Ƒilipiƒuɔ 4 - Katɔti Ɔku Kedee

Paulo Ɔ́su Ƒilipiƒuɔ Lɛla Lɛni Na Ɔlɛka Babla

¹ Anwuɔsu ni, mina banwa bayɔne ɔni na naaanu-mii ni, kɔyɔ kúwi-mi! Bɛɛkya-mi kubiti geen na mɔɔtalaku lɛlɔ katɔ na amii ɔsu. Banwa bayɔne geen, lɛni na ɔdi ka binye kpakplaa na Kristo kemmo.

² Muuvele Euodia ku Sinteke lɛnɔ ka benu lɛlɔ kalɔ na basɔ belie aani banwa belekubi na Blɔti kemmo.

³ Na amii lɛnɔ aani mina kabla bablane bakpana ni, mɔɔyɔ́ ka bibunku beleku bamɛni. Ɔsika báblaku-mi kabla na bɔ́kana na búgyingya litemi buni lɛmmɔ. Bɔ́bla ala amɛni ku Klement lɛnɔ ku banwa kabla bablane bakladi bani anyi na bénweni bakya Katɔti Ngba Ɔku kemmo.

⁴ Na mɔɔsu-mii nnii bɛya na lɛlɔ litaayɔ-mii na Blɔti kemmo. Na nsɔ mɔɔsia kama nnii bɛya na lɛlɔ litaayɔ-mii.

⁵ Bɛya na ukyuli biala ɔnu ɔti kalɛ na bɛda lɛlɔ buɛɛ. Ɔsika Blɔti bɔsɔ bubo bɔmmɔ búude.

⁶ Ɔdi biala utekpoku lɛlɔ na lɛla biala lɛlɔ, mmomu bitaakpali Katɔti uwi biala kemmo, na bitaasu-nwu ala ani bɛɛwia. Na si bɛɛkpali-nwu ni, na bitaagya-nwu enu.

⁷ Na Katɔti ɔni muute keyi buɛɛ bɔni ntulo ɔyawine kalɔ bunu ɔdubɔgyumana bina kayi ku kasusu ƒui ɔni na biliku Kristo Yesu.

⁸ Na ukplodi ni, banwa, biti bina kasusu bɛsia ala ani ndi etemila geen lɛlɔ ku ala ani mbo ɔbu ku ala ani nse siin ku ala ani nse sɛɛn ku ala ani mɔɔdia bɔnu ku ala ani náƒɔ lɛnyi ku ala ani ndia geen ku ala ani námanku bumwi lɛlɔ.

⁹ Biti mina ɔbladu ku mina etemila ani ƒui na bínu na bɛ́tɛya bɛsiku-mi kudɔ bɛkya kabla bɔbla kemmo. Na Katɔti ɔni muute keyi buɛɛ ni, ɔdubulieku-mii.

Lɛ́tɛya Kalɛ Na Lɛla Biala Na Lɛ́kɛ Liduku-mi

¹⁰ Lɛlɔ lɛɛyɔ́-mi geen na Blɔti kemmo ka bɛ́sɔ bɛ́bla kasusu kawɔdi na mina lɛlɔ bɔnu lɛlɔ. Ɔɔɔdi ɔni na bilánu-mi lɛlɔ ɔsu. Mmomu kuƒi nátatɛ ka bɛbla lɛni bite-mi.

¹¹ Na ɔɔɔdi bɔsu na mɔɔsu nnii mɔɔyaki lɛla lɛdi, mmomu ka lɛ́tɛya kalɛ na lɛla biala na lɛ́kɛ liduku-mi ɔsu.

¹² Na ngyi kalɛ na lɛwaba ku lɛlakɛ lise na lɛla biala kemmo. Na lɛ́tɛya lɛbɛla lɛni mɔɔtina-mi kalɛ na lɛti lɛlɔ bɔda na kesii biala ku uwi biala kemmo. Na kɔka kemmo o-o, bumo o-o, lɛkɛ o-o, iye ayaki kemmo o-o ni, nnye nte ana ƒui.

¹³ Mɔɔkana na mɔɔbla lɛla biala ɔkɛnku Kristo ɔyikun ɔni na úte-mi ɔsu.

¹⁴ Nsu bɛ́bla-nwu kaduɛ ka bíbunku-mi na mina lɛbibo kemmo.

¹⁵ Na amii Ƒilipiƒuɔ ni, amii alati bɛgyi geen ka uwi ɔni na lɛ́tɔlɔ Makedonia na líse kalɔ mɔɔkɔ́ litemi buni lɛmmɔ lɛsa ni, amii kani ndi baƒɔtaadine lɛkpa lɛni néte-mi kebunku na lɛla lɛni na lɛ́bla líte-mii kenye.

¹⁶ Na ɔni lɛ́kya Tesalonika muedi ni, ka mɔɔwia kebunku ni, bíbunku-mi bítulo kunwi.

¹⁷ Na ɔɔɔdi etela na mɔɔwia lite lɛlɔ, mmomu lɛla lɛni mete-mii kɔsia na katɔ na mɔɔsia anu.

¹⁸ Na bɛ́ƒɔ-mi kabla kayu ƒui. Na kayu kammɔ kétulo kalɛ na ɔ́manku muedi. Etela ani ƒui bíti bímene Epaƒrodito mɛni ni, émo-mi! Etela ammɔ ese aani akpala ƒɛƒɛɛ ani béti bákpa béte Katɔti, na áyɔ-nwu kaƒɔ, na aada-nwu kubiti.

¹⁹ Na mina Katɔti ɔdubute-mii etela ani ƒui bɛɛwia ɔkɛnku Kristo Yesu lɛkɛ ku bukeye kemmo.

²⁰ Bɛya bumwi Bula Ɔti Katɔti ɔ́si ɔƒɛni úsela ƒui. Ɔsia lɛni.

Bɔkada

²¹ Mɔɔkya Katɔti bebi bani ndi Kristo Yesu badi ƒui kenye o-o! Na banwa bani nkya-mi kudɔ mɛni lɛnɔ begyele-mii o-o!

²² Katɔti bekyuli bani ƒui nkya mɛni beegyele-mii. Ɔni ntulo ndi bekyuli bani nkya Kaesare kaduli. Ɔsia lɛni.

²³ Na Blɔti Yesu Kristo lɛƒɔndia lɛsiaku bina ƒui.