Bumomo Bɔka 28 - Katɔti Ɔku Kedee

Limeyi Ndi Limeyi Akpala Bɔbla Bute Unwoti

¹ Amu na Unwoti ɔ́su Mose ɔnini,

² “Bo ɔda te Israelƒuɔ anini, ‘Bitaabla akpala teete-mi na uwi ɔni líse-mii lɛlɔ limeyi ndi limeyi. Na akpala ammɔ uyɔ ɔnyi ƒɛƒɛɛ ɔyɔ-mi kaƒɔ.’

³ “Na akpala amɛni na ɔlɛka biteeti taabla limeyi ndi limeyi akpala teete ami Unwoti. Bɛwia baƒonu bagyani inyɔ bani náakɛ lɛkwa linwi limeyi ndi limeyi na bɔsɔ bɔdi buuubo-ma lɛlɔ.

⁴ Na bɛdu unwi ɔtanta na bɛdu unyɔdi useyi uwi.

⁵ Na akpala biala kemmo ni, bɛwia edula ebi ɔlaaƒɔ akyami anyɔ na bɛwia nnɔ bɔni bɔdia geen lɛɛƒɛɛ inyɔ bɛsala-nwu kemmo.

⁶ Na ɔmɛni ndi limeyi ndi limeyi akpala ani bálɛ ugyii na Sinai kɔbi lɛlɔ. Na uyɔ ɔmmɔ ɔnyi ƒɛƒɛɛ ɔyɔ Unwoti kaƒɔ.

⁷ Na ɔtanta koƒonu kɔni bɛdubo buti bɔbla akpala ammɔ ni, bɛwia ntɛ bɔni bébulo lɛɛƒɛɛ inyɔ na biwilimi biwi lɛkpabi lɛmmɔ lɛlɔ.

⁸ Na useyi koƒonu kɔni lɛnɔ bɛdubo buti bɔbla akpala lɛnɔ biti edula ebi ntɛ bumomo bɔni bíti bɛ́bla ɔtanta akpala ammɔ lɛni kani. Na akpala amɛni lɛnɔ adi edula ebi akpala, na uyɔ ɔmmɔ ɔnyi ƒɛƒɛɛ ɔyɔ Unwoti kaƒɔ.

Lɛnwunameyi Akpala

⁹ “ ‘Na lɛnwunameyi lɛlɔ ani ni, bɛwia baƒonu bagyani inyɔ bani nákɛ lɛkwa na bɔsɔ bɔdi buuubo-ma lɛlɔ ku ntɛ ku edula ebi ɔlaaƒɔ akyami ene na beti nnɔ basala-nwu kemmo.

¹⁰ Na bɔkyula akpala amɛni na badubo butaabla lɛnwunameyi biala lɛlɔ úti úbunku limeyi ndi limeyi bɔkyula akpala ku ntɛ akpala ani badubo butaabla lɛlɔ.

Kɔbuli Kɔbuli Akpala

¹¹ “ ‘Na limeyi lideedi na kɔbuli biala kalɔ kesekɔ ni, na bawia bakɔ bakɔdi inyɔ ku koƒonu kɔgyani kunwi ku baƒonu bebi maatɛ bani nákɛ lɛkwa na bɔsɔ bɔdi buuubo-ma lɛlɔ na beti babla bɔkyula akpala bete Unwoti.

¹² Na akɔ ɔkɔdi biala badubo bɔbla akpala ni, na bawia edula ebi ɔlaaƒɔ akyami aku na bɛsala-nwu ku nnɔ. Na koƒonu akpala bawia kakpa akyami ene na bawia ɔlaaƒɔ ɔni muukeye na beti nnɔ basala-nwu kemmo.

¹³ Na baƒonubi maatɛ bammɔ ni, bawia kakpa akyami anyɔ bite koƒonu biala. Na ɔmɛni unye ute bɔkyula akpala, na uyɔ ɔmmɔ ɔnyi ƒɛƒɛɛ ɔyɔ Unwoti kaƒɔ.

¹⁴ Na akɔ biala ɔlɛka beti ntɛ lɛɛƒɛɛ ine babla akpala ammɔ. Na koƒonu akpala ɔlɛka beti ntɛ lɛɛƒɛɛ ɛtɛ babla-nya. Na koƒonu ubi biala akpala ɔlɛka beti ntɛ lɛɛƒɛɛ inyɔ babla-nya. Na ɔmɛni ndi kɔbuli kɔwɔdi biala bɔkyula akpala ani badubo butaabla lɛkwa kemmo.

¹⁵ Uti ubunku limeyi ndi limeyi akpala ku ntɛ bɔni badubo butaawia. Na beti ese babla likpidi lili buvele akpala bete Unwoti.

Kukpi Lili Bɔvia Emeyi Bɔdi

¹⁶ “ ‘Na limeyi leevu-linedi biala na kɔbuli kudeedi lɛlɔ ni, ɔlɛka badi Unwoti Kukpi Lili Bɔvia Limeyi.

¹⁷ Na limeyi leevu-lɛlɔndi na kɔbuli kɔmmɔ kemmo kani na beti emeyi maatɛ badi emeyi bete Unwoti. Na emeyi ammɔ bɔdi kemmo ni, ɔdi utadi bodobodo ɔni na bɔnyii bɔkya-nwu kemmo.

¹⁸ Na limeyi lideedi lɛlɔ ni, bɛsa bɔsa kedee na mina lɛnyi lɛlɔ na ɔdi utabla limeyi ndi limeyi kabla kadi.

¹⁹ Na beti bakɔ inyɔ ku koƒonu kɔgyani kunwi ku baƒonubi maatɛ bani nákɛ lɛkwa na bɔsɔ bɔdi buuubo-ma lɛlɔ na beti babla bɔkyula akpala bete Unwoti.

²⁰ Na akɔ biala badubuti babla akpala ni, na bawia edula ebi akyami aku na beti nnɔmii basala-nwu kemmo na beti babla akpala. Na koƒonu akpala na beti kakpa akyami ene

²¹ na baƒonubi maatɛ bammɔ ni, bawia kakpa akyami anyɔ bite koƒonu biala.

²² Na biti ketukpa kenwi bɛbla likpidi lili buvele akpala na Unwoti udie likpidi kɔtu bɔni bina lɛlɔ.

²³ Na bɛbla ɔmɛni bibunku ɔtanta bɔkyula akpala ani badubo butaabla lɛlɔ.

²⁴ Na lɛni badubo adila ani bebeti bataabla bɔkyula akpala limeyi biala na emeyi maatɛ ammɔ ƒui kemmo. Na uyɔ ɔmmɔ ɔnyi ƒɛƒɛɛ ɔyɔ Unwoti kaƒɔ. Na ɔlɛka banwa adila ammɔ bebunku bɔkyula akpala ku ntɛ akpala ani baayɔ́ bɔbla lɛlɔ.

²⁵ Na limeyi maatɛdi lɛlɔ ni, bɛsa bɔsa kedee na mina lɛnyi lɛlɔ na ɔdi utabla limeyi ndi limeyi kabla kadi.

Edula Bɔƒɛ Limeyi Bɔdi

²⁶ “ ‘Na limeyi lɛni bɛdubuti bina edula edeedi ani bɛ́ƒɛ busienku Unwoti na Edula Bɔƒɛ Limeyi Bɔdi lɛlɔ ni, bɛsa bɔsa kedee na mina lɛnyi lɛlɔ na ɔdi utabla limeyi ndi limeyi kabla kadi.

²⁷ Na bɛwia bakɔ bakɔdi inyɔ ku koƒonu kɔgyani kɔkɔdi kunwi ku baƒonu bebi maatɛ bani náakɛ lɛkwa linwi na biti bɛbla bɔkyula akpala, na uyɔ ɔmmɔ ɔnyi ƒɛƒɛɛ ɔyɔ Unwoti kaƒɔ.

²⁸ Na akɔ biala ni, ɔlɛka bɛwia edula ebi ɔlaaƒɔ akyami aku na biti nnɔ bɛsala-nwu kemmo bɛbla akpala ammɔ. Na koƒonu kɔgyani kɔmmɔ ni, biti ɔlaaƒɔ akyami ene.

²⁹ Na baƒonu bagyani bakɔdi maatɛ bammɔ ni, kɔdi biala akyami anyɔ.

³⁰ Na biti ketukpa kenwi bibunku na biti bɛbla likpidi lili buvele akpala úte likpi kɔtu bɔni budie bina lɛlɔ.

³¹ Bitaabla ala amɛni ku ana lɛlɔ ntɛ akpala úbunku limeyi ndi limeyi akpala bɔkyula ku edula ebi akpala ammɔ lɛlɔ. Na bɛnu ka bebuo bani biiti teeboku ɔdi útasɔ.’ ”