Bumomo Bɔka 19 - Katɔti Ɔku Kedee

Unwoti Úbo Mose Ɔda Na Ɔmantɛ Akɔ Ugyiedi Ntɔ Lɛlɔ

¹ Unwoti úbo Mose ku Aaron ɔda ɔnini,

² “Ala ani nkɛnku ɔda bubo bɔni na Unwoti úte-mii ndi ɔmɛni, bɛsu Israelƒuɔ na beboku ɔmantɛ akɔ ugyiedi uledi ɔkɔdi ɔni na bɔsɔ bɔdi buuubo-nwu lɛlɔ na bátabala-nwu kɔgba kɔdi na ɔbla kabla kadi kudii.

³ Na beti-nwu beboku ɔkpane Eleasar, na beti akɔ ammɔ balɛku bana keliekɔ mmɔ bésienku kama na badu-nwu mmɔ na ɔkpane ɔmmɔ anumi.

⁴ Na si bádu-nwu báwɔlɔ ni, na Eleasar uti ubugya ɔmmɔ na uti nwuna lɛnimi ɔkya ubugya ɔmmɔ kemmo. Na uti nwuna anumi ɔtina kesii kani na Unwoti Adi Kevo kammɔ kenye na ɔkuna ubugya ɔmmɔ umene Kevo kammɔ anumi maatɛ.

⁵ Na ɔmmɔ kama na unye ɔnu na bakyula ebuo umodi ɔmmɔ ku nwuna ɔku ku ubugya ku nwuna kaƒɔ ala ƒui.

⁶ Na ɔmmɔ kama Eleasar ɔwia kegyiikɛ kadi ku hisope ku kabuli kegyiedi kadi na ubo-nya ɔkya ogya ɔmmɔ kemmo.

⁷ Na si ɔ́bla ala ammɔ ƒui ɔ́wɔlɔ ni, ɔlɛka utáƒɔ nwuna adala na ɔkpi ntu. Na ammɔ kama ɔkana na unwini utéduo bana kakyakɔ mmɔ. Nsu nwuna lɛlɔ lɛɛɛdubo buse sɛɛn wetédu useyi uwi.

⁸ Na ukyuli ɔni nákyula akɔ ammɔ lɛnɔ ɔlɛka ɔƒɔ nwuna adala na ɔkpi ntu, nsu anwu lɛnɔ ɔɔɔdubo buse sɛɛn utédu useyi uwi.

⁹ “Na ukyuli ɔni nse sɛɛn ndubɔbuma akɔ ntɔ bɔmmɔ utéwi kesii kani nse sɛɛn na bana keliekɔ kammɔ kama. Na ntɔ bɔmmɔ bɔdubuwi mmɔ bute Israelƒuɔ kadi kammɔ na beteewi ntu kemmo taabla lɛlɔ bɔbla sɛɛn ɔdi.

¹⁰ Na ɔnana ɔni mabuma ntɔ bɔmmɔ lɛnɔ ɔlɛka ɔƒɔ nwuna adala, na ɔɔɔdubo buse sɛɛn wetédu useyi uwi. Ɔda ubo bɔmɛni buse bute Israelƒuɔ ku baƒɔ bani nkya-ma akɔ úte uwi ƒui.

¹¹ “Ukyuli biala meti kɔnu metuku ukpine ɔdi ɔ́sɔ na ulése sɛɛn emeyi maatɛ.

¹² Na limeyi lɛtɛdi ku limeyi maatɛdi lɛlɔ ni, ɔlɛka uti ntu bɔmmɔ ɔbla lɛlɔ sɛɛn, na nwuna lɛlɔ lɛdubɔbla sɛɛn. Nsu si úteti ntu bɔmmɔ útabla lɛlɔ sɛɛn na limeyi lɛtɛdi ku maatɛdi lɛmmɔ lɛlɔ ni, ɔɔɔdubo buse sɛɛn.

¹³ Na ukyuli biala meti kɔnu metuku ukpine na uni na utabla sɛɛn bɔbla ɔdi ɔmmɔ ni, ɔ́ya na Unwoti kakpakɔ keesé lɛlɔ, na ɔlɛka bada ukyuli ɔmmɔ bedie Israelƒuɔ akɔ. Ɔsika batakuna ntu bɔni mɔbla sɛɛn bétewi-nwu lɛlɔ ɔsu uusé lɛlɔ. Na nwuna sɛɛn tabla ɔmmɔ ɔkya-nwu lɛlɔ.

¹⁴ “Na si ubebo ute ka ukyuli ɔdi ukpi na nwuna kɔdi ɔtɔ kemmo ni, bekyuli bani nkya mmɔ asa na ukpi iye ukyuli biala meduo ɔtɔ ɔmmɔ kemmo ɔdubuse lɛlɔ emeyi maatɛ.

¹⁵ Na akyami ku ebui ani neeebo libila na alɛ ɔtɔ ɔmmɔ kemmo lɛlɔ lɛdubuse lɛlɔ.

¹⁶ Na ukyuli biala metuku ukyuli ɔni bébo-nwu bádu iye anwu alati kukpi na úkpi iye útuku ukpine likubi iye kaƒiɔtɔ ni, ukyuli ɔmmɔ ɔdubuse lɛlɔ emeyi maatɛ.

¹⁷ “Asa na ukyuli ɔni muusé lɛlɔ mmɔ ɔdubɔbla sɛɛn ni, ɔlɛka bama akɔ ugyiedi ntɔ bɔni bákyula na amu muudie likpidi na ukyuli lɛlɔ mmɔ bɔdi. Na beti ntɔ bɔmmɔ bewi libui kemmo na bedu ntu bɔbuni bewi-nwu kemmo.

¹⁸ Na ukyuli ɔni nse sɛɛn na ulese lɛlɔ ɔlɛka ɔwia hisope lɛla lɛni lɛdia ntu bɔkuna buwi lɛla lɛdi lɛlɔ. Na uti ɔkya ntu libui lɛmmɔ kemmo na ɔkuna uwi Adi Kevo ɔtɔ ɔni na ukyuli úkpi-nwu kemmo mmɔ ku bekyuli bani nákya mmɔ ƒui. Kunyɔdi ukyuli ɔni nse sɛɛn ɔlɛka ɔkuna ntu bɔmmɔ uwi ukyuli ɔni nétuku ukpine likubi iye utuku ukpine ɔni na bádu iye anwu ɔlati nékpi iye kaƒiɔtɔ.

¹⁹ Na limeyi lɛtɛdi ku maatɛdi lɛlɔ ni, ukyuli ɔni nse sɛɛn ɔkuna ntu bɔmmɔ uwi ukyuli ɔni neeese sɛɛn mmɔ lɛlɔ. Na limeyi maatɛdi lɛlɔ ukyuli mmɔ ɔlɛka ɔƒɔ nwuna adala na ɔkpi ntu. Na ɔmmɔ kama ukyuli ɔni nákuna ntu bɔmmɔ úwi lɛlɔ mmɔ ɔbla-nwu sɛɛn. Na si ɔƒɔ na ukyuli mmɔ ɔbla sɛɛn.

²⁰ “Nsu si ukyuli ɔdi ɔkya-mii akɔ na úni na útabla lɛlɔ sɛɛn ɔlɛka bada-nwu bedie bina akɔ. Ɔsika uti eƒi utuku Unwoti kakpakɔ ka béteti ntu bɔni mɔɔbla ukyuli ɔni eƒi akya-nwu lɛlɔ betewi-nwu lɛlɔ ɔsu. Ɔmmɔ ɔsu na uuse lɛlɔ.

²¹ Na ɔda bubo bɔmɛni buse busela uwi ƒui. Na ukyuli ɔni maakuna ntu bɔni mɔɔyá ukyuli ɔɔbla sɛɛn mmɔ mewi ukyuli ɔdi ɔlɛka anwu lɛnɔ ɔƒɔ nwuna adala. Na ukyuli biala meetuku ntu bɔdi ɔdubuse lɛlɔ wetédu useyi uwi.

²² Ukyuli biala na ukyuli ɔni lɛlɔ muusé lɛlɔ weti kɔnu wetuku-nwu ɔdubuse lɛlɔ. Na ukyuli biala lɛnɔ metuku-nwu ɔdubuse lɛlɔ wetédu useyi uwi.”