Bumomo Bɔka 23 - Katɔti Ɔku Kedee

Bileam Kenye Budie Budeedi

¹ Amu na Bileam ɔ́su Balak ɔnini, “Tu akpabi maatɛ lɛ mɛni na awia ɔmantɛ bakɔ maatɛ ku baƒonu bagyani maatɛ ete-mi.”

² Amu na Balak ɔ́wia ala ammɔ úboku na Balak ku Bileam bádu akɔ ku koƒonu kunwi basia lɛkpabi biala lɛlɔ.

³ Amu na Bileam ɔ́su Balak ɔnini, “Sɔ nye ƒula akpala amɛni kudɔ na ami nteesie kesii bamba. Ngyi ka uwi ɔni lisela ni, Unwoti ɔdubɔsiaku-mi ulu lɛlɔ. Na lɛla biala wedie watina-mi ni, ndubɔsu-ɔ.” Mmɔ na Bileam ɔ́tɔlɔ úsie kɔbi kɔdi lɛlɔ.

⁴ Mmɔ na Katɔti útásiaku Bileam na Bileam ɔ́su Katɔti ɔnini, “Lɛ́klibi akpabi maatɛ líse. Na lɛkpabi biala lɛlɔ lɛ́du ɔmantɛ akɔ ku koƒonu lɛ́sia-ni lɛlɔ liti lɛ́bla akpala.”

⁵ Amu na Unwoti úti litemi lɛdi ɔ́kya Bileam kenye kemmo ka unwini usie Balak kudɔ na utásu-nwu ɔnini,

⁶ Ɔmɛni ɔsu únwini úsie Balak kudɔ na ɔmu únye nwuna akpabi kudɔ ku nwuna benengu.

⁷ Mmɔ na Bileam úse kalɔ ɔɔsu nwuna litemi lɛni Unwoti úti ɔkya-nwu kenye. Na úse kalɔ ɔnini, “Aram na Balak úti-mi ɔ́siku, Na Moab ɔga úti-mi ɔsiku ɔƒɛ katukɔ abi lɛlɔ. Na ɔ́su ɔnini, ‘Wida Yakob te-mi Na aya na Israel kaba kayii.’

⁸ Na dɛ na mewida bekyuli bani na Katɔti útewida? Na dɛ na mayila bekyuli bani Unwoti utayila udu?

⁹ Na nnye atakpɛ ani nákuku lɛlɔ mɔɔnu-ma, na mɔɔnu-ma taasiku abi lɛlɔ. Na badi kadi bekyuli bani na ama lɛti nli. Na balánu lɛlɔ aani kalɛ kadi bamba bekyuli bese.

¹⁰ Na ɔma ndubɔkana Yakobƒuɔ bɔka? Ɔsika bemomo aani kɔnwinimi. Bemomo kaduɛ ɔni na ukyuli ɔdi. Ɔɔɔdubo-ma bɔkana bɔka. Ya na likpi bekyuli bani nse siin kukpi. Na ɔwɔlɔku-mi aani kalɛ na ɔɔwɔlɔ ku bekyuli bammɔ udu.”

¹¹ Amu na Balak úye Bileam ɔnini, “Bi ɔsu na ábla-mi lɛni? Buti na líti-ɔ líboku mɛni ka ebewida mina bekisine ete-mi, nsu átabla lɛni! Mmomu kusɛ kusɛ na ébo ébete-ma.”

¹² Amu na Bileam údie Balak kenye ɔnini, “Lɛla lɛni na Unwoti úti ɔ́kya-mi kenye kemmo ni, ani kani na ɔlɛka lɛsu?”

Bileam Kenye Kanyɔdi Kani Ɔsɔ Údie

¹³ Amu na Balak ɔ́sɔ ɔ́su Bileam ɔnini, “Siaku-mi na bɔsɔ busie kesii bamba na mmɔ amu ni, alanu Israelƒuɔ ƒui mmomu badi kani. Na ewida-ma asiku mmɔ.”

¹⁴ Anwuɔsu Balak útiku Bileam úsienku Soƒin ketele kalɔ kakwiidi kemmo na Pisga Kɔbi lili. Na mmɔ na Balak ɔ́tu akpabi maatɛ na ɔ́du akɔ unwi ku koƒonu kunwi ɔ́sia lɛkpabi biala lɛlɔ.

¹⁵ Amu na Bileam ɔ́su Balak ɔnini, “Sɔ kya ƒula akpabi amɛni kudɔ na ami nteesie ntásiaku Unwoti na mmɔ.”

¹⁶ Amu na Unwoti úbasiaku Bileam na úti litemi ɔ́kya-nwu kenye kemmo ka ni, “Nwini teesie Balak kudɔ na atasu-nwu kenye kammɔ.”

¹⁷ Anwuɔsu Bileam únwini úsie na útánu ka Balak unye nwuna lɛkpabi kudɔ ku nwuna Moab benengu. Na Balak úye Bileam ɔnini, “Bi na Unwoti ɔ́su-ɔ ka asu?”

¹⁸ Mmɔ na Bileam use kalɔ ɔ́ɔsu nwuna kenye ɔnini, “Balak, ta na enu, na awɔ Sipor ubi se atu na enu!

¹⁹ Katɔti ɔɔɔdi ɔyawine na ɔnyi ɔkɔ, iye ɔyawine ubi ɔni na si ɔ́su lɛla lɛdi ulabla ulasia-ni lɛlɔ. Munuu si use kenye kadi uláya na webo-nwu kemmo?

²⁰ Ɔda ɔni na úbo-mi ndi ka lite-ma kusɛ kusɛ. Na kusɛ kusɛ na líte-ma, na naaakana kusɛ kusɛ ɔmmɔ kama bɔlɛ.

²¹ “Ɔsika ńtanu ɔgbankpi ɔdi na Yakob kaba lɛlɔ, na ńtanu lɛƒɛda lɛdi na Israelƒuɔ lɛlɔ. Bana Unwoti Katɔti ɔ́kya-ma akɔ. Na beedie kudu taasu banii anwu ndi bana ɔga.

²² Katɔti náda-ma údie Egyipte na bebo ɔyikun ɔni nse aani ɔmantɛ akɔ unengudi geen.

²³ Na like ubone udu biala ɔdi uuubo na beti-nwu na ɔsu ukpidi na Israelƒuɔ lɛlɔ. Ɔƒɛni lɛni na bekyuli badubɔsu na Israelƒuɔ lɛlɔ, ‘Bɛnu lɛla lɛni Katɔti ɔ́bla!’

²⁴ Na Israel kaba kese aani gyata ɔni mbo ɔyikun geen, na ulánwuna wetédu ka ɔdu lɛla lɛdi, na ɔduli lɛla biala, utédu ka ɔni bana ubugya.”

²⁵ Amu na Balak ɔ́su Bileam ɔnini, “Si use lɛni ni, na tewida-ma iye tete-ma kusɛ kusɛ kulaa!”

²⁶ Amu na Bileam údie kenye ɔnini, “Ńtasu-ɔ ka lɛla biala na Unwoti ɔ́su-mi ni, ndubɔdi-ni lɛlɔ?”

Bileam Kenye Katɛdi Kani Ɔ́sɔ Údie

²⁷ Amu na Balak ɔ́su Bileam ɔnini, “Bo na bɔsɔ busie kesii bamba. Ɔƒɛni kakɛ ɔdubɔda Katɔti kubiti na ɔya na ewida Israelƒuɔ bamɛni ete-mi na kesii kani búsela mmɔ.”

²⁸ Amu na Balak útiku Bileam na bésie Peor Kɔbi lili. Na si enye mmɔ na aanu ketele kalɔ kakwiidi kani kewi mmɔ ƒui.

²⁹ Amu na Bileam ɔ́su Balak ɔnini, “Tu akpabi maatɛ na mɛni na awia ɔmantɛ bakɔ maatɛ ku baƒonu bagyani maatɛ ese ete-mi.”

³⁰ Na Balak ɔ́bla kalɛ na Bileam ɔ́su. Na ɔ́du akɔ unwi ku koƒonu kɔgyani kunwi ɔ́sia lɛkpabi biala lɛlɔ.