Kɔgya 105 - Katɔti Ɔku Kedee

¹ Bɛgya Unwoti enu. Na bitaakpali-nwu lɛnyi. Bɛsu kadi bekyuli ƒui ala ani na ɔ́bla.

² Bidie bumwi lɛnu bite-nwu, na bibo nwuna akɔla ala budie taatina kudu.

³ Amii bani ƒui mɔɔwia Unwoti ni, lɛlɔ lɛyɔ-mii na bimwi-nwu lɛnyi kedee na bɛkɔliku-nwu katɔ.

⁴ Biti bina anu bɛsia Unwoti ku nwuna ɔyikun lɛlɔ na bitaanu-nwu anumi uwi biala.

⁵ Binyimo nwuna akɔla ala budie taatina ani na ɔ́bla ku kalɛ na ɔ́tɛ litemi na ulu siin lɛlɔ.

⁶ Nwuna kabla ɔblane Abraham kaba bebi na bɛdi. Na bɛdi-nwu bekyuli baƒunadi bani ndi Yakob bebi.

⁷ Unwoti ndi bula Katɔti. Na anwu mɔɔtɛku kayawi ƒui litemi.

⁸ Nwuna anu asia lɛla lɛni na únyimi lɛlɔ uwi ƒui. Na nwuna linyese lise lite kaba mpim mpim bekyuli.

⁹ Bunyimi bɔmmɔ na únyimiku Abraham na úse kenye ɔnii bɔdubɔkya anwu ku Isak lɛnɔ ntɛ.

¹⁰ Bunyimi bɔmɛni kani na ɔ́lɛ ugyii úte Yakob ka amu ndi ɔda bubo ute anwu ku Israel kadi bekyuli úsela uwi ƒui kemmo.

¹¹ Ɔ́su ɔnini, “Amii na ndubuti Kanaan kalɔ ƒui lite na kana ƒui kenwini bina kadikɔ.”

¹² Na uwi ɔmmɔ kemmo ni, beeemomo. Na lɛnɔ ni, baƒɔ na badi na kalɔ kammɔ kemmo.

¹³ Na busie kani bakɛ beesié taavi kadi bamba bekyuli akɔ ɔ́si lɛga kadikɔ úsie lɛga kadikɔ.

¹⁴ Na ɔ́gyumana-ma ɔni na ukyuli ina unwi útanya-ma útakya. Mmomu ɔ́tɛmiku baga baga bammɔ kpakplaa na ama ɔsu.

¹⁵ Na ɔ́su-ma ɔnini, “Ɔdi biala utetuku mina kadi bekyuli bani na lɛ́ƒuna. Na ɔdi utabla mina kenye bediene badi likpidi lɛdi.”

¹⁶ Na ɔ́ya na kɔka kúbo Kanaan kalɔ kammɔ ƒui lɛlɔ na adila ása-ma ƒui.

¹⁷ Nsu ɔ́tala ukyuli na ɔtɔ-ma anumi na Egyipte. Na anwu ndi Yoseƒ ɔni béti béye ka unwini bekyuli bamba kabla ɔblane.

¹⁸ Bebo-nwu kɔgba na bákya-nwu abuala lɛgba ku limɔ.

¹⁹ Ɔ́kya kɔgba kɔmmɔ kemmo útédu ka Egyipteƒuɔ Ɔga Ƒarao kɔna kɔni kalɔ na údie úbo-nwu kemmo.

²⁰ Egyipteƒuɔ ɔga ɔmmɔ ɔ́ya na bédie-nwu abuala ammɔ na ɔ́ya bányonu-nwu na ɔ́kɛ bɔnwuna.

²¹ Ɔga ɔmmɔ úti Yoseƒ ɔ́bla ukyuli ɔni mɔɔnu nwuna akɛla ƒui ku kalɔ kammɔ ƒui lɛlɔ.

²² Na úte-nwu ɔyikun ka ɔdi batɔnkune bammɔ lɛlɔ na ɔtina benengu bammɔ lɛnunda ala.

²³ Na Yakob útélie Egyipte kalɔ lɛlɔ mmɔ aani ɔƒɔ kalɛ na kalɛkɛ kani baalɔ banii Ham.

²⁴ Na mmɔ ni, Unwoti ɔ́ya na Israelƒuɔ báwɔ na bémomo geen na bákɛ ɔyikun kaduɛ bétulo bana bekisine.

²⁵ Ɔ́ya Egyipteƒuɔ beekisi nwuna kadi bekyuli. Na bákya kɔkwɛ kukpidi bana lɛlɔ.

²⁶ Ɔmmɔ ɔsu Unwoti ɔ́tala Mose nwuna kabla ɔblane ku Aaron ɔni na ɔ́ƒuna.

²⁷ Na bábla Katɔti akɔla ala budie taatina lidu lidu bátina-ma na Egyipte kalɔ lɛlɔ mmɔ.

²⁸ Katɔti ɔ́ya na lɛdisa lɛ́ƒɔ kalɔ kammɔ ƒui. Nsu Egyipteƒuɔ bétenu-nwu litemi.

²⁹ Ɔ́ya na ntukpa bɔni nkya mmɔ ƒui búnwini ubugya, na kɔbɛ kɔmmɔ ƒui lɛnɔ kúkpi.

³⁰ Na bapɔtɔlɔ báƒɔ kalɔ kammɔ ƒui lɛlɔ. Na Egyipte ɔga kaduli muedi bapɔtɔlɔ báƒɔ-ka kemmo ku nwuna katɛnkɔ ƒui.

³¹ Unwoti údie lɛdi na bebweyi lidu lidu bani muuveyi na baata báƒɔ bana kalɔ ƒui lɛlɔ.

³² Na ɔnantu bɔna kenye ni, Unwoti ɔ́ya na etubankɛ aayu aani ɔnantu. Na kayaa kaabwɛ ogya teebewi kalɔ kammɔ ƒui lɛlɔ.

³³ Na ɔ́ya na bana adingyii mmo bɔni bése ƒui búbie na egyii bamba ƒui lɛnɔ áƒɛ éwi kalɔ.

³⁴ Na Unwoti údie lɛdi na ɔ́ya na baalɔlɔ báyu esu esu na bébile bana edula.

³⁵ Na bebweyi bamɛni báyalɛ evete ƒui na bébile edula ani ƒui nkya kalɔ kammɔ kemmo.

³⁶ Na ɔ́ya na Egyipteƒuɔ bebi bananabi bedeedi bani ƒui nkya kalɔ kammɔ lɛlɔ ƒui békpi.

³⁷ Na ɔ́kpanku Israelƒuɔ ɔ́lɛku kalɔ kammɔ lɛlɔ, Na béti Egyipteƒuɔ sika ugyiedi ku ɔƒualadi ƒui bátɔlɔku. Na ɔlɛne ɔdi uuubo-ma akɔ.

³⁸ Ebiti áda Egyipteƒuɔ geen ka Israelƒuɔ bátɔlɔ-ma kalɔ lɛlɔ. Ɔsika bana lɛlɔ lɛ́da-ma liƒu.

³⁹ Katɔti ɔ́ya ulɔyɔ liƒlukutu bonwu lɛdi lɛ́ka lɛ́mana-ma ka bakɛ. Na ogya bonwu ɔdi lɛnɔ ɔɔda usien na anwu na baanu teesie.

⁴⁰ Belusiene bamɛni béye Unwoti adila na úte-ma baasɛ ku bodobodo ɔ́siku katɔ na bádi bémo.

⁴¹ Ɔ́ya na atakpɛ ébimi na ntu bɔ́lɛ-nwu kemmo na báni. Na ntu bɔmmɔ bɔɔgbá aani ketu na káƒɔ kalɔ kakwiidi kammɔ kemmo.

⁴² Ɔsika únyimo linyese kedee lɛni na úse úte Abraham ɔni ndi nwuna kabla ɔblane.

⁴³ Ɔmmɔ ɔsu na ɔ́tɔnku nwuna bekyuli baƒunadi ɔ́lɛku kalɔ kammɔ kemmo na beedie lɛlɔyɔ lɛnu ka bakɛ ulu.

⁴⁴ Na úti bekyuli bamba kɔlɔ úte-ma. Na mmo bɔni kadi bamba bekyuli bése ku bana akɛla ƒui énwini bana ɔdi.

⁴⁵ Ɔ́bla ɔmɛni úte-ma kalɛ na basia anu na badi nwuna etemila ku ɔda bubo lɛlɔ. Bɛya na bumwi Unwoti.