Bumomo Bɔka 18 - Katɔti Ɔku Kedee

Kabla Kani Na Bakpane Ku Lewiƒuɔ Ɔlɛka Babla

¹ Amu na Unwoti ɔ́su Aaron ɔnini, “Awɔ, ku ƒula bebi ku ƒ'ɔti ɔtɔ bebi ƒui kani ndubo bɔƒiɔ biala mebo Unwoti Adi Kevo kammɔ lɛlɔ buti, na awɔ ku ƒula bebi kani ndubo bɔƒiɔ biala mebo ɔkpane bɔdi kabla kammɔ lɛlɔ buti.

² Kpanku Lewiƒuɔ ku ƒula kaba bekyuli na bebebunku-ɔ si uwi ɔni awɔ ku ƒula bebi bɛkya bɛɛbla bakpane kabla na Unwoti Adi Kevo kemmo mmɔ.

³ Na Lewiƒuɔ bammɔ badubɔkya-a kalɔ na ama ndubɔbla kabla biala na Kevo mmɔ, na bana akɔ ɔdi biala na útamanku utani utede ala kedee ani na Kevo kemmo mmɔ ku lɛkpabi lɛmmɔ, si ɔɔɔdi lɛni amii ku-ma ƒui bɛdubo bukpi.

⁴ Badubo na bebunku-ɔ na bitaabla kabla biala na Kevo kammɔ kemmo ku kana lɛlɔ bɔnu, na ukyuli bamba ɔdi utani utede-mii na mmɔ.

⁵ “Amii na ɔlɛka bitaanu Adi Kevo kammɔ lɛlɔ ku lɛkpabi lɛmmɔ lɛlɔ, kalɛ na mina kɔnyi kɔsɔ kuláda kulálɛ Israelƒuɔ lɛlɔ.

⁶ Ami ɔlati náƒuna Lewiƒuɔ bammɔ lɛ́lɛku Israelƒuɔ akɔ líte-ɔ lɛ́bla na bese sɛsɛɛ bete Unwoti ka babla kabla na Unwoti Adi Kevo kemmo.

⁷ Nsu awɔ ku ƒula bebi bananabi kani na ɔlɛka bitaabla bakpane kabla biala na lɛkpabi lɛmmɔ lɛlɔ ku kakpakɔ bule kɔdi kɔmmɔ kama mmɔ. Na líti ɔkpane kabla kamɛni muute-mii aani etela kalɛ. Na ɔmmɔ kama ukyuli biala mani mede kakpakɔ kammɔ kudɔ ɔlɛka badu-nwu.”

Bakpane Ku Lewiƒuɔ Kadikɔ

⁸ Ɔmmɔ kama Unwoti ɔ́su Aaron ɔnini, “Ami ɔlati néti-ɔ líse etela biala na béti béboku-mi kenye. Na etela kedee biala na Israelƒuɔ badubuti buboku-mi ni, lɛ́sɔku-nya muute awɔ ku ƒula bebi bananabi aani bina kadikɔ ku lɛla lɛni na ɔdi ka bitaakɛ.

⁹ Na akpala kedee ani na balákyula na lɛkpabi lɛlɔ aani edula ebi akpala ku likpidi lili buvele akpala biala adi bina ɔdi. Na akpala biala na béti béboku-mi na ese kedee ƒui adi awɔ ku ƒula bebi bananabi ɔdi.

¹⁰ Na si bɛɛdi ala ammɔ na bɛdi-nya na kesii kani nse kedee. Na awɔ ku ƒula bebi bananabi kani ɔlɛka bɛdi adila ammɔ. Bɛbu adila ammɔ ka ese kedee.

¹¹ “Ɔmmɔ kama akpala sɛsɛɛ biala Israelƒuɔ badubuti beboku-mi adi awɔ ku ƒula bebi ɔdi. Na líti-nya muute awɔ ku ƒula bebi bananabi ku belekubi ɔƒɛni ku uwi ɔni mebo ƒui. Na ukyuli biala nási ƒula kaduli kemmo na ukyuli ɔmmɔ use sɛɛn ɔkana ɔdi ala ammɔ adi.

¹² “Na edula edeedi abuni ani na Israelƒuɔ badubɔkɛ aani nnɔ ku ntɛ bɔwɔdi ku edula ebi ani na badubuti beboku Unwoti ni, lɛ́sɔku-nya muute-mii.

¹³ Na kalɔ kammɔ ƒui edula edeedi ani béti béboku Unwoti adubɔbla bina ɔdi. Na ukyuli biala nlie-ɔ kaduli na use sɛɛn ɔkana ɔdi adila ammɔ adi.

¹⁴ “Na lɛla biala nkya Israel kalɔ lɛlɔ na bédie-ni sɛsɛɛ bése béte Unwoti ɔdi bina ɔdi.

¹⁵ Na kaƒɔ biala ubi udeedi ku ebuo udeedi biala na báwɔ, na Israelƒuɔ béti-nwu béboku Unwoti ɔdi bina ɔdi. Nsu ɔnanabi udeedi ku ebuo ala utine biala anwu ni, ɔlɛka basɔku-nwu beye basiku-mi kudɔ.

¹⁶ Na kayu kani na ɔlɛka baƒɔ na ɔnanabi ubi udeedi biala na báwɔ-nwu na ɔ́kɛ kɔbuli ɔdi sika ɔƒualadi ebi alɔ na kakpakɔ ala bɔkɔku kenye.

¹⁷ “Nsu ɔmantɛ akɔ, ku koƒonu ku ese udeedi biala na báwɔ ɔdi Unwoti ɔdi na utalɛka beti ebuo ɔmmɔ ɔdi beye. Ama bese kedee na ɔlɛka badu-ma na beti bana ubugya bakuna bewi lɛkpabi lɛlɔ na bakya bana lɛmwi lɛmmɔ ogya bakyula na ɔnyi ƒɛƒɛɛ ɔmmɔ ɔyɔ-mi kaƒɔ.

¹⁸ Bana lɛna lɛdi bina ɔdi aani kalɛ kani na bebuo bani kayi ɔvu ku ebuli lɛna bákɔliku katɔ bátina-mi bébo-ni kudu lɛdi bina ɔdi.

¹⁹ Ala ani ƒui na bédie bése sɛsɛɛ béte-mi ɔ́siku Israelƒuɔ etela ani na béboku-mi kemmo ni, líti muute awɔ Aaron ku ƒula bebi bananabi ku belekubi. Na bunyimi bɔmɛni na Unwoti únyimi úse úte awɔ ku ƒula bebi ku bawɔ úsela uwi ƒui na ulavumana.”

²⁰ Amu na Unwoti ɔ́su Aaron ɔnini, “Aaadubo kadikɔ kadi bɔkɛ na Israel, na belele lɛla lɛdi lɛnɔ belete-ɔ, ɔsika ami Unwoti kani ndi ƒula kadikɔ ku lɛla lɛni nédu-ɔ na Israelƒuɔ akɔ.

²¹ “Na ala ani ƒui na Israelƒuɔ bákɛ básiku bana kabla kani baabla kemmo lɛkpa leevudi ni, líti muute Lewiƒuɔ ka beti babla bana kadikɔ na Unwoti Adi Kevo kemmo kabla kani na baabla kenye.

²² Na ɔ́si ɔƒɛni úsela ni, Israelni biala utani utede Unwoti Adi Kevo kammɔ kudɔ. Na si ɔdi ɔ́bla lɛni ni, ɔdubɔkɛ nwuna likpidi kɔtu bɔni ɔni ndi kukpi.

²³ Lewiƒuɔ kani na ɔlɛka bataabla kabla na Unwoti Adi Kevo kammɔ kemmo. Na si lɛla lɛdi lɛ́lɛ mmɔ ama kani ndubɔnuku-ni. Ɔda bubo bɔmɛni buse úsela uwi ƒui útédu bina bawɔ bawɔ akɔ lɛnɔ. Na ama beeebo kadikɔ kadi na Israelƒuɔ akɔ.

²⁴ Mmomu Israelƒuɔ ala lɛkpa leevudi lɛni beeti teeboku Unwoti aani akpala ndubɔbla bana kadikɔ. Ɔmɛni ɔsu na lɛ́su nnii, ‘Beeebo kadikɔ kadi na Israelƒuɔ akɔ.’ ”

²⁵ Amu na Unwoti ɔ́su Mose ɔnini,

²⁶ “Temi te Lewiƒuɔ na asu-ma anini, ‘Ala lɛkpa leevudi lɛni lɛ́su Israelƒuɔ ka beti beboku-mii aani bina kadikɔ mmɔ si béti béboku ni, amii lɛnɔ bidie lɛkpa leevudi na biti bɛbla akpala bite Unwoti.

²⁷ Na badubuti etela ammɔ aani edula ebi ani nási bina mmo edula ebi kewiilekɔ iye egyiibi ntu bɔni nási bina ntɛ kebulokɔ.

²⁸ Na ala lɛkpa leevudi lɛni na bɛɛƒɔ́ taasiku Israelƒuɔ kudɔ ni, ulu ɔmɛni lɛlɔ na bɛdubɔsia na amii lɛnɔ biti akpala biboku Unwoti. Na akpala amɛni kemmo ni, biti Unwoti kadikɔ bite ɔkpane Aaron.

²⁹ Na ɔdi ka bɛsia anu na ala ammɔ kabunikɔ ƒui kani nse kedee na biti bite Unwoti.’

³⁰ “Na asu Lewiƒuɔ bammɔ anini, ‘Si bíti ala ammɔ kabunikɔ kammɔ ƒui bíboku Unwoti ni, badubɔnu-nya aani edula ebi ani na bíwiile bíwi kakpa iye egyiibi ntu bɔni nási bina ntɛ kebulokɔ.

³¹ Na amii ku bina kaduli bekyuli bɛkana na bɛdi ɔkladi na kesi kesii ƒaa, ɔsika ɔmmɔ ndi bina lɛyuƒɔla na kabla kani na bɛɛbla na Unwoti Adi Kevo kemmo kenye.

³² Na si bídie ala ammɔ kabunikɔ ƒui bíte Unwoti ni, biiibo kɔtɔ budu bɔdi na ɔmɛni kemmo, na ɔɔɔdubo bɔya na Israelƒuɔ akpala ammɔ ese lɛlɔ, na amii lɛnɔ bilekpi.’ ”