Bumomo Bɔka 32 - Katɔti Ɔku Kedee

Kaba Bekyuli Bani Nlie Yordan Ɔƒɛ Katukɔ

¹ Uwi ɔmmɔ kemmo ni, Gad ku Ruben kaba bekyuli bebo bebuo pii. Na kalɛ bánu Yaser ku Gilead kalɔ ka kadia kete ɔmantɛ bakɔ bɔtumini ɔsu ni,

² kaba kamɛni bekyuli bésie Mose ku Eleasar ku Israelƒuɔ batɔnkune kudɔ. Na básu banini,

³ “Ati bene, Atarot ku Dibon ku Yaser ku Nimra ku Hesbon ku Eleale ku Sebam ku Nebo ku Beon

⁴ kɔlɔ kɔni Unwoti ɔ́gyu ɔ́tɔ úkpo úte Israelƒuɔ mmɔ kɔdia kute bebuo bɔtumini geen. Na ɔmɛni ɔsu bɔ́kɛ bebuo kaduɛ na kana lɛlɔ.”

⁵ Na básu Mose bene banini, “Si ɔdubɔdia ni, na bɛnu-bu kɔnyana na biti kalɔ kammɔ bite-bu na buti bɔbla bula kadikɔ. Na ɔ́sɔ útamanku ka bɔvia Yordan Ketu lɛnɔ.”

⁶ Amu na Mose úye Gadƒuɔ ku Rubenƒuɔ bamɛni ɔnini, “Ɔdia ka bina banwani bésie bakya kekpo na amii bɛsɔ bɛkya mɛni?

⁷ Bi ɔsu na bɛɛyɔ́ ka bɛƒɛ Israelƒuɔ enu ka besie betéti kalɔ kani na Unwoti úti uute-ma mmɔ?

⁸ Lɛni na bina bati bábla uwi ɔni lɛ́tala-ma lɛ́siku Kades-Barnea ka bésie bátánu kalɔ kammɔ.

⁹ Uwi ɔni na bésie Eskol Kɔwɛ kemmo na bénye mmɔ bánu kalɔ kammɔ kemmo ni, bénwini bébo na bábaƒɛ Israelƒuɔ bammɔ enu kalɛ na basɔ balakana kalɔ kani Unwoti úti úte-ma kemmo buduo.

¹⁰ Na limeyi lɛmmɔ Unwoti kɔnyi kɔ́kɔ katɔ na úse kenye ɔnini,

¹¹ ‘Ka bekyuli bammɔ béteti bana kayi ƒui bátasiaku-mi ɔsu ni, banana bani ƒui nákɛ akwa aavlanyɔ ku kama na báta bási Egyipte kalɔ lɛlɔ ɔdi biala ulanu kalɔ kani líse kenye ka meti mete Abraham ku Isak ku Yakob mmɔ.

¹² Ɔdi biala ulanu-ka amu ntu Kenesini Yeƒune ubidi Kaleb ku Nun ubidi Yosua lɛti, ɔsika ama kani néti bana kayi ƒui básiaku Unwoti kama.’

¹³ Na ɔmmɔ ɔsu Unwoti úti kɔnyi kpakplaa ɔ́kya Israelƒuɔ na ɔ́ya na bakɛ baaka taamana ketele kalɔ kakwiidi kammɔ kemmo akwa aavlene sɔɔn útédu ka kaba kani bekyuli nábla likpidi na Unwoti anumi békpi báyii udu.

¹⁴ “Aanu amii bekyuli bekpidi bamɛni lɛnɔ ka bɛsiaku bina bati ɔbladu ɔmmɔ kani kama na bɛɛyá na Unwoti kɔnyi kɔsɔ kɔkɔ-nwu katɔ kubu na Israelƒuɔ lɛlɔ.

¹⁵ Si bínwini kama bɛ́kya Unwoti ni, ɔdubo bekyuli bamɛni ƒui bɔda bɔkya ketele kalɔ kakwiidi kamɛni kemmo, na amii náya na bekyuli bammɔ ƒui badubo bɔyii udu.”

¹⁶ Mmɔ na báni béde Mose na básu-nwu banini, “Te-bu kuƒi na bɔtu ayu bute bula bebuo na bɔda lɛma linengudi bute bula beleku ku bebi na mɛni.

¹⁷ Nsu abu bɔ́klibi lɛlɔ ka bɔtu akpagya na abu ku Israelƒuɔ butékpo kekpo biala wetédu ka ama lɛnɔ bákɛ bana keliekɔ. Na ɔƒɛni ni, bula beleku ku bebi badubɔsɔ bulie lɛma linengudi lɛni bɔ́tu awodu bɔ́mana mɛni kemmo kalɛ kalɔ kammɔ bekyuli balakana-ma lɛla lɛdi bubabla.

¹⁸ Na bɔɔɔdubo bunwini busie bula kaduli utédu ka Israelni biala ɔ́kɛ nwuna kadikɔ.

¹⁹ Na abu bulawia kadikɔ kadi bulásiku-ma kudɔ na Yordan ɔvi ɔmmɔ. Ɔsika abu bɔ́ɔkɛ bula kadikɔ na Yordan ɔƒɛ katukɔ kakɛ.”

²⁰ Amu na Mose údie kenye ɔnini, “Si lɛla lɛni bɛ́su mɛni lɛdi sɔsɔ na Unwoti anumi mɛni ka binye kagyumana ka bisie bitékpo,

²¹ na bina banana bekpone badubɔvia Yordan besie betékpo na Unwoti ɔda bubo kalɔ wetédu ka Unwoti ɔ́di bina bekisine ƒui lɛlɔ ni,

²² bibo kuƒi ka binwini bibo na lɛla lɛdi lɛsɔ lɛɛɛda-mii na Unwoti iye Israelƒuɔ anumi. Na kalɔ kamɛni kadubunwini bina kadikɔ na Unwoti anumi.

²³ “Nsu si bɛ́nyi ɔkɔ na bítesie bítetékpo bɔdi ni, na bɛnu bɛti ka bɛ́bla likpidi na lɛdubo-mii budie bute.

²⁴ Bɛda lɛma linengudi bite bina beleku ku bebi na bɛ́tu ayu bite bina bebuo. Nsu bɛnu ka bɛ́di kenye kani na bíse lɛlɔ.”

²⁵ Amu na Gadƒuɔ ku Rubenƒuɔ básu Mose banini, “Ati, ƒula kabla bablane na bɔdi, bɔdubɔbla kalɛ kani na ébo-bu ɔda.

²⁶ Na bula beleku ku bebi ku bebuo badubɔsɔ bakya Gilead mɛni.

²⁷ Nsu bula ƒui bunye kagyumana ka busie kekpo na Unwoti ɔda bubo kenye. Na bɔdubɔvia Yordan na butékpo aani kalɛ kani awɔ bula ati ásu.”

²⁸ Anwuɔsu Mose ubo ɔkpane Eleasar ku Nun ubidi Yosua ku Israelƒuɔ batɔnkune ɔda

²⁹ na ɔ́su-ma ɔnini, “Si Gadƒuɔ ku Rubenƒuɔ ɔnana biala ɔ́klibi lɛlɔ úte kekpo na bɛ́via Yordan Ketu amii ku-ma na Unwoti anumi na bítádi kalɔ kammɔ lɛlɔ ni, na biti Gilead kalɔ kammɔ bite-ma na kenwini bana kadikɔ.

³⁰ Nsu si bátavia Yordan Ketu na amii ku-ma bisie betékpo ni, na amii ku-ma bile Kanaan kalɔ kammɔ.”

³¹ Amu na Gadƒuɔ ku Rubenƒuɔ bédie kenye banini, “Abu bɔdubɔbla lɛla biala na Unwoti úbo-bu ɔda.

³² Na nwuna ɔda bubo lɛlɔ ni, bɔdubɔtu akpagya na bɔvia Yordan Ketu busie Kanaan kalɔ lɛlɔ butékpo. Kalɛ na bula kadikɔ kani nkya Yordan ɔƒɛ katukɔ kabla bula kadi.”

³³ Anwuɔsu Mose úti Amoriƒuɔ Ɔga Sihon ku Basanƒuɔ Ɔga Og lɛgakadikɔ kalɔ ku lɛma lɛni nkya amadɔ mmɔ ƒui úte Gad ku Ruben kaba ku Yoseƒ ubidi Manase kaba bekyuli.

³⁴ Na Gadƒuɔ básɔkɔ lɛma lɛdi bátu bámana kpakplaa ku awodu na lɛma lɛmmɔ ndi Dibon ku Atarot ku Aroer

³⁵ ku Atrot-Soƒan ku Yaser ku Yogbeha

³⁶ ku Bet-Nimra ku Bet Haran lɛma, na bátu ayu béte bana baƒonu.

³⁷ Na Rubenƒuɔ kaba bekyuli bátu Hesbon ku Eleale ku Kiriataim

³⁸ ku Nebo ku Baal-Meon ku Sibma lɛma. Na lɛma lɛni básɔku bátu mɛni básia-ni anyi.

³⁹ Manase ubidi Makir kaba bekyuli báta bésie Gilead na bétékpo bádi-ma lɛlɔ. Na bábɔku Amoriƒuɔ bani nlie mmɔ.

⁴⁰ Anwuɔsu Mose úti Gilead úte Makirƒuɔ bani ndi Manase kaba bekyuli na béti mmɔ bénwini bana kadikɔ.

⁴¹ Na Manase kaba kemmo ubi ɔni balɔ Yair ɔ́ta na útékpoku bekyuli badi na akpaklɔ adi kemmo na ɔ́sia akpaklɔ ammɔ anyi ɔnii Yair Akpaklɔ.

⁴² Na Noba lɛnɔ úsie na útékpoku Kenatƒuɔ ku bana akpaklɔ lɛma na úti nwuna lɛnyi ɔ́sia akpaklɔ ammɔ.