Petro 1 1 - Katɔti Ɔku Kedee

¹ Ami Petro ɔni ndi Blɔti Yesu Kristo ɔtalane muunweni ɔku ɔmɛni lite Katɔti baƒɔtaadine bani nátɔlɔ bana lɛma bésie belie Romaƒuɔ kɔlɔ kɔni ndi Ponto ku Galatia ku Kapadokia ku Asia ku Bitinia lɛlɔ.

² Unwoti Katɔti ɔlati náƒuna-mii na nwuna bɔyɔ kenye. Na ɔ́ya na nwuna Kɔyu kɔ́bla-mii nwuna bekyuli kedee ka bɛ́di Yesu Kristo litemi lɛlɔ ɔsu. Na nwuna ubugya ɔ́bla-mii lɛlɔ sɛɛn. Muuvele nnii Katɔti lɛƒɔndia ku keyi buɛɛ kasiaku bina ƒui uwi biala kemmo.

Baƒɔtaadine Bebo Lɛnunsia Lɛni Naaayii Udu Kudii

³ Bɛya na bɔgya Katɔti ɔni ndi Blɔti Yesu Kristo Ɔti enu. Ka Katɔti ɔɔnu-bu kɔnyana geen ɔsu ni, ɔ́ya na bɔdubulie ngba bɔwɔdi na kɔyu kemmo, ɔsika ɔ́gyila Yesu Kristo ɔ́lɛku kekpine. Anwuɔsu na bubo lɛnunsia lɛni naaayii udu kudii.

⁴ Na bɔɔnu anumi ka bɔdubɔdi ala ani na Katɔti ɔ́klibi úse na katɔ, na adi ala ani neeebie na alanyi taakpi iye ayii udu lɛnɔ.

⁵ Amii ndubo ala ammɔ bɔdi, ɔsika Katɔti ɔɔgyumana-mii teete ngba bɔƒɔ limeyi lɛni ndububo ka bɛ́ƒɔ Blɔti Yesu Kristo bɛ́di ɔsu.

⁶ Lɛlɔ litaayɔ-mii na ɔmɛni lɛlɔ ina ka bɛdubo abi buteebo uwi uwi na bekpoku-mii lɛnɔ.

⁷ Ala ani ndubɔsiaku-mii ndubɔtina kalɛ na bɛ́ƒɔ bɛ́di geen. Sika ugyiedi ɔni muubie muedi ni, ogya kemmo na beeti-nwu taakya taanu-nwu taati kalɛ na ɔdia. Anwuɔsu bina bɔƒɔtaadi bɔni náƒɔ kuye butulo sika ugyiedi ɔmɛni ni, ɔlɛka bakɔku-mu banu asa na bɔkana bunye kpakplaa. Na si bina bɔƒɔtaadi bɔmmɔ bɔ́kana na búnye ni, Katɔti ɔdubumwi-mii na ɔtalaku-mii katɔ, na ɔbu-mii na Yesu bɔsɔ bubo limeyi lɛmmɔ lɛlɔ.

⁸ Bítanu-nwu kudii, nsu bɛɛyɔ́-nwu. Na bilánu-nwu ɔƒɛni lɛnɔ, nsu bɛɛƒɔ́-nwu taadi. Anwuɔsu bɛya na lɛlɔyɔ lɛni náƒɔ kuye geen na ukyuli ɔdi biala ulakana-ni kalɔ budie lɛnɔ ni, lɛkya-mii kemmo.

⁹ Ɔsika kalɛ na bɛ́ƒɔ Kristo bɛ́di ɔsu ni, Katɔti ɔdubɔya na bina ayu akɛ ngba.

¹⁰ Katɔti kenye bediene béwi lɛlɔ báwia kalɛ na Katɔti ɔdubɔƒɔ-bu ngba kemmo, na béduo-nwu kemmo kaduɛ na básu-bu bése kalɛ na Katɔti lɛƒɔndia lɛdubɔsiaku-bu.

¹¹ Básia ulu biala lɛlɔ ka bati uwi ku ukyuli ɔni lɛlɔ na ala amɛni adubɔlɛ. Na Kristo Kɔyu náƒɔ-ma lɛlɔ kemmo na kɔ́ya na básu-bu ala bése. Kɔyu kɔmmɔ kɔ́su kúse kalɛ na Kristo ɔdubo abi bubo ku kalɛ na lɛlɔ lɛdubo-nwu bɔyɔ na ɔmmɔ kama.

¹² Katɔti údie ɔ́tina kenye bediene bammɔ ka etemila ani na baasu mɛni aaadi bana uwi lɛlɔ litemi, mmomu ɔdi bina ɔdi. Na ala ani na básu mmɔ ni, abu ndi nwuna batalane na bɔdanku litemi buni lɛmmɔ bɔɔkɔ́ lɛsa teete-mii nwaa. Na bɔɔsu ala amɛni ɔkɛnku Katɔti Kɔyu kɔni na ɔ́tala ɔ́kya-bu ɔyikun kemmo. Na anumi eegyie ayu muedi ka nka beduo ala amɛni kemmo bati.

Ɔlɛka Baƒɔtaadine Belie Ngba Bɔni Nse Kedee

¹³ Anwuɔsu ni, bɛda lɛlɔ bise bite kabla. Na binye kagyumana na bitaanu ulu teete lɛbuni lɛni na Katɔti ɔdubɔbla ute-mii lɛlɔ uwi ɔni na Yesu wasɔ webo wabaƒɔ-mii ngba.

¹⁴ Binu Katɔti litemi, na bɛda udu ukpidi ɔni kemmo na bɛ́kya uwi ɔni na bítenwini tɔ baƒɔtaadine mmɔ bɛya.

¹⁵ Na aani kalɛ na Katɔti ɔni nálɔ-mii use kedee ni, amii lɛnɔ bɛbla lɛlɔ kedee na bina ablala ƒui kemmo.

¹⁶ Na Bunweni Kedee Ɔku kemmo ni, bénweni ka Katɔti ɔ́su nwuna bekyuli ɔnini, “Bɛbla lɛlɔ kedee, ɔsika ami nse kedee.”

¹⁷ Bɛɛsu bɛnii, “Bula Ɔti” si bɛɛkpali katɔ. Anwuɔsu binyimo ka anwu ndubɔtɛku ukyuli biala litemi na ala ani na ɔɔbla kenye. Na ulanu bekyuli anumi asa na watɛku-mii litemi. Lɛni ɔsu ni, biti bina uwi ɔkladi ɔni nébu na bilie ngba mɛni aani baƒɔ kalɛ bitaabu-nwu.

¹⁸ Ɔsika bɛgyi ka kayu kani na Katɔti ɔ́ƒɔ na bina lili asa na údie-mii ɔ́lɛku ngba bukpidi bɔni na bɛ́ƒɔ bɛ́siku bina bati kuuku kudɔ ni, ɔɔɔdi sika ugyiedi iye ɔƒualadi ɔni muutili na ɔdi.

¹⁹ Mmomu Kristo ubugya ɔni náƒɔ kuye na ɔdi. Anwu ndi Koƒonu Ubi ɔni námanku lɛkpa na bina lili.

²⁰ Katɔti ɔ́ƒuna Kristo úse asa na údie kayawi. Na amii ɔsu na Katɔti údie-nwu keyi na uwi ukplodi ɔmɛni kemmo.

²¹ Na ɔkɛnku Kristo ɔmɛni lɛlɔ ɔsu na bɛ́ƒɔ Katɔti bɛ́di. Na anwu nágyila-nwu ɔ́lɛku kekpine na úte-nwu keliekɔ kenengudi geen. Ɔmmɔ geen ɔsu na bɛ́ƒɔ Katɔti bɛ́di na bɛsia-nwu anu.

²² Ka bɛɛdi litemi geen lɛmmɔ lɛlɔ na bɛ́bla lɛlɔ sɛɛn ka Katɔti úti bina ekpidi ɔ́kyiɛ-mii na bɛɛyɔ́ lɛlɔ ɔƒɛni ɔsu ni, bɛya na bina baƒɔtaadine bakpana bɔyɔ bɔkɔ katɔ bubu ku kayi ƒui.

²³ Katɔti ɔ́ya na bínwini nwuna badi, ɔsika bɛ́kɛ ngba bɔwɔdi bɔni nsɔ naaadubo bɔsa na ɔɔɔdi bɔni mɔɔsa. Bɛ́kɛ ngba bɔmɛni bɛ́siku nwuna litemi lɛni mbo ngba geen kemmo na lise lísela uwi ƒui.

²⁴ Na aani kalɛ na Bunweni Kedee Ɔku ɔmmɔ ɔɔsu ɔnii, “Bekyuli ƒui bese aani lɛku kemmo alakpi, na ukyuli bɔdia buse aani alakpi anwula. Alakpi aayɛyɛ na anwula aanú.

²⁵ Nsu Katɔti litemi ani lise lite uwi ƒui.” Na ɔmɛni ndi litemi buni lɛni lɛsa na bákɔ béte-mii.