛlɔ. Na ɔdi lɛnɔ ulakana na wemwi-nwu lɛnɔ na wedu wawɔlɔ.

³ Lɛlɔ lɛdubɔyɔ bekyuli bani mɔɔbla ala ulu lɛlɔ. Na baabla ala ani nse siin uwi biala kemmo.

⁴ Unwoti, tayiƒala-mi uwi ɔni na adubɔbla lɛbuni ete bekyuli bani na áƒuna. Nyimo-mi uwi ɔni na adubɔƒɔ-ma.

⁵ Ya na ami lɛnɔ makɛ ebiti na kɔsia kɔni na ƒula badi bani na áƒuna badubɔkɛ kemmo. Na lɛlɔ lɛni ndubɔyɔ ƒula kadi bekyuli ni, ami lɛnɔ lɛlɔ lɛmmɔ lɛyɔ-mi.

⁶ Bɔ́bla alaekpidi bɔ́ƒiɔ-ɔ aani kalɛ na bula bati kuuku báƒiɔ-ɔ kalɛ kani. Bɔ́bla likyulikpi ku kalala.

⁷ Uwi ɔni na bula bati kuuku bákya Egyipte kalɔ lɛlɔ ni, bétenu ƒula akɔla ala budie taatina kalɔ. Na bétenyimo ƒula lɛƒɔndia pii lɛni na ábla-ma lɛnɔ. Mmomu báta bénye-ɔ lɛlɔ na Ɛpugyie ɔmmɔ kudɔ.

⁸ Nsu na ƒula lɛnyi ɔsu ni, áƒɔ-ma ngba kalɛ na bekyuli banu ƒula ɔyikun bati.

⁹ Údie lɛdi na Ɛpugyie ɔmmɔ ɔ́kwii kɔnakunwi. Na ɔkpanku-ma na bávi-nwu kemmo aani kalɔ kakwiidi lɛlɔ na bakɛ.

¹⁰ Na údie-ma ɔ́lɛku bana bekisine enu kemmo. Na bekisine bammɔ bátadi-ma lɛlɔ.

¹¹ Na ntu bɔmmɔ bɔ́sɔ búbasala na búti bana bekisine bani nsiaku-ma mmɔ ƒui. Na bana akɔ ina unwi muedi útalɛ-nwu kemmo.

¹² Mmɔ na báƒɔ linyese lɛni na Unwoti úse-ma úse mmɔ bádi. Na bémwi-nwu.

¹³ Nsu útaƒɔ uwi ɔdi asa na báyiƒala ala ani na Unwoti ɔ́bla. Na bétenye bátanu-nwu anumi na banu lɛla lɛni na ɔdubo-ma bɔsu.

¹⁴ Mmomu ala ani mɔɔda-ma ɔkwɛ kama kani na basia na kalɔ kakwiidi kemmo mmɔ. Na mmɔ kani na bákɔku Katɔti bánu.

¹⁵ Anwuɔsu úte-ma lɛla lɛni na béye-nwu. Nsu ɔ́ya na ɔlɛ ukpidi ɔdi úbeduo-ma akɔ.

¹⁶ Na kalɔ kakwiidi kemmo kesii kani na báda bana keliekɔ mmɔ ni, bekyuli bammɔ béti lɛnungyie likpidi básiaku Mose ku Aaron bani na Unwoti ɔ́ƒuna sɛsɛɛ úse úte nwuna kabla kedee.

¹⁷ Kalɔ kébimi na kébweli Datan ku Abiram ku nwuna kaduli bekyuli lɛnɔ.

¹⁸ Ogya ɔ́bwɛ úbayu bekyuli bani ƒui nsiaku Abiram kama na ɔ́kyula balalane bammɔ ƒui.

¹⁹ Na béti sika ugyiedi ɔdi bábla ɔmantɛ akɔ ubi ɔdi udu na Sinai kɔbi kaƒɔna na baakpá-nwu.

²⁰ Na kalɛ na ɔlɛka bakpa Unwoti ɔni muukeye ni, bávumana nwuna bukeye bɔmmɔ béte ɔmantɛ akɔ ɔni mɔɔkun livo.

²¹ Na báyiƒala Katɔti ɔni nédie-ma

²² ku ɔyikun kpakplaa ɔ́lɛku Egyipte kalɔ lɛlɔ ku akɔla ala budie taatina enengudi ani na ɔ́bla na mmɔ ku Ɛpugyie kudɔ.

²³ Anwuɔsu uwi ɔni na ɔ́bla kasusu ka ɔyila-nwuna bekyuli udu ni, Mose ɔni ndi nwuna kabla ɔblane ɔƒunadi unye ɔda-ma na úvele Katɔti ka nwuna kɔnyi kɔyɔ-nwu na ɔda-ma bɔkyula ɔya.

²⁴ Ka bátaƒɔ Katɔti linyese bátadi ɔsu ni, kalɔ kammɔ kátada-ma ebiti.

²⁵ Na bakya bana adi nvo kemmo baabla unyeƒi na ɔmɛni lɛlɔ ɔni na bétenu Unwoti lɛdi na badi-ni lɛlɔ.

²⁶ Ɔmmɔ ɔsu Unwoti úbo-ma lɛnimi enwu na ɔsu-ma ka si bátanu kaduɛ ni, ɔdubɔyila-ma udu ƒui na kalɔ kakwiidi kemmo mmɔ.

²⁷ Na ɔdubo bana kaba bebi bugyingya bɔkya kadi bamba bekyuli akɔ. Na bekpi na kalɔ kammɔ kemmo.

²⁸ Na Peor mmɔ ni, muna kadi bekyuli béti bana lɛlɔ bátámana baƒiɔ bani baalɔ banii Baal lɛlɔ. Na baadú bebuo taakpa lɛla lɛni neeebo ngba.

²⁹ Na bákya Unwoti kɔnyi na bana ɔbladu ɔmɛni ɔsu. Na ɔmmɔ ɔsu ɔlɛ buɛ ɔdi ubeduo-ma akɔ.

³⁰ Nsu Pinehas ɔ́ta na ɔ́ni bani nábla udu ukpidi ɔmmɔ kɔtu. Na ɔlɛ buɛ ɔmmɔ kenye káyɔ.

³¹ Na Pinehas kayi buse bɔmɛni bɔdi lɛla lɛni na Israel kadi bekyuli beenyimo uwi biala ka ɔdi lɛbuni geen. Na ɔdi lɛla lɛni naaadubo bɔyii kudii.

³² Na Meriba kɔtu mmɔ na Israel kadi bekyuli bákya Unwoti kɔnyi. Na ɔkɛnku ɔmmɔ ɔsu na Mose ɔ́kɛ nwuna ɔgbankpi.

³³ Israelƒuɔ ala ani na bábla áya na livo líƒi Mose na ɔ́su lɛla lɛni na útalɛka ɔsu na Unwoti lɛlɔ.

³⁴ Israelƒuɔ bétékpo kadi kadi bekyuli nsu béni na bátayila-ma udu aani kalɛ na Katɔti ɔ́su-ma.

³⁵ Mmomu básalaku-ma na basiaku bana ɔbladu kama na baabla lɛla linwi.

³⁶ Na Katɔti bekyuli bébenwini baƒiɔ bakpane. Na ɔmmɔ geen náya na Katɔti ɔ́yila-ma udu.

³⁷ Na beeƒie ama alati bebi bananabi ku belekubi muedi taadu teeti taakpa Kanaan baƒiɔ.

³⁸ Bebi bani naaagyi lɛla lɛdi ubugya na beewi kalɔ. Na báya na kalɔ kammɔ ƒui keesé lɛlɔ.

³⁹ Na bana ɔbladu ɔmmɔ ɔsu ama alati lɛnɔ beesé lɛlɔ. Na ɔmɛni ɔ́tina ka bálɛ Katɔti kama.

⁴⁰ Ɔmɛni ɔ́ya na Unwoti Katɔti kɔnyi kɔ́kɔ katɔ kúbu na nwuna bekyuli lɛlɔ na bana lɛlɔ lɛsɔ liláda-nwu kubiti.

⁴¹ Na Katɔti údie-ma atu na kadi bamba bekyuli bada-ma beesusu kalɛ biala na baayɔ́. Na bana bekisine mmomu mɔɔdi-ma lɛlɔ.

⁴² Bana bekisine bamɛni baanya-ma taakya uwi biala kemmo ɔni na beeebo lɛla lɛdi na babla.

⁴³ Unwoti uudie nwuna bekyuli bamɛni kɔlɛ kɔlɛ. Nsu bɔta kani baata teenye-nwu lɛlɔ. Na ekpidi ammɔ áya na badaku udu bɔyii ƒui.

⁴⁴ Nsu Unwoti uunú-ma keku si ala étulo-ma na baakpali-nwu.

⁴⁵ Ɔ́si nwuna lɛƒɔndia ɔsu ni, na kaƒɔ kasɔ kaakywí-nwu. Na únyimo bunyimi bɔni na únyimiku-ma.

⁴⁶ Na ɔ́ya na bana bekisine baanu-ma kɔnyana.

⁴⁷ Bula Unwoti Katɔti, ƒɔ-bu ngba! Na asiku-bu kɔlɔ bamba lɛlɔ asɔku abásala. Ya na lɛlɔ lɛyɔ-bu na bumwi ƒula lɛnyi kedee ku kudu.

⁴⁸ Bimwi Unwoti ɔni ndi Israelƒuɔ Katɔti lɛnyi. Bimwi-nwu ɔsi ɔƒɛni úsela uwi ƒui. Bɛya na ukyuli biala ɔsu ɔnini, “Ɔsia lɛni!” Bimwi Unwoti.