Bumomo Bɔka 30 - Katɔti Ɔku Kedee

Kenye Busie Lɛlɔ Ɔda Bubo

¹ Amu na Mose ɔ́su Israelƒuɔ kaba batɔnkune ƒui ɔnini, “Unwoti uubó-mii ɔnii,

² ‘Si ukyuli ɔdi úse Unwoti kenye kadi iye ɔ́kpali ala ɔ́su lɛla lɛdi únyimi lɛlɔ na nwuna anumi ka wabla lɛla lɛdi ni, útalɛka ɔlɛ nwuna litemi kama mmomu ɔlɛka ɔsia anumi na ɔdi lɛla lɛmmɔ lɛlɔ ute Unwoti lɛni kani.

³ “ ‘Si ugblebi ɔni na uli ɔti kaduli úse Unwoti kenye kadi iye ɔ́kpali ala ɔ́su lɛla lɛdi únyimi lɛlɔ na lɛla lɛdi lɛlɔ

⁴ na ɔti únu-nwu linyese iye ala bɔkpali bɔmmɔ na útabala-nwu iye ɔsu-nwu lɛla lɛdi ni, linyese iye lɛla biala na ɔ́kpali ala ɔ́su lɛdubunye lɛni kani.

⁵ Nsu si ɔti úbulo lɛla lɛmmɔ úte-nwu ni, ugblebi ɔmmɔ linyese iye ala bɔkpali bulebo-nwu kemmo bulete-nwu lɛni na Unwoti lɛnɔ ulásia-nya kɔnu, ɔsika ɔti úbulo lɛla lɛmmɔ úte-nwu.

⁶ “ ‘Na si ugblebi ɔmɛni úse kenye kadi iye ɔ́babla ɔ́kpali ala kama na útélie kɔgya

⁷ na ɔgyani únu ɔmɛni nsu útasu lɛla lɛdi ni, ala ani na ɔ́su adububo-nwu kemmo lɛni.

⁸ Nsu si uwi ɔni na ɔgyani únu ala amɛni na úbulo úte-nwu ni, úbile linyese ku ala ani na ɔ́kpali únyimi lɛlɔ mmɔ ƒui kemmo na Unwoti lɛnɔ ɔsɔ ulasia-nya kɔnu.

⁹ “ ‘Na kenye biala na ukpinele iye uleku ɔni na ɔgyani ɔ́nyonu-nwu ɔdubuse ni, lɛla lɛmmɔ lɛdubo-nwu bunyimi lɛni kani.

¹⁰ “ ‘Si uleku ɔni na uliku ɔgyani úse kenye iye ɔ́kpali ala ɔ́su lɛla lɛdi,

¹¹ na ɔgyani únu kenye kani na úse mmɔ nsu útasu-nwu lɛla lɛdi iye ubulo ute-nwu ni, na kenye kani na úse mmɔ ku ala ani ndanku-nya adububo-nwu kemmo.

¹² Nsu si ɔgyani únu linyese lɛmmɔ ku ala ani na ɔ́kpali únyimi lɛlɔ mmɔ na úni-nya úte-nwu ni, úbile kenye kammɔ na Unwoti lɛnɔ ulasia-nya kɔnu.

¹³ Na ɔgyani ubo kenyekɔ biala na ubile linyese lɛmmɔ kemmo iye ɔsia-ni kɔnu.

¹⁴ Nsu si ɔgyani útasu-nwu lɛla lɛdi limeyi limodi lɛmmɔ útalɛ kadi bugye ni, na ɔɔtina ka anwu lɛnɔ ɔ́sia linyese ku ala bɔkpali bɔmmɔ kɔnu ka ulekudi linyese lɛmmɔ linye sɔsɔ ka únu na útasu lɛla lɛdi ɔsu.

¹⁵ Nsu si unu kenye kammɔ na uwi ɔdi kama asa na úbeni-ka ni, na uleku bɔƒiɔ bɔmmɔ bɔkɛ-nwu.’ ”

¹⁶ Ɔda bubo bɔmɛni na Unwoti úte Mose ɔkɛnku kɔna kɔni na ɔlɛ ka kɔkya ɔnana ku ulekudi ku ɔnana ku ubidi ulekubi ɔni na ɔmu ulie-nwu kudɔ ntɛ.