Bumomo Bɔka 26 - Katɔti Ɔku Kedee

Báka Israelƒuɔ Kunyɔdi

¹ Na ɔlɛ ɔmmɔ kama ni, Unwoti ɔ́su Mose ku ɔkpane Aaron ubidi Eleasar ɔnini,

² “Bɛka Israelƒuɔ bammɔ bani nákɛ akwa aavlanyɔ ku kama na bédu kekpo busie. Na bɛka-ma na kɔduli kenye.”

³ Anwuɔsu uwi ɔni na bakya Moab kalɔ ƒiaa lɛlɔ na Yordan Ketu kɔtu ni, Mose ku ɔkpane Eleasar bétemi béte bekyuli bammɔ banini,

⁴ “Bɛka banana bani nákɛ akwa aavlanyɔ ku kama bɛnu aani kalɛ Unwoti úbo Mose ɔda.” Bekyuli bani nálɛ bási Egyipte kalɔ lɛlɔ ndi bamɛni.

⁵ Ruben ɔni ndi Israel ubi udeedi kaba bekyuli ndi bamɛni. Hanok ɔdanku Hanokƒuɔ. Palu ɔdanku Paluƒuɔ.

⁶ Hesron ɔdanku Hesronƒuɔ. Karmi ɔdanku Karmiƒuɔ.

⁷ Na bammɔ ndi Ruben kaba bekyuli. Na bana bumomo bɔdi mpim aavlene-ɛtɛ eti leevu-ene (43,730).

⁸ Na Palu ubidi ndi Eliab.

⁹ Na Eliab bebi ndi Nemuel ku Datan ku Abiram. Na Datan ku Abiram bamɛni ndi bekyuli bani nátaadɔnku Mose ku Aaron. Na bebunku Kora lɛkpa bekyuli bani náta benye Unwoti lɛlɔ.

¹⁰ Na ama ndi bekyuli bani kalɔ kébimi kenye na kébweli-ma mmɔ ku Kora kama basiakune nkyuli eti alɔ (250) bani na ogya ɔ́kyula-ma mmɔ. Na bénwini likposela béte Israelƒuɔ ka bati lɛlɔ kalɛ.

¹¹ Nsu Kora bebi ama bátasa bukpi ƒui.

¹² Na Simeon kaba bekyuli na bana adua ammɔ kenye ndi bamɛni. Nemuel ɔdanku Nemuelƒuɔ. Yamin ɔdanku Yaminƒuɔ. Yakin ɔdanku Yakinƒuɔ.

¹³ Sera ɔdanku Seraƒuɔ. Saul ɔdanku Saulƒuɔ.

¹⁴ Na bammɔ ndi Simeon kaba bekyuli. Na bana banana bumomo bɔdi mpim aavlanyɔ-inyɔ ku eti ene (22,200).

¹⁵ Na Gad kaba bekyuli na bana adua ammɔ kenye ndi bamɛni. Seƒon ɔdanku Seƒonƒuɔ. Hagi ɔdanku Hagiƒuɔ. Suni ɔdanku Suniƒuɔ.

¹⁶ Osni ɔdanku Osniƒuɔ. Eri ɔdanku Eriƒuɔ.

¹⁷ Arod ɔdanku Arodƒuɔ. Areli ɔdanku Areliƒuɔ.

¹⁸ Na bammɔ ndi Gad kaba bekyuli. Na bana bumomo bɔdi mpim aavlene ku eti leevu (40,500).

¹⁹ Er ku Onan, badi Yuda bebi nsu ama békpi na Kanaan kalɔ lɛlɔ.

²⁰ Na Yuda kaba bekyuli na bana adua ammɔ kenye ndi bamɛni. Sela ɔdanku Selaƒuɔ. Peres ɔdanku Peresƒuɔ. Sera ɔdanku Seraƒuɔ.

²¹ Na Peres kɔdua bekyuli badanku bamɛni. Hesron ɔdanku Hesronƒuɔ. Hamul ɔdanku Hamulƒuɔ.

²² Bammɔ ndi Yuda kaba bekyuli. Na bana bumomo bɔdi mpim liti ku aavlanyɔ-ɛku ku eti leevu (76,500).

²³ Na Isakar kaba bekyuli na bana adua ammɔ kenye ndi bamɛni. Tola ɔdanku Tolaƒuɔ. Puwa ɔdanku Puwaƒuɔ.

²⁴ Yasub ɔdanku Yasubƒuɔ. Simron ɔdanku Simronƒuɔ.

²⁵ Na bammɔ ndi Isakar kaba. Na bana bumomo bɔdi mpim liti ku leevu-ine ku eti aku (64,300).

²⁶ Na Sebulon kaba bekyuli na bana adua ammɔ kenye ndi bamɛni. Sered ɔdanku Seredƒuɔ. Elon ɔdanku Elonƒuɔ. Yakleel ɔdanku Yakleelƒuɔ.

²⁷ Na bammɔ ndi Sebulon kaba bekyuli. Na bana banana bumomo bɔdi mpim liti ku leevu ku eti leevu (60,500).

²⁸ Na Yoseƒ kaba kani nkɛnku Manase ku Eƒraim lɛlɔ.

²⁹ Manase kaba bekyuli ndi bɔmɛni. Makir ɔdanku Makirƒuɔ, na Makir ɔ́wɔ Gilead. Gilead ɔdanku Gileadƒuɔ.

³⁰ Gilead kaba bekyuli na bana adua ammɔ kenye ndi bamɛni. Yeser ɔdanku Yeserƒuɔ. Helek ɔdanku Helekƒuɔ.

³¹ Asriel ɔdanku Asrielƒuɔ. Sekem ɔdanku Sekemƒuɔ.

³² Heƒer ɔdanku Heƒerƒuɔ.

³³ Heƒer ubidi Seloƒehad uuubo bebi bananabi. Bebi belekubi kani na ɔ́wɔ na bana anyi ndi Mahla ku Noa ku Hogla ku Milka ku Tirsa.

³⁴ Na bammɔ ndi Manase kaba bekyuli. Na bana banana bumomo bɔdi mpim liti ku inyɔ eti leevu-ene (52,700).

³⁵ Na Eƒraim kaba bekyuli na bana adua ammɔ kenye ndi bamɛni. Sutela ɔdanku Sutelaƒuɔ. Beker ɔdanku Bekerƒuɔ. Tahan ɔdanku Tahanƒuɔ.

³⁶ Sutela bebi ndi bɔmɛni. Eran ɔdanku Eranƒuɔ.

³⁷ Na bammɔ ndi Eƒraim bebi kaba. Na bana banana bumomo bɔdi mpim avlaatɛ-inyɔ ku eti leevu (32,500). Bamɛni ndi Yoseƒ kaba bekyuli.

³⁸ Na Benyamin kaba bekyuli na bana adua ammɔ kenye ndi bamɛni. Bela ɔdanku Belaƒuɔ. Asbel ɔdanku Asbelƒuɔ. Ahiram ɔdanku Ahiramƒuɔ.

³⁹ Suƒam ɔdanku Suƒamƒuɔ. Huƒam ɔdanku Huƒamƒuɔ.

⁴⁰ Bela bebi ndi Ard ku Naaman. Ard ɔdanku Ardƒuɔ. Naaman ɔdanku Naamanƒuɔ.

⁴¹ Na bammɔ ndi Benyamin kaba bekyuli. Na bana banana bumomo bɔdi mpim aavlene-ɛlɔ ku eti leevu-anyɔ (45,600).

⁴² Na Dan kaba bekyuli na bana adua ammɔ kenye ndi bamɛni. Suham ɔdanku Suhamƒuɔ. Na bammɔ ndi Dan kaba bekyuli.

⁴³ Suhamƒuɔ kaba bani báka bana bumomo bɔdi mpim liti ku leevu-ine ku eti maane (64,400).

⁴⁴ Na Aser kaba bekyuli na bana adua ammɔ kenye ndi bamɛni. Yimna ɔdanku Yimnaƒuɔ. Isui ɔdanku Isuiƒuɔ. Beria ɔdanku Beriaƒuɔ.

⁴⁵ Beria kaba ndi bamɛni. Heber ɔdanku Heberƒuɔ. Malkiel ɔdanku Malkielƒuɔ.

⁴⁶ Na Aser ubidi ulekubi lɛnyi ndi Sera.

⁴⁷ Na bammɔ ndi Aser kaba bekyuli. Na bana banana bumomo bɔdi mpim liti ku ɛtɛ ku eti maane (53,400).

⁴⁸ Na Naƒtali kaba bekyuli na bana adua ammɔ kenye ndi bamɛni. Yakseel ɔdanku Yakseelƒuɔ. Guni ɔdanku Guniƒuɔ.

⁴⁹ Yeser ɔdanku Yeserƒuɔ. Silem ɔdanku Silemƒuɔ.

⁵⁰ Na bammɔ ndi Naƒtali kaba bekyuli. Na bana banana bumomo bɔdi mpim aavlene-ɛlɔ ku eti maane (45,400).

⁵¹ Na Israelƒuɔ bumomo ƒui bɔdi mpim eti leevu-anyɔ ku unwi ku eti leevu-ene ku avlaatɛ (601,730).

⁵² Amu na Unwoti ɔ́su Mose ɔnini,

⁵³ “Le kalɔ kammɔ ete-ma na beti-ka babla bana kadikɔ. Na ele-ka kalɛ bana bumomo buse kenye.

⁵⁴ Na bani mmomo ntulo ete-ma kadikɔ kebendi, na bani lɛnɔ neeemomo ete-ma kadikɔ lɛni kani. Na ɔdi biala kadikɔ kamanku kalɛ nwuna bumomo buse.”

⁵⁵ Na Unwoti ɔ́su-nwu ka ɔtu egulabi ɔnu uti ule kalɔ kammɔ ute-ma. Na kakɛ biala ndubusie kaba kadi kudɔ ɔdanku kalɛ kaba kammɔ anyi bunweni buse kenye.

⁵⁶ Kadikɔ biala ndubuse kaba biala kudɔ ɔlɛka ɔbla egulabi bɔtu kenye. Bani mmomo ku bani neeemomo lɛni na ɔlɛka ɔlɛ.

Lewi Kaba Bekyuli

⁵⁷ Na Lewiƒuɔ bani báka kalɛ bana kaba kese ndi bamɛni. Gerson ɔdanku Gersonƒuɔ. Kehat ɔdanku Kehatƒuɔ. Merari ɔdanku Merariƒuɔ.

⁵⁸ Na bamɛni ndi Lewiƒuɔ kaba bekyuli. Libniƒuɔ Hebronƒuɔ Mahliƒuɔ Musiƒuɔ Koraƒuɔ Na Kehat náwɔ Amram.

⁵⁹ Na Amram ulekudi lɛnyi ndi Yokebed na ɔ́si Lewi kaba kemmo, na anwu náwɔ Lewiƒuɔ na Egyipte. Na anwu náwɔ Aaron ku Mose ku nwuna ɔnwani ulekubi Miriam.

⁶⁰ Na Aaron náwɔ Nadab ku Abihu ku Eleasar ku Itamar.

⁶¹ Nsu Nadab ku Abihu békpi uwi ɔni na béti oloƒui béwi ogya bani baakyula kesii kani na Unwoti útete kuƒi.

⁶² Na Lewiƒuɔ banana bani nákɛ kɔbuli ku kama bumomo bɔdi mpim aavlanyɔ-ɛtɛ (23,000). Nsu ama bátaka-ma bétebunku Israelƒuɔ, ɔsika beeebo kadikɔ kadi.

⁶³ Na Israelƒuɔ bamɛni na Mose ku ɔkpane Eleasar báka uwi ɔni na bákya Moab kalɔ ƒiaa lɛlɔ na Yordan Ketu kesii kani nde Yeriko.

⁶⁴ Na Israelƒuɔ bani na Mose ku ɔkpane Aaron báka uwi ɔni bákya Sinai ketele kalɔ kakwiidi kemmo ina unwi muedi ɔsɔ uuulie ngba.

⁶⁵ Ɔsika Unwoti ɔ́su Israelƒuɔ bammɔ ka ɔdi biala ɔdubukpi ɔkya ketele kammɔ kemmo. Na sɔsɔ ɔdi biala útebu uuulie ngba ntu Yuƒune ubidi Kaleb ku Nun ubidi Yosua kani.