Bumomo Bɔka 3 - Katɔti Ɔku Kedee

Lewiƒuɔ Lɛlɔ Kɔtɛ

¹ Ɔmɛni ndi Aaron ku Mose kɔduli bekyuli lɛlɔ etemila na uwi ɔni na Unwoti ɔ́tɛmiku Mose na Sinai kɔbi lili.

² Aaron bebi anyi ndi Nadab ɔni ndi Aaron ubidi udeedi ku Abihu ku Eleasar ku Itamar.

³ Na bekyuli bamɛni ndi Aaron bebi bani na béwi-ma likpose nnɔmii lili ka benwini bakpane.

⁴ Nsu Nadab ku Abihu ama békpi kɔnakunwi na Unwoti anumi na Sinai ketele kalɔ kakwiidi kemmo, ɔsika béti ogya ɔni lɛlɔ na bétete kuƒi bákyula akpala béte Unwoti. Nkyuli inyɔ bammɔ beeebo bebi badi, anwuɔsu Eleasar ku Itamar kani nábla bakpane kabla uwi ɔni na Aaron ɔni ndi bana ɔti úlie ngba.

⁵ Ɔmmɔ kama Unwoti ɔ́su Mose ɔnini,

⁶ “Kpanku Lewi kaba bekyuli boku na eti-ma abatina Aaron ɔni ndi ɔkpane na beteebunku-nwu.

⁷ Na ama ndubo kabla butaabla teebunku-nwu, na bataabla bana kadi bekyuli ƒui kabla teete-ma na Kasakɔ Kevo mmɔ na Unwoti Adi Kevo kemmo.

⁸ Na ama ndubo ala ani ƒui nkya mmɔ lɛlɔ butaanu. Na benye bana kadi Israelƒuɔ kenye bataabla ala ani lɛlɔ ɔda na Unwoti úbo-ma na Unwoti Adi Kevo kammɔ kemmo.

⁹ Ti Lewiƒuɔ bammɔ te Aaron ku nwuna bebi bananabi. Ama kani ndi Israelƒuɔ kaba bekyuli bani na ɔlɛka bedie bese sɛsɛɛ ƒui bete-mi.

¹⁰ Na aƒuna Aaron ku nwuna bebi na bataabla bakpane kabla. Na ukyuli bamba biala ɔni makpɛ mede kevo kammɔ ni, ɔlɛka badu-nwu.”

¹¹ Amu na Unwoti ɔ́su Mose ɔnini,

¹² “Lídie Lewiƒuɔ bammɔ líse líte lɛlɔ aani Israelni uleku biala ɔnanabi udeedi ɔni na ɔ́wɔ. Anwuɔsu Lewiƒuɔ badi mina badi,

¹³ ɔsika ubi udeedi biala ɔdi mina ɔdi. Uwi ɔni na lɛ́du Egyipteni ubi udeedi biala na Egyipte ni, mmɔ na lídie Israelni ubi udeedi biala, ɔnana ɔdi o-o, iye ebuo na ɔdi o-o líse sɛsɛɛ líse líte lɛlɔ, na ɔlɛka benwini mina badi. Ami ndi Unwoti.”

¹⁴ Amu na Unwoti ɔ́sɔ ɔ́su Mose na Sinai ketele kalɔ kakwiidi kemmo mmɔ ɔnini,

¹⁵ “Ka Lewiƒuɔ bammɔ ƒui ɔ́si bana kɔduli útédu kɔdua lɛlɔ. Na aka ubi ɔnanabi biala na ɔ́ɔkɛ ɔ́si kɔbuli ku kama.”

¹⁶ Anwuɔsu Mose lɛnɔ ɔ́ka-ma aani kalɛ na Unwoti úbo-nwu ɔda.

¹⁷ Na Lewi bebi bananabi anyi ndi Gerson ku Kehat ku Merari.

¹⁸ Na Gersonƒuɔ kaba ndi Libni ku Simel.

¹⁹ Na Kehatƒuɔ adua ndi Amram ku Isehar ku Hebron ku Usiel.

²⁰ Na Merariƒuɔ adua ndi Mahli ku Musi. Na bamɛni ndi Lewiƒuɔ adua ammɔ na bana atɔƒi kenye.

²¹ Na Gerson badi ndi Libni ku Simel adua. Na ama ndi Gerson adua ammɔ bekyuli.

²² Na bana bumomo ƒui ɔ́si bananabi bani náaƒɔ kɔbuli kunwi ku kama badi mpim maatɛ ku eti leevu (7,500).

²³ Na Gersonƒuɔ adua bekyuli bamɛni ndubulie Katɔti Katɔma Kedee kammɔ kama na ɔƒɛ kanukɔ kakɛ.

²⁴ Na bana ɔtɔnkune ndi Lael ubidi Eliasaƒ.

²⁵ Na Gersonƒuɔ adua bekyuli bammɔ ndubo Adi Kevo kesii kani na Katɔti ɔɔsiáku-ma mmɔ ku Katɔma Kedee kammɔ lɛlɔ butaanu ku ala ani bébi kevo kammɔ ku kayakun bonwu kammɔ kɔdi kɔni nƒa.

²⁶ Na banu adiku ani nƒa kaduli kammɔ kemmo ku kana kayakun ámana katɔma kedee kammɔ ku lɛkpabi lɛmmɔ lɛlɔ, ku kevo kammɔ lɛbuli ku kuna lɛlɔ ala ƒui lɛlɔ.

²⁷ Na Kehat adua ammɔ ndi Amramƒuɔ ku Iseharƒuɔ ku Hebronƒuɔ ku Usielƒuɔ.

²⁸ Na bananabi bani náakɛ kɔbuli ku kama bumomo bɔdi mpim maane ku eti leevu-anyɔ (8,600). Na Kehat adua bekyuli bamɛni kabla ndi ka banu katɔma kedee kammɔ lɛlɔ.

²⁹ Na ɔlɛka adua ammɔ bekyuli bamɛni belie besie Unwoti kakpakɔ kammɔ kada kakɛ.

³⁰ Na bana kɔduɔti ndi Usiel ubidi Elisaƒan.

³¹ Na bana kabla ndi ka bataanu Bunyimi Adaka ɔmmɔ lɛlɔ ku ala kasiakɔ ku asogya kasiakɔ ku lɛkpabi lɛmmɔ ku kɔtɔma kedee kammɔ kemmo lɛlɔ ala ƒui lɛlɔ ku lɛdiku lɛni nƒa kayakun kammɔ lɛlɔ.

³² Na Lewiƒuɔ bammɔ ɔtɔnkune ƒui ndi Aaron ubidi Eleasar ɔni ndi ɔkpane. Na anwu báƒuna bése ka utaanu bekyuli bani mɔɔnu kakpakɔ kammɔ lɛlɔ lɛlɔ.

³³ Ɔƒɛni Mahli ku Musi adua bekyuli ni, ama ndi Merariƒuɔ.

³⁴ Na bana bananabi ƒui bumomo ɔ́si bani náakɛ kɔbuli kunwi ku kama badi mpim ɛku ku eti ene (6,200).

³⁵ Na Merariƒuɔ adua amɛni ƒui kɔduɔti ndi Abihail ubidi Suriel. Na ama badubulie Adi Kevo kammɔ katɔ kakɛ.

³⁶ Báƒuna Merariƒuɔ bamɛni ka bataanu Kevo kammɔ ligyii ku lɛtalagyii ku akpa ku ligyii lɛni ndanku-kakpakɔ bule kɔdi ku ala ani ƒui ndanku kabla kammɔ lɛlɔ ala lɛlɔ.

³⁷ Na ama kani ndubo bɔnu ligyii akpa ku nina lɛka ƒui lɛni ámana kevo kammɔ ku ewele ku kɔbuli kɔni mɔɔda kevo kammɔ teenyene kana ɔka lɛlɔ kaduɛ mmɔ lɛlɔ.

³⁸ Na Mose ku Aaron ku nwuna bebi ndubo ɔtɔ ɔmmɔ anumi kakɛ kesii kani nésie ɔƒɛ katukɔ kakɛ bulie. Na ama ndubo katɔma kedee kammɔ lɛlɔ butaanu na Israelƒuɔ bammɔ kenye. Na ukyuli bamba biala ɔni ndubɔni ude mmɔ ɔdi ka badu-nwu.

³⁹ Na Lewiƒuɔ banana bani na Mose ku Aaron báka ɔ́si bani náakɛ ɔ́si kɔbuli kunwi ku kama aani kalɛ na Unwoti úbo-ma ɔda kalɛ bumomo bɔdi mpim aavlanyɔ-inyɔ (22,000).

⁴⁰ Amu na Unwoti ɔ́su Mose ɔnini, “Ka Israelƒuɔ bebi bedeedi bani na báwɔ ɔ́si kɔbuli kunwi kama na enweni-ma anyi ese.

⁴¹ Na edie Lewiƒuɔ bani nkya-ma akɔ ese sɛsɛɛ ete-mi. Na eti-ma enyene Israelƒuɔ bebi bedeedi bammɔ kenye. Na eti Lewiƒuɔ bebuo bebi bedeedi lɛnɔ enyene Israelƒuɔ bebuo bebi bedeedi kenye ete-mi. Ami ndi Unwoti.”

⁴² Anwuɔsu Mose ɔ́ka Israelƒuɔ bebi bedeedi aani kalɛ na Unwoti úbo-nwu ɔda.

⁴³ Na bebi bedeedi bammɔ ɔ́si kɔbuli kunwi ku kama bumomo aani kalɛ bénweni-ma anyi badi mpim aavlanyɔ-inyɔ ku eti alɔ ku aavlanyɔ-ɛtɛ (22,273).

⁴⁴ Amu na Unwoti ɔ́sɔ ɔ́su Mose ɔnini,

⁴⁵ “Die Lewiƒuɔ nyene Israelƒuɔ kenye. Na edie Lewiƒuɔ bebuo enyene Israelƒuɔ bebuo kenye. Ami ndi Unwoti.

⁴⁶ Ka Lewiƒuɔ bamɛni bumomo bútedu Israelƒuɔ bebi bananabi bedeedi eti alɔ ku aavlanyɔ-ɛtɛ (273) bani návia Lewiƒuɔ bammɔ bumomo na bédu na baƒɔ bana ƒui lili ngba ɔsu ni,

⁴⁷ ƒɔ sika ɔƒualadi ebi alɔ na kakpakɔ ala bɔkɔku kenye na bani návia mmɔ ɔdi biala lili.

⁴⁸ Na eti egulabi ammɔ ete Aaron ku bebi bananabi aani Israelƒuɔ bebi bakladi bammɔ ngba bɔƒɔ lili kayu.”

⁴⁹ Mose lɛnɔ ɔ́bla ɔ́sia kalɛ Unwoti úbo-nwu ɔda, na ɔ́ƒɔ sika ɔƒualadi na Israelƒuɔ bebi bedeedi bakladi bammɔ ƒui lili.

⁵⁰ Na úti sika ɔƒualadi bumomo bɔni mabla aani edula ebi akyami maatɛ unu na kakpakɔ bɔkɔku kenye mmɔ

⁵¹ úte Aaron ku nwuna bebi bananabi kalɛ na Unwoti úbo-nwu ɔda.