Bumomo Bɔka 20 - Katɔti Ɔku Kedee

Ntu Bɔ́bwɛ Bɔ́lɛ Lɛtakpɛ Kemmo

¹ Kɔbuli kudeedi kemmo na Israelƒuɔ ƒui bétéduo Sin Ketele kalɔ kakwiidi kemmo na báda bana keliekɔ na Kades. Mmɔ na Miriam úkpi na báva-nwu.

² Uwi ɔmmɔ ni, ntu biala bútakya mmɔ na bakɛ bani, anwuɔsu Israel kadi bekyuli bammɔ básala lɛlɔ báta bénye Mose ku Aaron lɛlɔ.

³ Na bádɔnku Mose banini, “Si bukpi na abu lɛnɔ búkpi-ku bekyuli bani nékpi na Unwoti anumi mmɔ nka ɔdia-bu utulo!

⁴ Bi ɔsu na éti bula ƒui ku bula bebuo ébewi ketele kalɔ kakwiidi kamɛni kemmo na bukpi bɔkya mɛni?

⁵ Na bi ɔsu na ákpanku-bu ásiku Egyipte kalɔ lɛlɔ ábakya ketele kalɔ kakwiidi kamɛni kemmo, kesii kani na edula ebi adi iye kɔnwingyie iye egyiibi lidu adi eeebo, na ntu biala muedi buuubo na bɔni?”

⁶ Mmɔ na Mose ku Aaron bátɔlɔ bekyuli bani násala mmɔ kudɔ na bátáyu bátɛ kalɔ na béti bana anumi bébi kalɔ na Unwoti Adi Kevo anumi. Mmɔ na Unwoti bukeye bɔ́bwɛ búbewi-ma lɛlɔ.

⁷ Amu na Unwoti ɔ́su Mose ɔnini,

⁸ “Ti ugyii ɔdadi ɔmmɔ na awɔ ku Aaron bɛsala bekyuli bammɔ ƒui. Na etemi ete lɛtakpɛ lɛmmɔ na bekyuli bammɔ ƒui anumi. Na ntu bɔdubo bɔlɛ lɛtakpɛ lɛmmɔ kemmo na bekyuli bammɔ ku bana bebuo bani.”

⁹ Ɔmmɔ ɔsu Mose úti ugyii ɔdadi ɔmmɔ ɔ́siku Unwoti anumi aani kalɛ kani na úbo-nwu ɔda.

¹⁰ Na anwu ku Aaron básala bekyuli bammɔ na lɛtakpɛ lɛmmɔ kudɔ. Na Mose ɔ́su-ma ɔnini, “Amii batuɔkplune, binu! Bɛwia ntu bɛni bɛsiku lɛtakpɛ lɛmɛni kemmo?”

¹¹ Mmɔ na Mose ɔ́talaku ugyii ɔmmɔ katɔ na ɔ́ƒiɛmi lɛtakpɛ lɛmmɔ kunyɔ na ntu bɔ́bwɛ bɔ́lɛ-ni kemmo. Na bekyuli bammɔ ku bana bebuo báni kaduɛ.

¹² Nsu Unwoti ɔ́su Mose ku Aaron ɔnini, “Ka bitaƒɔ-mi bítadi geen na bite-mi ɔbu ka nse kedee na Israelƒuɔ bammɔ anumi ɔsu ni, bɛsɔ bɛɛɛdubo bekyuli bammɔ bɔkpanku busienku kalɔ kani lɛ́su ka ndubo-ma bute kemmo.”

¹³ Ala amɛni álɛ na Meriba. Ɔsika mmɔ na Israelƒuɔ bákyaku Unwoti unyeƒi na údie ɔtina-ma ka Unwoti ɔni use kedee na ɔdi na bana akɔ.

Edomƒuɔ Ɔga Úni Ka Israelƒuɔ Bavi Nwuna Kalɔ Lɛlɔ

¹⁴ Uwi ɔmmɔ kemmo Mose ɔ́tala bekyuli badi ɔ́kya Edomƒuɔ ɔga na bátásu-nwu banini, “Ƒ'ɔnwani Israel ɔnini, ‘Agyi lɛbibo lɛni néebo-bu lɛlɔ.

¹⁵ Bula bati kuuku bétélie Egyipte kalɔ akwa pii. Na Egyipteƒuɔ bamɛni bábla abu ku bula bati kuuku kalala geen.

¹⁶ Nsu ka búwulo bɔ́kpali Unwoti ni, únu bula buwulo. Na ɔ́tala nwuna ɔtu ɔdi ɔkya-bu, na úbada-bu údie Egyipteƒuɔ enu kemmo. “ ‘Na ɔƒɛni búusie lɛgba laa búbedu Kedes ɔma ɔni nkya ƒula ɔmii lɛlɔ.

¹⁷ Na buuvele-ɔ ka te-bu kuƒi na bɔsia bɔvia ƒula kalɔ ku lɛma kemmo. Na bulávi bina mmo iye adingyii mmo bɔdi kemmo. Na buláni bina abiɔ ntu bɔdi lɛnɔ. Bɔsia kani na bɔdubo ƒula lilu linengudi lɛmmɔ lɛlɔ bɔsia bɔvi na bulenwini bulanu kɔmii iye kɔdianu útédu ka bɔ́vi ƒula kalɔ kemmo bɔ́wɔlɔ.’ ”

¹⁸ Nsu Edomƒuɔ ɔga údie batalane bammɔ kenye ɔnini, “Kuƒi kuuubo ka bɛvi mmɔ. Na si bɛ́yu atuɔkplu bɔdubɔta na buti bula kuwii na bubekpoku-mii.”

¹⁹ Amu na Israelƒuɔ básɔ bédie kenye banini, “Ulu unengudi ɔmmɔ lɛlɔ kani bɔdubo bɔsia. Na si bula ɔdi iye bula ebuo ɔdi ɔ́ni bina ntu bɔdi bɔdubɔƒɔ kayu. Mmomu kalɛ kani na bɔsia mmɔ bɔvi ku lɛgba kani na bɔɔwia.”

²⁰ Edomƒuɔ básɔ bédie-ma kenye banini, “Kuƒi kuuubo ka bɛsia-bu kalɔ kemmo.” Amu na Edomƒuɔ bamɛni báta na béti bana bekpone bani mbo ɔyikun kaduɛ ka betékpoku-ma.

²¹ Na ka Edomƒuɔ bétete kuƒi ka basia bana kalɔ kemmo bavi ɔsu ni, Israelƒuɔ bédeyi na bátásia ulu bamba.

Aaron Úkpi

²² Amu na Israelƒuɔ báta Kades na bébedu Hor Kɔbi kaƒɔna.

²³ Na Hor Kɔbi lɛlɔ na kesii kani nde Edom ɔmii lɛlɔ mmɔ ni, Unwoti ɔ́su Mose ku Aaron ɔnini,

²⁴ “Aaron ɔdubusie utánwuna ku nwuna bati. Na ɔɔɔdubo buduo kalɔ kani líti muute Israelƒuɔ mmɔ kemmo, ɔsika awɔ Mose ku Aaron bɛ́ta binye mina ɔda bubo lɛlɔ na Meriba Ketudɔ.

²⁵ Kpanku Aaron ku ubidi Eleasar sienku Hor Kɔbi kɔmmɔ lili.

²⁶ Die Aaron lɛwu gyɔlɔɔ lɛmmɔ na eti-ni akya ubidi Eleasar, ɔsika Aaron ɔdubo busie nwuna bati kudɔ mmɔ.”

²⁷ Mose lɛnɔ ɔ́bla kalɛ kani na Unwoti úbo-nwu ɔda. Na ɔ́kpanku-ma úsienku Hor Kɔbi kɔmmɔ lili na Israelƒuɔ bammɔ ƒui anumi.

²⁸ Mmɔ na Mose údie Aaron lɛwu gyɔlɔɔ lɛmmɔ na úti-ni ɔ́kya ubidi Eleasar. Na Aaron úkpi na kɔbi kɔmmɔ lili. Na Mose ku Eleasar báyu kɔbi kɔmmɔ lili bébo kalɔ.

²⁹ Uwi ɔni na Israelƒuɔ báti ka Aaron úkpi ni, Israelƒuɔ béwulo-nwu emeyi avlaatɛ.