Kɔgya 10 - Katɔti Ɔku Kedee

¹ O Unwoti, bi ɔsu na ágyunku-bu lɛni, na si uwi ɔni na ala eekpóku-bu ni, na eeti ƒula lɛlɔ taabɛla-bu?

² Bekyuli bekpidi baatalaku lɛlɔ katɔ na beekpóku bawabane. Anwuɔsu ya na ama alati kɔkpagyuɛ kɔni bákywɛ kudie-ma.

³ Ukyuli ukpidi ɔɔkun lɛmɛnɛ na ala ani na ɔɔwia lɛlɔ. Na ukyuli ɔni muugyele anumi taasia lilu likpidi lɛlɔ taaƒɔ bekyuli ala ni, uuwida Unwoti na uuní-nwu.

⁴ Ukyuli ukpidi ɔɔɔdaku Unwoti lɛda na ɔɔkali ka Unwoti uuubo kenyekɔ kadi na nwuna keliela kemmo.

⁵ Ukyuli ukpidi ablala biala aalɛ́-nwu kɔsia uwi ƒui, nsu ɔɔɔgyi ulu ɔni lɛlɔ na Unwoti ɔɔsia taatɛku bekyuli litemi. Na ɔɔmá nwuna bekisine muedi.

⁶ Na ɔɔsu lɛlɔ ɔnini, “Lɛla biala lilakana-mi bukpoku. Na lɛɛɛdubo buduo ɔgbankpi ɔdi kemmo lɛnɔ.”

⁷ Ewida ku ɔkɔ ku likyulikpi etemila sɔɔn néyi-nwu kemmo. Na likpidi ku kalala etemila amɛni kani na ɔɔsu.

⁸ Ɔɔbɛ́ teebi akpaklɔ ulu lɛlɔ na ɔɔtú bekyuli bani naaadubo bɔkana na bekpo baƒɔ lɛlɔ na ɔdu-ma.

⁹ Na ɔɔsɔ teebi nwuna kabɛkɔ mmɔ kpoo aani kalɛ na gyata ɔni na kɔka kɔɔda ɔɔbla. Na ɔɔtú bawabane. Na uƒie-ma kɔnakunwi na ɔkpɛ-ma ɔtɔlɔku aani ebuo ɔni nánu kakpagyuɛ.

¹⁰ Na bekyuli bani béƒie mmɔ bese aani bebuo bani neeebo kekelikɔ kadi na ɔyikune ɔmmɔ aƒiɔ akɔ.

¹¹ Ukyuli ukpidi ɔɔsu lɛlɔ ɔnini, “Unwoti ɔɔɔdaku-ni. Úbile nwuna anumi ɔ́kya-mi ɔsu ulanu-mi.”

¹² O Unwoti, kali nu bekyuli bani nnye muubó abi na ani bekyuli bekpidi bamɛni kɔtu.

¹³ Bi ɔsu na ɔlɛka ukyuli ukpidi uni Katɔti na ɔsu ɔnini, “Katɔti uláni-mi kɔtu kɔdi.”

¹⁴ Nsu geen geen ni, awɔ Katɔti aanu na agyi kɔnyana ku abi ani na ƒula bekyuli beebó. Na agyi kalɛ na eekpó teete-ma. Na ka ɔwabane uuubo lɛla lɛdi na ɔɔbla ɔsu ni, uuti lɛlɔ teete-ɔ. Na eebunku-nwu aani kalɛ na eebunku bekpinebi.

¹⁵ Balalane ku ekpidi lidu bamba bablane ni, yila bana ɔyikun. Na ani-ma kɔtu na alaekpidi ani na bábla kenye úti útédu ka báda-nya bɔbla báya.

¹⁶ Unwoti ndi ɔga ɔ́si ɔƒɛni úsela uwi ƒui. Na kadi bamba bekyuli badubɔyii ƒui kede kede na nwuna kalɔ lɛlɔ.

¹⁷ O Unwoti, bekyuli bani muuboku lɛlɔ kalɔ na beevele-ɔ bana kayi lɛyɔla ni, eenú-ma bɔkpali na aakya-ma kayi ogya, na eenú-ma lɛdi lɛnɔ si baakpali-ɔ.

¹⁸ Na bekpinebi ku bani na baanya taakya ni, adubɔtɛ bana litemi ete-ma na badi ubo kalɛ na likpidi bablane basɔ balákɛ ɔyikun ɔdi na bataabla-ma kalala na bataayila-ma lɛnɔ.