Bumomo Bɔka 2 - Katɔti Ɔku Kedee

Kaba Bekyuli Bammɔ Báda Bana Kuliekɔ Na Bana Adua Kenye

¹ Amu na Unwoti ɔ́su Mose ku Aaron ɔnini,

² “Bɛkɔ lɛsa bite Israelƒuɔ bɛnii belie bamana mina Adi Kevo kammɔ, nsu banu ka bésie kama ƒui na kevo kammɔ kudɔ. Na kaduli biala bekyuli belie basala na bawia bana likposela balɛ kaduli kammɔ kemmo.”

³ Na ɔƒɛ katukɔ kakɛ ni, Yuda kaba bekyuli bada bana keliekɔ na balɛ bana likposela aƒlaga na mmɔ. Na bana ɔtɔnkune ndi Aminadab ubidi Nahason.

⁴ Na lɛkpa lɛmmɔ bekyuli bumomo ndi mpim liti ku aavlanyɔ-ine ku eti leevu-anyɔ (74,600).

⁵ Na Isakar kaba bekyuli ndubulie basiaku-ma kama. Na bana ɔtɔnkune ndi Suar ubidi Netaneel.

⁶ Na bana bumomo bɔdi mpim liti ku ine ku eti maane (54,400).

⁷ Bammɔ kama Sebulon kaba bekyuli nsia. Na bana ɔtɔnkune ndi Helon ubidi Eliab.

⁸ Na lɛkpa lɛmmɔ bekyuli bumomo ndi mpim liti ku maatɛ ku eti maane (57,400).

⁹ Bekyuli bani ƒui násala ku Yuda kaba bekyuli na báda bana keliekɔ na akpa akpa ammɔ kenye bumomo ndi mpim eti atɛ ku avlaatɛ-ɛku ku eti mane (186,400). Na ama ndubo bɔgyu bɔtɔ bɔyu ulu.

¹⁰ Na lɛkpa lɛni ndi Ruben kaba bekyuli ni, ama lɛnɔ badubo bana keliekɔ bɔda na kada kakɛ ku bana likposela. Na bana ɔtɔnkune ndi Sedeur ubidi Elisur.

¹¹ Na bana bumomo bɔdi mpim aavlene-ɛku ku eti leevu (46,500).

¹² Na Simeon kɔdua bekyuli ndubulie bɔsiaku-ma. Na bana ɔtɔnkune ndi Surisadai ubidi Selumiel.

¹³ Na bana bumomo bɔdi mpim liti ku yaalenwi ku eti aku (59,300).

¹⁴ Na Gad kɔdua bekyuli ndubulie bɔsiaku-ma. Na bana ɔtɔnkune ndi Reuel ubidi Eliasaƒ.

¹⁵ Na bana bumomo bɔdi mpim aavlene-ɛlɔ ku eti leevu-atɛ (45,650).

¹⁶ Bekyuli bani ƒui násala ku Ruben kaba bekyuli na báda bana keliekɔ na akpa akpa ammɔ kenye bumomo ndi mpim eti atɛ ku unwi ku eti yaalenwi (151,450). Na ama ndubɔdi banyɔdi bani ndubo ulu bɔyu.

¹⁷ Ɔmmɔ kama Katɔti Kevo kani kemmo na ɔɔsiáku-ma kadubɔsia, na Lewiƒuɔ bammɔ lɛnɔ bayu ulu na bakya akpa akpa ammɔ ntɛ. Na badubɔyu ulu basiaku lɛlɔ aani kalɛ na báda bana kuliekɔ bélie kenye na esu esu ammɔ kemmo na bana ɔdi biala ɔdubɔda bana likposela aƒlaga.

¹⁸ Na ɔƒɛ kanukɔ ni, Eƒraim kaba bekyuli kasala badubɔda bana keliekɔ na mmɔ ku bana likposela aƒlaga. Na bana ɔtɔnkune ndi Amihud ubidi Elisama.

¹⁹ Na bana bumomo bɔdi mpim aavlene ku eti leevu (40, 500).

²⁰ Na Manase kaba bekyuli ndubulie basiaku-ma. Na bana ɔtɔnkune ndi Pedahsur ubidi Gamaliel.

²¹ Na bana bumomo bɔdi mpim avlaatɛ-inyɔ ku eti ene (32,200).

²² Ɔmmɔ kama Benyamin kɔdua bekyuli ndubulie basiaku-ma. Na bana ɔtɔnkune ndi Abidan ubidi Gideon.

²³ Na bana bumomo bɔdi mpim avlaatɛ-ɛlɔ ku eti maane (35,400).

²⁴ Na bekyuli bani ƒui násala ku Eƒraim kaba bekyuli na bana bule ku bumomo kenye bɔdi mpim eti anyɔ ku maane ku eti anyɔ (108,100). Na ama ndubɔdi batɛdi bani mayu ulu.

²⁵ Na Dan kaba bekyuli na bana bule kenye badubɔda bana keliekɔ úti úsie katɔ kakɛ ku bana likposela aƒlaga. Na bana ɔtɔnkune ndi Amisadai ubidi Ahieser.

²⁶ Na bana bumomo bɔdi mpim liti ku leevu-inyɔ ku eti leevu-ene (62,700).

²⁷ Na ɔmmɔ kama Aser kaba bekyuli basia na bana ɔtɔnkune ndi Okran ubidi Pagiel.

²⁸ Na bana bumomo bɔdi mpim aavlene-unwi ku eti leevu (41,500).

²⁹ Ɔmmɔ kama Naƒtali kaba bekyuli basia, na bana ɔtɔnkune ndi Enan ubidi Ahira.

³⁰ Na bana bumomo bɔdi mpim liti ku ɛtɛ ku eti maane (53,400).

³¹ Na bekyuli bani ƒui násala ku Dan kaba bekyuli na lisu lɛmmɔ kenye bumomo bɔdi mpim eti atɛ ku maatɛ ku eti leevu-anyɔ (157,600). Na ama ndubɔkpɛ kama ƒui ku bana likposela aƒlaga.

³² Na kalɛ na báka Israelƒuɔ na bana kaba kaba kammɔ kenye na ɔdi mmɔ. Na bani ƒui nkya bana kɔkyakɔ na bana esu esu ammɔ kenye bumomo bɔdi mpim eti leevu-anyɔ ku ɛtɛ ku eti leevu-unwi (603,550).

³³ Nsu bátaka Lewiƒuɔ kaba bekyuli ama bétebunku Israelƒuɔ bammɔ kalɛ kani na Unwoti úbo Mose ɔda kalɛ.

³⁴ Anwuɔsu Israelƒuɔ bábla básia lɛla biala lɛlɔ pɛpɛɛpɛ kalɛ kani na Unwoti úbo Mose ɔda ɔnii babla. Na lɛni na báda bana kuliekɔ bélieku bana likposela aƒlaga. Na lɛni kani na báta báyu ulu na bana adua ku kɔduli bekyuli kenye.