Bumomo Bɔka 22 - Katɔti Ɔku Kedee

Balak Ɔ́lɔ Bileam Ɔnii Ubasiku-nwu

¹ Anu na Israelƒuɔ báta bátáda keliekɔ na Moab kalɔ ƒiaa lɛlɔ na Yordan Ketudɔ kesii kani nde Yeriko ɔma.

² Amu ka Sipor ubidi Balak ɔ́nu kalɛ Israelƒuɔ bábla Amoriƒuɔ ni,

³ liƒu lɛ́da Moabƒuɔ geen, ɔsika bemomo geen. Na sɔsɔ ni, liƒu lɛ́du Moab ɔ́si Israelƒuɔ ɔsu.

⁴ Amu na Moabƒuɔ básu Midianƒuɔ batɔnkune banii, “Bekyuli lisu lɛmɛni badubo lɛla biala lɛkya bula amadɔ mɛni udu bɔyila aani kalɛ ɔmantɛ akɔ ɔɔkun livo lɛni lɛdia.” Ɔmɛni ɔsu Sipor ubidi Balak ɔni ndi Moabƒuɔ ɔga na uwi ɔmmɔ kemmo

⁵ ɔ́tala bekyuli badi ka besie Beor ubidi Bileam ɔni nli Petor ɔni nde ketu kani nkya nwuna ɔma mmɔ kudɔ ɔnii batásu-nwu banini, “Bekyuli badi báta bási Egyipte na bébeyi mina kalɔ lɛlɔ na belie bede-mi.

⁶ Anwuɔsu bo na ebewida bekyuli bamɛni. Ɔsika bekyuli bammɔ bebo ɔyikun geen betulo-mi. Na si ewida-ma ni, ndubɔkana bukpo bɔdi-ma lɛlɔ na lɛbɔku-ma lidie kalɔ kammɔ lɛlɔ. Ɔsika ngyi ka bekyuli bani na ásu ka kusɛ kusɛ ɔsiaku-ma ni, ɔdubɔsiaku-ma lɛni kani. Na bani lɛnɔ na éwida ni, ewida adubɔsiaku-ma lɛni kani.”

⁷ Amu na Moabƒuɔ ku Midianƒuɔ batɔnkune báyu ulu na béti egulabi ani baaƒɔ asa na beebó like bada. Na ka beteduo Bileam kudɔ ni, básu-nwu lɛla lɛni Balak ɔ́su-ma.

⁸ Amu na Bileam ɔ́su-ma ɔnini, “Bɛtɛ-mi kudɔ usien ɔmɛni na lɛla lɛni Unwoti ubo ka ɔsu-mii ni, ndubɔsu-mii.” Ɔmɛni ɔsu Moabƒuɔ batɔnkune bamɛni bátɛ mmɔ usien ɔmmɔ.

⁹ Ɔmmɔ kama Katɔti úbo Bileam kudɔ na úye-nwu ɔnini, “Bekyuli bamani nkya-a kudɔ mɛni?”

¹⁰ Amu na Bileam údie Katɔti kenye ɔnini, “Sipor ubidi Balak ɔni ndi Moabƒuɔ ɔga néti kenye kamɛni úmene-mi ɔnini,

¹¹ ‘Bekyuli lisu lɛni nási Egyipte bébo bákya mɛni béti kalɔ ƒui. Anwuɔsu bo na ebewida bekyuli bammɔ. Ɔƒɛni kalɛ ɔmmɔ ɔdubɔya na lɛkana-ma bukpoku na lɛbɔku-ma lidie kalɔ kammɔ kemmo.’ ”

¹² Nsu Katɔti ɔ́su Bileam ɔnini, “Awɔ ku bekyuli bammɔ bitesie kesii kadi. Lɛnɔ ni, tewida Israelƒuɔ bammɔ. Ɔsika badi bekyuli bani na béte kusɛ kusɛ.”

¹³ Ka kadi kégye ni, Bileam ɔ́ta na ɔ́lɔ Moabƒuɔ batɔnkune bammɔ na ɔ́su-ma ɔnini, “Binwini biteesie bina ɔma. Ɔsika Unwoti útete-mi kuƒi ka lɛsiaku-mii.”

¹⁴ Anwuɔsu Moabƒuɔ bammɔ bénwini bésie Balak kudɔ na básu-nwu banini, “Bileam úni ka ɔsiaku-bu.”

¹⁵ Ɔmmɔ kama Balak ɔ́sɔ ɔ́tala bekyuli bamba bani na basɔ bemomo na bebo ɔbu betulo bekyuli bedeedi.

¹⁶ Na bésie Bileam kudɔ na bátásu-nwu banini, “Lɛni na Sipor ubidi Balak ɔɔsu-bu ka bɔ́su-ɔ. Ɔnii taya na lɛla lɛdi litele-ɔ ulu na mina kudɔ bubo.

¹⁷ Ɔsika ndubo-ɔ lɛyuƒɔla bonwu geen bute, na lɛla biala na ásu-mi ka mbla ni, ndubo-ni bɔbla. Ɔmmɔ ɔsu ta na ebo ebewida bekyuli bamɛni ete-mi.”

¹⁸ Nsu Bileam údie bekyuli bammɔ kenye ɔnini, “Ina Balak úti sika ugyiedi ku ɔƒualadi úyile nwuna kaduli kani kemmo na ulie ɔɔdi lɛga ute-mi muedi naaakana na lini mina Unwoti Katɔti ɔda ɔni na úbo-mi na ulu biala lɛlɔ.”

¹⁹ Mmɔ na ɔ́su-ma ɔnini, “Ami lɛnɔ bɛtɛ mɛni aani kalɛ bedeedi bammɔ bátɛ kalɛ. Na lɛwia lɛsiku Unwoti kudɔ lɛla lɛni na wasu-mi na litemi lɛmmɔ lɛlɔ.”

²⁰ Na usien ɔmmɔ Katɔti úbo Bileam kudɔ na ɔ́su-nwu ɔnini, “Bekyuli bamɛni bubo bɔni bébo-ɔ kudɔ mɛni bɔɔtina ka bebetiku-ɔ batalɔku. Anwuɔsu ni, nu kalɔ na bisie, nsu si ésie ni, lɛla lɛni kani na lɛ́su-ɔ ka su ni, na asu-ni lɛni kani.”

Bileam Ku Nwuna Ebuo Ala Utine Lɛlɔ Kɔtɛ

²¹ Ka kadi kégye ni, Bileam úti nwuna ebuo ala utine na ɔ́kɔ úlie-nwu kama. Na anwu ku Moab bekyuli bani na ɔ́tala mmɔ bátɔlɔ.

²² Nsu ka úsela ni, Unwoti úti kɔnyi ɔ́kya Bileam. Ɔmmɔ ɔsu Unwoti ɔtu ɔdi útáda-nwu únyene ulu lɛlɔ na uléte ebuo ɔmmɔ kuƒi ka ɔvi. Uwi ɔmmɔ kemmo Bileam útiku nwuna kabla bablane inyɔ ɔda na béli ebuo ɔmmɔ kama.

²³ Ka ebuo ɔmmɔ ɔ́nu Unwoti ɔtu ɔmɛni ka únye ulu ntɛ na ɔ́kpa lɛtula ɔda ni, ebuo ɔmmɔ údeyi ulu ɔmmɔ lɛlɔ na úti anumi ɔ́tina kemo kadi kemmo. Na Bileam uubó ebuo ɔmɛni ka ɔsɔ unwini ubasia ulu lɛlɔ.

²⁴ Amu na Unwoti ɔtu ɔmɛni ɔ́sɔ únye ulu blii suɛ ɔdi lɛlɔ na adingyii mmo inyɔ bɔdi ntɛ. Na bátu awodu bákya-mu lɛƒɛnyi inyɔ bɔmmɔ.

²⁵ Na ka ebuo ɔmmɔ ɔ́nu Unwoti ɔtu ɔmmɔ ni, úti lɛlɔ útámana lɛwoduku lɛmmɔ na lɛɛmana Bileam ɔgba momoomo. Ɔmmɔ ɔsu Bileam ɔ́sɔ úbi ebuo ɔmmɔ kugyiimi ubu.

²⁶ Amu na Unwoti ɔtu ɔmmɔ úsie anumi na úténye kesii kani nse klo klo na kuƒi kɔdi kuuubo na akana lɛlɔ bunwini buse kɔdianu iye kɔmii kakɛ.

²⁷ Uwi ɔmɛni kemmo ka ebuo ɔmɛni ɔ́sɔ ɔ́nu Unwoti ɔtu ɔmmɔ ni, ɔ́yu úbi kalɔ, na kalɛ na ebuo ɔmɛni ɔ́bla ɔsu Bileam ɔ́kɛ kɔnyi geen na úti ugyii ɔni na ɔda na úse kalɔ uubi ebuo ɔmɛni kaduɛ.

²⁸ Amu na Unwoti úbimi ebuo ɔmɛni kenye na úse kalɔ uutemi taasu Bileam ɔnini, “Bi na lɛ́bla-a ɔsu na eebó-mi kɔtɛ sɔɔn?”

²⁹ Amu na Bileam údie ebuo ɔmmɔ kenye ɔnini, “Ɔsika ábu-mi kɔdɔlɔ! Na si kewii na nka nda ni, nka ndubo-ɔ bɔdu ɔƒɛni kani.”

³⁰ Amu na ebuo ɔmɛni úye Bileam ɔnii, “Ɔɔɔdi ami ndi ebuo ɔni lɛlɔ na élie ƒula ngba emeyi ƒui? Na lɛ́ɛbla-a lɛmɛni udu dii?” Na Bileam údie kenye ɔnini, “Átabla lɛni kudii.”

³¹ Mmɔ na Unwoti úbimi Bileam anumi na ɔ́ya na ɔ́nu ɔtu ɔmmɔ ka únye mmɔ na kewii kákya-nwu kɔnu. Ka ɔ́nya ɔ́nu lɛni kani na ɔ́yu ɔ́tɛ kalɔ na úti anumi úbi kalɔ.

³² Amu na Unwoti ɔtu ɔmmɔ úye Bileam ɔnini, “Bi na ebuo ɔmmɔ ɔ́bla-a ɔsu na ébo-nwu kɔtɛ sɔɔn? Bubo na líbo ḿbenye lítile-nwu ulu. Ɔsika ulu ɔni akɛ ésela mmɔ uuuse-nwu siin.

³³ Na ka ebuo mmɔ ɔ́nu-mi kɔtɛ sɔɔn ɔsu na údeyi. Na mɔɔsu-ɔ ka si ɔɔɔdi ɔni na ebuo ɔmmɔ ɔkya udeyi ɔsu ni, nka lɛ́ɛdu-ɔ na lɛnyonu ebuo ɔmmɔ.”

³⁴ Amu na Bileam údie ɔtu ɔmmɔ kenye ɔnini, “Lɛ́bla likpidi. Ńtati ka awɔ nnye ulu lɛlɔ étile-mi. Nsu muuvele-ɔ ka si ɔɔɔdia ka lɛsɔ nteesie ulu ɔmmɔ ni, na asu-mi na linwini nteesie kaduli.”

³⁵ Nsu Unwoti Ɔtu ɔmmɔ ɔ́su-nwu ɔnini, “Awɔ ku bekyuli bammɔ biteesie. Nsu lɛla lɛni kani na lɛ́su-ɔ ni, ani kani na ɔlɛka asu.” Ɔmmɔ ɔsu Bileam ku bekyuli bammɔ bágyu na bátɔlɔ.

³⁶ Ɔni na Balak únu ka Bileam ɔkɛ ulu lɛlɔ ɔdubo ni, ɔ́ta na útásiaku-nwu na Moab ɔma ɔni nkya Arnon ɔmii lɛlɔ na nwuna ɔmii lɛlɔ pɛɛ.

³⁷ Mmɔ na Balak úye Bileam ɔnini, “Ɔɔɔdi bɔ́tala na lɛ́tala kudeedi nnii, ‘Ta pla na ebo’? Bi ɔsu na átakpete? Munuu bɔkali na aakali anii, naaakana-a lɛyuƒɔla bonwu bute?”

³⁸ Amu na Bileam údie kenye ɔnini, “Lɛ́ɛda ḿbalɛ, nsu lɛɛɛdubo-ɔ bɔsu lɛla lɛni ami ɔlati mɔɔyɔ́, mmomu lɛla lɛni na Katɔti weti wakya-mi kenye kani na ndubo-ɔ bɔsu.”

³⁹ Amu na Bileam ɔ́siaku Balak na bátɔlɔ bésie Kiriat-Husot.

⁴⁰ Mmɔ na Balak ɔ́du ɔmantɛ bakɔ ku baƒonu na úti ɔ́bla akpala. Na údie kadikɔ úte Bileam ku batalane bammɔ.

⁴¹ Na kadi kégye ɔtanta ni, Balak útiku Bileam na bákɔ bésie Bamot-Baal Kɔbi lili. Na mmɔ na ɔ́nu Israelƒuɔ badi úmene.